|
ع فكره القعده فالبيت "الزايده عن حدها" بترجّعك لورا ! مش بتقدمك لقدام ! |
لا تقلي حطي حالك محلي، انا حالي ومش عارفي وين حاطيتو ! |
بهمش الإنسان يتوجع كتير بحياتو، اللي بتوجعش بتعلمش ! |
ولا بعمرك تفكر تتقرب من إنسان وتحاول توصل إلو إذا هو مش مفكر يوصل إلك ! |
"كلامك صح" هذا احسن جواب ممكن تحكيه لواحد "اهبل" عشان تختصر من الحكي معه !! شو بدك بوجعة الراس؟ |
الزمن دوار .. بيضل يدور وبالآخر بوقف عندك، عشان يعمل فيك متل ما عملت بغيرك ! |
بحياتك ما تشيل بقلبك ع حدا، شيل هالحدا من قلبك وإتريح ! |
على قولة ابوي " الحياة بدها الله والصبر ! " |
قويه هالرساله !! http://www.bntpal.com/vb/img/bntpal_1456241991_202.jpg وصلتني من شخص من انقرة .. معو حق .. بس شو كان فيني احكيلو؟ انا عربيه؟ ع اساس إنه رح يقتنع .. وهالرساله اثبتتلي إنه العرب هون مش معترف فيون، وإنو الاجانب وخصوصا الدول العربيه دايما بيتطلعوا على عرب 48 بنظره غريبه، وإنون متضامنين مع اليهود فكل اشي، إحنا عايشين معون مزبوط، منختلط معون مزبوط، لإنو خلقنا هون، شو فيني اعمل إذا الله خلقني هون ؟! شو ذنبي إذا اسرائيل احتلتنا بسنة ال 48؟ شو متوقع مني هالشخص التركي هو او اي مخلوق تاني غيرو؟ احرر دول العالم متلن؟ والمشكله الاكبر من هيك، إنو اليهود بحد ذاتون مش معترفين فينا، يللي بخلقة بعض كل الوقت !! |
يللي بيمدحك وقت الضجه، وبخونك بينه وبين نفسه، هذا اكبر منافق ! |
إنعدام المحبه بقلوب الناس هاي الخطيئه الوحيده يللي مش ممكن تغتفر ! |
في فرق كبير بين الإنسان المؤمن والإنسان المتدين ! انا إنسانه مؤمنه مش متدينه .. وما بين المتدين والمؤمن، بإنو المؤمن بيعيش حياتو "بصلاة" مش بعيش حياتو "بيصلي" متل المتدين، بظن هاي اهم شغله بيقدر الإنسان يعيشا بحياتو ! |
شكرا كتير ننوش ع التثبيت للمره التاني الاشي بيعطي حافز ونشاط وفخر وثقه الله يسعدك عيوني :137: |
الكل بيغلط ! كلنا عنا تاريخ، عنا اخطاء وشواذات، بس اليوم لمن اكون غلطانه ووراي مصايب او مشاكل شخصيه، واجي احكي مع الناس "بالعفه" متجاهلي كل مشاكلي !!؟ سيعتا رح ضلني خايفه واصير اتطلع وراي مين اللي رح يجي ويحكي عني شي يوم من الايام انو انا كنت هيك وعملت هيك ! عندي اغلاط كتير بعترف، بس اللي ممكن يميزني عن غيري إني انا بحكي بهاي الاغلاط وبحكي عن مشاكلي .. حتى لو بطريقه غير مباشره .. متل ما عملت فالمنتدى، سبق وطرحت كذا موضوع، مش عالفاضي طرحتون، لأجل مشاكل شخصيه صارت، خلتني اطرح هالمواضيع .. فا احكي عن اغلاطك وما تستحي فيون، بالعكس رح تتعلم اشياء كتير، وولا بعمرك تعمل حالك ملاك لإنه مفش إنسان بينزل ملاك من بطن امه، كونك بتجهل شو ممكن يصير معك مستقبليا لهالسبب انت معرض بأي لحظه بإنو يصير معك غلط او مشكله ! |
وصلني 5 لايكات بصفحتي بالفيس، وصلني 50 لايك ! وصلني 10 .. طيب وبعدين؟ شو المغزى من اللايكات؟ ع اساس بتعطي اشي عظيم؟ والمشكله الابشع من هيك إنه في ناس بتحط لايك عالطالعه وع النازله، خبر حلو، بشع، حزين، بيضحك، مقرف، بكل المواقف وبكل الحالات بتلاقي اللايك تبعو ! وفي اوقات بكتب عباره معينه بالفيس، الناس بتفكر إنو بدي لايك وبتبلش اللايكات، وانا اصلا بديش لايك، بدي تقرو وتفهمو شو انا كتبت ! انا بكتب لنفسي اساسا !! بس مفش فايده من الحكي لإنو الفيس كلو على بعضو صار "عاده وتعودوا عليها" إن كان باللايك او غيرو، الله يعين كل واحد ع عقلاتو مو؟ |
اليوم فش حدا بيموت من الحب هّه ! بالعكس اليوم صرنا نعرف وصار فينا نبني حياة جديده من خيبات الماضي ! |
الحياة وقفة عِز ! |
ع فكره الناس بتعرف تحكي "على بعض" بس بتعرفش تحكي "مع بعض" !! |
اننا نحمل شهادة جامعيه، هذا مش كافي، لازم يكون عنا ثقافة حياة مش بس ثقافه علميه، ثقافه حياة اللي ممكن نكسبها من اهلنا وبيئتنا وتجاربنا ومشاكلنا ومواقفنا بالحياة .. |
الدنيا دايما عكس التيار ! مستحيل نرجع لأيام زمان .. |
عندي مشكله مع التواصل مع الناس !! بس مش عارفه إذا فعلا اقول عنها مشكله ! بقصد إنه بحس حالي مياله للناس يللي مش من ديني اكتر من إنه اكون مياله للناس يللي من ديني (الدروز)، لهيك بحس حالي ناجحه بتواصلي اكتر مع مسيحيه واسلام وحتى يهود !! غريب الاشي ولا عادي ؟! |
بكل بيت في عيله، وكل عيله الها قصة، واكيد فكل بيت بكون في حدا رقبتو تحت السكين ! وبحاول يهرب منها ! |
يوم ضحكة، يوم بكي .. يوم فرح، يوم حزن .. يوم حياة، يوم موت ! هيك الدنيا .. |
مش ممكن اقتنع إنو بشي مرحله بالحياة إنو هالإم يللي بتتعب ع ولادا، وبتربيون وبتعطيون من قلبا مدى حياتا وبتعلمون ع الايمان والمحبه والتسامح، بإنو يجي ربنا يوم الحساب يسألا "انتي وين كانت ديانتك او شو كانت ديانتك؟" ! |
عفكره انا شوي بكرها هالحياة .. بس بحبا .. بكرها وبحبا ! مفهمتوش علي صح؟ |
بتصور مفش إشي إسمه "نرجع متل ما كنا" يللي تغير تغير ! |
الحياة لمن تعطيك اشي، بتاخد منك اشي تاني "بالمقابل" ! |
| الساعة الآن 08:11 AM |
Powered by vBulletin® Version 3.8.7
Copyright ©2000 - 2025, vBulletin Solutions, Inc.
Search Engine Optimization by vBSEO ©2011, Crawlability, Inc.
HêĽм √ 3.1 BY: ! ωαнαм ! © 2010
new notificatio by 9adq_ala7sas
User Alert System provided by
Advanced User Tagging (Lite) -
vBulletin Mods & Addons Copyright © 2025 DragonByte Technologies Ltd. Runs best on HiVelocity Hosting.