|
حلوي آلدني ツ ... http://up.arabseyes.com/uploads2013/...4349852169.gif العاب يسعدلي صباحكوا ومساكوا http://up.arabseyes.com/uploads2013/...4329342337.gif ، هدا ثالث موضوع لإلي هههههه، بعرف إني غريبه نوعا ما، بالنسبة للبائي عندون كتير مواضيع، المهم حمستوني اعمل مدونه لإلي، من كتر ما بفوت ع مدونات قسم من الاعضاء، بحسون بكتبوا الاشياء اللي بحسوا فيها بغض النظر ان كانت حلوه او حزينه، المهم يللي بئلبون بطلعوه وهدا الاشي عجبني، لهيك حبيت اعمل زيكوا، احط كل اشي ببالي، صور بحبا وبستحليا، صور بتخصني، او اكتب عن اشياء موجوده جواتي، وعن حياتي اليوميه .. بإختصار مدونتي رح تكون بسيطه لإني انا إنسانه بسيطه كتير، بحبش الاتيكيت او الغرور او ابالغ بكتاباتي هون، لأ انا بعيده عن هاي الاشياء، واكيد مش الكل رح يتابعوني، بس اللي رح يتابعني بئلو انه ان شاء الله تحب مدونتي او بالاحرى تحب دفتري "الخرابيش"، لإني مش رح اكتب عن شغلات معينه، رح اكتب عن كل الاشياء اللي بتخص وبتحكي عن شخصية "سمره http://up.arabseyes.com/uploads2013/...3293485110.gif " .. http://up.arabseyes.com/uploads2013/...4349852169.gif العاب |
"حلوي آلدني، حلوي سوى، ئلبي وئلبك فوء الهوى، داب الماضي راح انطوى والزمن دوار .." لهالسبب سميت مدونتي بهالاسم، لإني بحب هالغناي لوديع مراد، بحس هالغناي بتعطيني امل وبتخليني مبسوطه، وبنفس الوئت حبيت يكون عنوان حلو، عنوان اي حدا رح يئراه ينبسط فيه، لإني بعيده عن الاحزان، مع انه حياتنا بتخلاش من الاحزان وكان فيني احط عنوان حزين، بس دايما بحب اتفائل رغم كل اشي، وتضل الضحكه مرسومه ع وجي .. |
ئبل شي اسبوعين، كنت ماشيه بالطريئ مروحه من جامعتي بعد ما خلصتي شغلتي هناك، ورايحه ع محطة الباصات لأروح، بطريئي بالصدفه لمحت عجوز ماشي ع عكازه كإنه كان بيأشرلي بإيدو، مشيت لعندو وعرفت انه بدو مساعده، دغري ئلي ساعديني انزل من الرصيف وائطع الشارع، يعني يئطع الممر المشاه، مع إنه كان وائف جنب ممر المشاه بالزبط، مسكلته ايده وساعدته وراح، ئطعلي ئلبي من كتر مهو كبير بالعمر ويا دوب كان الحكي يطلع من تمه، صرت اسال حالي، كيف الشباب بيتركوا اهاليهون الختياريه لحالون؟! ليش بهاللحظه بنته او ابنه مش معه؟ عنجد الدنيا غريبه .. |
"بتكبري بكرا ..!! بتكبري .. وبتعرفي انو الدنيا مو كلمة بحبك، ولا شب حاول بيوم من الايام يسعدك .. ! بتكبري وبتعرفي انو الرفقات مثل الفقاعات بلحظه بروحو، بتكبري وبتعرفي انو دراستك اهم من اي شي تاني وانو يا حوينة الوقت يلي ضيعتي على ناس ما يستاهلو.. بتكبري وبتعرفي انو اهلك همي سندك لو شو ما عملو فيكي وقد ما ضغطو عليكي .. بتكبري وبتعرفي انو ما حدا بيقويكي بوقت ضعفك غير رب العالمين مو كلمة طولي بالك من حدا جواتو شمتان فيكي.." كتير بعنيلي هالحكي، مع إني كنت صغيري وئتها لمن حكالي هيك، ومع هيك حافظت ع كلامه، وكبرت وعرفت ئديش كلامه مزبوط، فعلا الانسان كل ما كبر بحياته، كل ما تغير، وكل ما مر بتجارب كبيره وصعبه، تجارب بيكنش ئدها بس بتعلمه اشياء كتيره ليصير خبره بالحياة .. http://im47.gulfup.com/eiGt8y.gif |
بتذكر زميله معي بالجامعه وهي من نفس بلدي، سبئ وئلتلي شي مره مبين عليكي مغروره، صفنت فيها وئتها، وعرفت انه كتار ماخدين هالنظره، بيحكموا علي دغري بدون ما يعرفوني مين انا وكيف انا وايش انا، احتكوا فيي لتعرفوني، فعلا اللي ما بيعرفك بيجهلك .. |
http://up.arabseyes.com/uploads2013/...4935158721.jpg دايما بحصل ع شو ما بدي بصعوبه، مش جديد، من وانا صغيري هيك، بئعد اتطلع ع ناس تانيين، بلائيهون يللي بدّون اياه بلائيه صار موجود بحياتون، بصير اسال حالي، ليش دايما مضطره اتعب كل هالئد لحتى احصل ع شو مبدي؟ بس مع هدا كله، الاشي الايجابي بشخصيتي إني إنسانه دايما بتفائل وبحب اخلي الامل موجود، لإني بآمن إنه " الانسان يللي بشتغل وبيتعب من ئلبه آخرته رح يحصل عاللي بدو اياه، حتى لو طوّلت الشغله .." :137: |
http://im53.gulfup.com/7tfRTU.jpg كتير اوئات الظروف بتبعدنا عن الاشخاص المميزين بحياتنا، حبيناهون من ئلبنا وكانوا ئراب مننا، بس يمكن إذا منرجع ندور عليون نلائيهون، مين بيعرف؟ هدا إذا كنا عنجد منحبون ومنعزون من ئلبنا، متل ما صار معي من تلات ايام، رجعت حكيت مع صديقي من سوريا، كان مختفي فتره طويله، وانا استغربت انه طلع عايش، اختفى بالفتره اللي بلشت فيها المشاكل بسوريا، مخطرليش إنه يكون لساته عايش لإنه الاوضاع بهداك الوئت كانت صعبه كتير، معرفتش الائي طريئه وئتا لحتى اتطمن واعرف اخباره وهوي كمان نفس الاشي، بس عملت المسحيل تا لئيته، كتير انبسطتله من ئلبي بعد ما عرفت إنه لساته عايش واتزوج وصار عندو بنت صغيري .. حاولوا تحافظوا ع الاشخاص المميزين بحياتكوا، حتى لو كانوا بعاد عنكوا، لإنه مش كل يوم منلائي هيك اشخاص بحياتنا .. http://up.arabseyes.com/uploads2013/...4957669718.gif |
http://up.arabseyes.com/do.php?imgf=...0824139155.bmp العاب بنات خواتي، كتير بحبون مع إنون بحركوا كتير وكل ما يجوا لعنا لعند دار سيدون بخربوا البيت وبروحوا، بس مع هيك هني زينة العيله، ساره اللي لابسه ابيض، وسيدرا اللي لابسه اخضر .. |
http://up.arabseyes.com/uploads2013/...2178681842.jpg انا إنسانه صريحه كتير، تعودت ع هيك من وانا صغيري، بس في شغلات جواتي بكون بحاجه احكيها، بس مش عم بتخيل شو ممكن تكون ردات الفعل مع إنه مش لازم اخاف، بس لإنه بعترف صراحتي كتير جبتلي مشاكل، لهالسبب اغلب اوئاتي غامضه وكتومه نوعا ما، صحيح عندي معارف، بيعرفوني وبيحكوني، بس بيجهلوا شو فيه جواتي ومين انا بالزبط .. |
http://fc07.deviantart.net/fs70/f/20...ur-d4bbmj6.jpg كتير اشخاص، وجودن كان مجرد وهم بحياتي، تمنيت لو يكونوا موجودين بحياتي ع طول، ما اعيش معون فتره ويصيروا ذكرى، بس للاسف مش كل اشي برغبه بحصل عليه، يمكن هني مش إلي من الاساس، بس مع هدا كله، مبسوطه، مبسوطه لإني عشت معون فتره، ورح يضلوا ذكرى حلوه .. |
http://up.arabseyes.com/uploads2013/...2217614428.jpg امي وبوي، الله يخليلي ياهون، طول عمرون مدلليني، طول ما انتوا راضيين عني ودايما وائفين حدي ومشجعيني معناتا ما بيهمني حدا، ولا اي اشي تاني، الله يطولي بعمركوا ويديمكوا فوء راسي :137: .. |
http://up.arabseyes.com/uploads2013/...2275589218.jpg العاب اشتريتها ئبل فتره، بحب هالشغلات http://up.arabseyes.com/uploads2013/...2284766991.gif .. |
http://up.arabseyes.com/uploads2013/...3864406356.jpg العاب مرات بحس طيبتي زايده عن حدها ويمكن مش لازم كون هيك، لإنه مجتمعنا "متوحش"، بس بنفس الوئت هالاشي بخليني انبسط وبمنعني وئت افكر اغير من طبعي، لإننا عايشين بزمن انعدمت فيه الطيبه، ع الائل بهالحاله بكون من الاشخاص النادرين، والمميزين بطيبتون، والحمد لله إني هيك، بطيبتي بكسب محبة الكل :137: .. |
http://up.arabseyes.com/uploads2013/...1590389231.jpg العاب كتير مبسوطه إني خلصت إمتحانات واجتزت اغلب امتحاناتي الصعبه، كانت فترة ضغط وعدت، والحمد لله إني ع بواب التخرج، عنجد الواحد بحس بئيمة تعبه بعد ما يخلص كل اشي .. |
http://up.arabseyes.com/uploads2013/...0230325932.jpg ئد ما كان الانسان مبسوط بحياته، وئد ما كان متفائل وعارف يعيش حياته ودايما بيبعد عن الاشياء الحزينه، "لا بُد" يصير معه مواقف كتير بشعه لدرجه انه بتخليه يفوت بنفسيه صعبه وبيطول لحتى يطلع من هالنفسيه، وهدا اللي بصير معي مرات، والابشع من هيك انه لمن اكون متدايئه بصير افكر كل الناس اللي حولي مبسوطين وبعيدين عن الحزن، بس السؤال هل فعلا بكونوا مبسوطين وبعيدين عن الاحزان؟؟ ما بعرف .. |
http://www.fotoobook.com/images/v/vo...7922_1137.jpeg دايما بحكولي مفش اشي اسمه حظ بالدنيا، بس اوئات بتصير معي مواقف معينه بتخليني آمن بوجوده، بحير الاشي .. |
http://1.bp.blogspot.com/-4FaHB-CAMh...e18ytzydws.jpg انا بعرف انه رح يجي يوم واترك المنتدى لانه مفش انسان بيئضي حياته كلها ع النت، والظروف المستئبليه بتتغير وبنضطر انه نترك المنتدى، واكيد رح تضلوا ذكرى حلوه، وبهداك اليوم بالذات رح اعترفلكوا بشغله، بعرف انه الموضوع رح يكون صدمه، بس لحتى تعرفوا اني كنت بينكوا " إنسانه " مش اكتر .. |
اشتقت لمدونتي العفويه والبسيطه .. :137: |
على فكره مش كل واحد طبعه غريب تفكره "شاذ"، وتبلش تبعد عنه، بالعكس فكّر اتمسك فيه واذا بدك صاحبو كمان، لإنه هيك اشخاص بالاصل بكونوا "خبره"، ورح تكون سعيد بتعاملك معون، بس الدنيا والمواقف خلت طبعون يصير غريب .. |
في ناس من ئد ما هي شاطره بالكذب والتمثيل، بتحس حالك انه لازم تعطيها جائزة اوسكار العالميه !! يخي احتمال تحس حالك مئصر كمان !! |
صعب تتواصل مع ناس مستواها اعلى من مستواك !! بمعنى غنيه مادياً، حتى لو كنت بقمة الاعجاب فيهون وبشخصياتون .. حاكي يللي بيشبهوك مش اكتر .. |
مغلطتش لمن سميت مدونتي "حلوي آلدني"، بس إحنا يللي مصعبينها وإحنا يللي معقدينها، الحياة "بسيطه" !! |
اوئات بتصير مع الانسان مواقف "معينه" بكنش متوقع انها رح تصير معه بالمره، بغض النظر ان كانت حلوه او بشعه، بس إذا براجع نفسه من بعد هالمواقف، رح يكتشف انه كان لازم يمر فيها من زمان "لشغله معينه"، ممكن تكون اكتشاف اشي او تحقيق اشي او وصول لهدف .. |
ولا بحياتي بندم ع كل شخص تعاملت معه بحياتي، بغض النظر ان كان ئريب او غريب، تنيناتون علموني كتير .. |
http://www.bntpal.com/vb/img/bntpal_1432133966_293.jpg بحبش ادعي ع كل انسان جرحني بحياتي، مش لإني ضعيفه ولا لإني مسكينه، بس لإني بخاف الدعوه ترجع علي ! |
الناس لمن يشوفوا واحد "ساكت" بالمجتمع بفكروه اهبل، والساكت اصلا فاهم كل اشي ! |
يمكن الانطوائيه بهالزمن ييلي وصلنالو الحل الافضل من إنه نكون برفقة بشر معدومين المفهوميه ! |
قصة مجتمعنا .. مجتمع صاخب عايش بدوامة "الضياع، القلق، الحيره، والتردد" .. |
شو أخبارنا؟ عادي .. انا عايشه وانت عايش والله يرحم معرفتنا .. |
ليش دايما مضطرين نحبس حالنا بسجن "المثاليه" ؟! حقي أكون حره، حقي أكون ع طبيعتي، حقي أعصب وأغلط وأكره وأحب، لإني "إنسان" .. |
مش ضروري يكون عندي كل اشي بحياتي، مع إنه الانسان بطبيعته دايما بيتمنى إنه يملك كل اشي، بس إذا مندوّر ومنفتّش، منلاقي إنه في شغلات "معينه" يللي ممكن تكون مميزه موجوده بحياتنا مش موجوده بحياة غيرنا، بيتمنوا يوصلوهن .. |
مش كل واحد بيبتسم معناتا مبسوط بحياته، يمكن يكون مخبي جواته قصه حزينه، محتفظ فيها بينه وبين نفسه .. |
ما في داعي نتأثر او نفكر بأشخاص من ماضينا، طالما رح يكون في سبب يأكد إنون مش رح يكونوا بمستقبلنا .. |
12.7 وعادت الحياة إلى مجراها الطبيعي .. |
قديش الواحد بيتمنى ترجع الايام لورا ليغير شغلات كتير بحياته، هيهات الزمن يرجع ! |
قد ما حاول الإنسان يحط حد للماضي رح يلاقي حالو عم بتذكرو لإنه القلب مش من حجر لحتى ينسى، كل اشي بيترك بالنفسيه اثر بغض النظر إن كان حلو او مُر رح يضل معلّم جوا .. |
الحكي يللي منخاف نحكيه او منتردد لحتى نحكيه هو يللي لازم ينحكا !! |
من تصرفات المجتمع العربي، لمن يشوفوا إنسان "فاشل" بيتركوه محله بدل ما يدعموه ليرجع يوقف من جديد !! أما "الناجح" بحاولوا يحاربوه ليفشل بدل ما ينبسطولوا ويكرموه !! مجتمع "مكيود" ! |
من خلال تجاربي بالحياة، اكتشفت إنه "النجاح" بمختلف المجالات ممكن يكون "احلى إنتقام" بحياة الإنسان وقت يفكر ينتقم من شخص معين بحياته .. |
السعاده مش حلم او اشي صعب المنال، بالعكس السعاده دايما موجوده طالما الشغله بتتعلق فالإنسان، بإيدي بخلقها وبحافظ ع وجودها وبإيدي بخليها مجرد وهم بحياتي .. |
| الساعة الآن 12:42 AM |
Powered by vBulletin® Version 3.8.7
Copyright ©2000 - 2025, vBulletin Solutions, Inc.
Search Engine Optimization by vBSEO ©2011, Crawlability, Inc.
HêĽм √ 3.1 BY: ! ωαнαм ! © 2010
new notificatio by 9adq_ala7sas
User Alert System provided by
Advanced User Tagging (Lite) -
vBulletin Mods & Addons Copyright © 2025 DragonByte Technologies Ltd. Runs best on HiVelocity Hosting.