|
قصه وروآية قلبي_علينا http://www.bntpal.com/up/uploads/bnt...3848381761.png الجزء_1 ابتسملي وهو عم يأشرلي بإيدو بمعنى " لفي كمان " .. حط السيكارة بين شفايفو وحرك حواجبو وهو عم يقلي : لابقلك الفستان اعدت ع طرف الكنباية يلي هو اعد عليها : يعني اشتريه ؟ - اممم حلو ، او قلك لا لا بلالك ياه ، شايفك سمنانة شوي اشرلي بأصبيعو بمعنى اتركيه و الحقيني .. غيرت تيابي و اخدت جزداني وطلعنا من المحل : شو صرلك فجأة بالاول كنت عم تقلي عجبك كتير شو عدا مابدا !! انا كتير حبيتو حسن : اي ماعجبني وبس خلص امشي بلا كتر حكي رح وصلك ع البيت و انا رايح ع شغلي فرح : طيب متل مابدك " وصلني ع البيت بعدين راح ع شغلو " مرح : اجيتي فوفو ، تعي طمنيني كيف كان مشوارك مع صهري المستقبلي ههههه فرح : مجنون بعد مائست الفستان وعجبني ماخلاني اشتريه قلي غيري تيابك والحقيني وطلعنا وعصب فجأة وتغيرت ملامحو مرح : ههههه طولي بالك بكون عندو شي ضروري .. _______________ _______________ ( بعد اسبوع ) .. كنت اعدة عم ادرس ، قام اتصل فيني حسن حسن : كيفا فرحتي فرح : مشتاقتلك ، و انت كيفك حسن : مشتقلك كتير فرح بكرى بتنزلي ع الحديقة يلي بشوفك فيا بالعادة بدي شوفك دبري حالك فرح : طيب رح حاول حسن : فرح اكيد بتجي مشان الله ، شتقتلك كتير وبدي شوفك فرح : و انا شتقتلك خلص رح اجي بوعدك " تاني يوم " فئت من بكير لبست ونزلت ع الحديقة يلي بشوفو فيا بالعادة لقيتو اعد ع كرسي ماحوليه حدا وعم يستناني ، قربت لعندو بشوق ولهفة وقلتلو : شتقتلك حسن : تؤبريني ايمتا وصلتي فرح : من شوي ، حسيتك مكتئب شبك ؟ حسن : ولاشي ، ثواني لاتصل بالمعلم ( رفع تلفونو و رن ع حدا بعدين سكر الخط وكملنا حكي ) خلال كم دقيقة اجا شب لعندي اعطاني باقة ورد حمرا ودبدوب احمر وكيس شيك ، كان في جواتو هداك الفستان يلي حبيتو .. تفاجئت بالكياس والشغلات يلي صارت بين ايديي وقتا عرفت انو هدول هدية .. التفتت لعند حسن و انا مبسوطة : حبيبي يس.. حسن : كل سنة و انت الدقات لقلبي فرح : يعني الفستان كان مفاجآة ؟ حسن : هههه اضطريت مشان اعرف شو القياس كان هاد احلا يوم بحياتي احلا مفاجآة بتصير معي رجعت ع البيت و انا مو عاطية فرحتي لحدا بإيد ماسكة الوردات و بالتانية الدبدوب والكيس فتحت الباب وسكرتو برجلي وفتت و انا عم دندن .. سوسن ( مرت ابي ) : الله الله الله ، دب ورد كيس نرتب ، وعم تغني ، الله يسمع ابوكي الاخبار الطيبة فرح : رفقاتي حبو يحتفلو بعيد ميلادي بكون غلط ولا عيب ؟ سوسن : ههههه مذوقين رفقاتك تركتا ورحت ع غرفتي و انا معصبة من تصرفاتا الباردة حطيت الغراض ع تختي ورتبت كلشي بمكانو ، غيرت تيابي وتمددت ع تختي و السماعات بأداني و انا عم فكر بحسن .. لحد ماغفلت وماعد ةعيت ع شي صحيت بنص الليل ع صوت رنة موبايلي < اتطلعت ع الشاشة > كان رقم حسن .. - الووو حسن : فرحتي قومي طلعي ع البرندا شتقتلك كتير ، هلأ خلصت شغلي قلت بمرئ بلمحك - فرح : لك مجنون انت ، يلله طالعة لبست ع حالي جاكيت ووقفت ع البلكون ، الشارع هدوء والسما صافية من كلشي ما فيا غير ضو القمر يلي عاكس ع بلور سيارة مواجه غرفتي .. وقفت انا وحسن نتطلع ببعض وعم نحكي ع التلفون .. وقتا كنت حاسة بحنية و امان من هالعالم البشع ، كلماتو الحنونة اخر الليل بتعطيني امل بكل يوم عم عيشو وقت يحسسني اني اهم وحدة بحياتو ، وقت يحكيلي اديش بحبني و اديش حياتو عتمة بدوني .. بحس حالي خلقت مو بس لعيش انا لحالي ، خلقت لعيش وعييش معي روح تانية .. بقينا اكتر من ساعة عم نحكي مع بعض بعدين هو راح و انا فتت نمت .. اول ربع ساعة بغفلتي حلمت بكابوس ، كانت دقات قلبي عم تتسرع ونفسي عم يضيق حسيت كأني مربطة ومحطوطة جوات صندوق ماعم بقدر اطلع منو كل ما حاول ارفع ادي حس في شي ثبتني من جديد ، لحد ماشفت شب ابيض بدقن وشعر من سواد الليل ، قرب عليي وحط ايدو ع راسي بعدين شفت حسن من بعيد عم يهز براسو وكأنو عم يعبرلي عن رضاه بخصوص شي ، هون قدرت اصحا و انا عم اشهق و اسعل .. فقت و انا عرقانة و تيابي مبللة بالمي .. غسلت وشي و رجعت لغرفتي ، فتحت موبايلي وبعتت لحسن ، كنت مفكرتو نايم قام رد عليي حكينا شوي بعدين كملت نومتي .. فئت الصبح ع صوت سوسن : يلله ياست بدور وراكي مدرستك ياطالبة البكلوريا و ابوكي متعشم تصيري دكتورة ههههه اومي اومي نئبري ع مدرستك بس ترجعي عندك تعزيل ، لكن سهرانة لنصاص الليالي الله بييعلم مع مين فرح : خالتي شبك شبك شو صايرلك مشان الله سوسن : يلله وليه اومي لبست ولملمت غراض مدرستي وطلعت ، اول مانزلت من البناية لقيت حسن واقفلي ع الطرف التاني وهو مرتكي ع الشجرة : حسن شو جابك حسن : اشتقتلك يادبة فرح : و انا شتقتلك ، الله ينزع صباحا سوسن حسن : شو عملتلك اليوم كمان فرح : مابتعرف معاملتا معي حسن : اخخخ على ما احرقلك ياها وريحك منا فرح : هههههه ، يلله انا فايتة ع المدرسة و انت طير ع شغلك حسن : فرحتي ، بحبك كتير فرح : و انا بحبك ، يلا باي ___________ ___________ خلصت دوامي ورجعت ع البيت ، طول الوقت كان ممحي من بالي اي شي الو علاقة بالمشاكل كان كل همي وتفكيري مرتبط بحسن ، مستحيل تمر لحظة بدون مافكر فيه ويخطر ببالي وقول بحبك فيها الف مرة ولو بيني وبين حالي مستحيل اسمع صوت الادان وما ادعي ربي يكون حسن إلي وصلت ع البيت ، دخلت ع غرفتي شلحت تيابي و تسطحت ع التخت غمضت عيوني و الاحلام عم تاخدني وتجيبني شي بحسن وشي بالخطبة والزواج والولاد يلي رح يجو بيشبهوه .. دائما سوسن بتقطعلي سلسلة احلامي بصوتا العريض : يلله قومي ع التعزيل خلصينا حاج شاردة ابصر بمين وماعليي الا لبي الاوامر ، لانو ازا تمردت سوسن بتخبر بابا بعلاقتي مع حسن ، شافتني مرة واقفة معو ومسكتا عليي وصارت تهددني فيا و انا ماقدرت الا طيعا بكلشي .. طلعت ساعدتا وبلشنا شغلنا بل بيت والتنضيف ماخلصت الا و انا هلكانة وفارطة ، عملت دوش وغيرت تيابي وقلتلا نازلة اتمشا شوي داق خلقي نزلت تمشيت و اتصلت بحسن يجي لعندي ع الشارع نتمشا شوي ونتسلا .. ( وصل حسن ) اعدنا ع رصيف بالشارع يلي ورى بيتنا ، كان الحي هدوء ومافي ولا حدا .. فرح : ماتأخرت حسن : لا كنت قريب من هون فرح : تعبانة كتير حسن : سلامتك تؤبريني من كل التعب ، ريتو لعدوينك نشالله فرح : حسن انا بحبك كتير ومافيني عيش بدونك اتطلع فيني نظرة غرام و ابتسملي بعدين مسك ايدي وباسا فرح : انا تأخرت صار لازم روح هلأ سوسن بترفع فيني بطاقة بحث حسن : اخخخ الله يكرمني وخلصك من هالعيشة فرح : الله كريم حبيبي .. رجعت للبيت كان بابا راجع من شغلو ومتسطح ع الكنباية وسوسن اعدة عم تشرب قهوة .. بابا : وينك لهلأ ؟ فرح : عم بتمشا ، عزلنا البيت وهلكت نزلت شتريت عصير وتمشيت بعدين اعدت شوي بالحديقة وهي رجعتي جلس ع حيلو وقرب لعندي ، حط ايدو ع راسي وهو عم يدق عليه : وليه ازا بتتأخري برات البيت رح ادفنك و انتي عايشة فهمانة فرح : اي اي امرك ____________ تعرفت ع حسن قبل سنتين بالصدفة التقيت فيه بالحديقة كنت اعدة انا و اخي الصغير هو عم يلعب بالمرجوحة و انا واقفة جنبو قام وقع وصار ينزلو دم من خدو وقتا ركد لعندي حسن وساعدني حملو ومسحلو الدم من وقتا تعرفنا ع بعض وحبينا بعض .. #يتبع # |
حبيتها بس آخر شي فرح يلي بتقوله ؟ بنفعش تنزل كمان هلأ الفضول مش هيخليني أنام هههههههه |
اقتباس:
لانه الجزء الثاني في سمة بدن هههههههه |
اقتباس:
|
قلبي_علينا الجزء_2 ليش هيك عيشتي وحياتي ياربي ، امي ماتت و انا لساتني صف اول نحرمت من حنيتا ووجودا ابي تجوز مرة ظالمة بتعاملني كأني خدامتا ، سوسن مرت ابوي جابت اختي مرح يلي بحبا كتير وبعتبرا كلشي بحياتي اصغر مني بسنتين و محمد اخي الصغير عمرو 7 سنين كنت اعدة ومكتئبة حاسة كل الدنيا سودة بوجهي اتصلت بحسن وطلبت شوفو ، لبست وطلعت من البيت وطبعا ادام مرت ابي عأساس رايحة ع درس خصوصي فرح : حسن لايمتا هيك رح نضل حسن : اخخخ والله رح يطئ قلبي عليكي بس مو طالع بإيدي شي فرح : بس انا مليت صرلي سنتين معك و رح نصير بالتالتة ، انت املي لاخلص من الظلم وعييشتي مع اهلي والله عم بشتقلك مافيي عيش بدونك حسن : هه يمكن انا ماكان لازم حب وعلقك فيني يلي متلي غلط يحبو ، ابي عاجز و امي مريضة و شغلي يادوب مكفي مصروف البيت ويلي دراستي وويلي شغلي وويلي انتي فرح : ندمان لان حبيتني ؟ حسن : مو ندمان لان حبيتك ، ندمان لاني علقتك فيني و انا وضعي هيك بس والله بحبك والله انتي اثرتي فيني فرح : كل يوم عم بدعي ربي يعطيني ياك لانو مافيني عيش بدونك مافيني اتخيل حالي لواحد تاني هاد العذاب بحد ذاتو ، مشان الله ياحسن حاول احكي مع اهلك جرب حسن : خلص رح شوف شو بصير معي ، اومي طلعي ع البيت بلا ما مرت ابوكي تعملك مشكلة هلئ لان تأخرتي تركت حسن وطلعت ع البيت اول مافتحت الباب حسيت كأني دخلت ع شي فرع امن طلعت سوسن بوشي : وين كنتي ؟ فرح : يعني مابتعرفي انو بدرس الرياضيات عند منال سوسن : منال اتصلت وبدا منك شوية دروس وقالتلي انك مو عندا ، كنتي معو فرح : مع مين شو عم تخبصي مرح : خلص ماما كانت عند منى اليوم الدرس ببيتا سوسن : لاتستري عليها ، الله ياخدك يافرح بدك تفضحينا صارت تعلي صوتا عليي هيك لحتى سمعا بابا اجا ع صواتنا : شوفي ليش عم تصرخو فرح : عم نتخانق مم مشان شغل البيت سوسن : اي مشان الشغل فرح ماعم تساعدني ابي : وليه ماتعينيا لخالتك فرح : خلص رح صير ساعدا انا اسفة خالتي تركتن وهربت ع غرفتي سكرت الباب وصرت ابكي ، برات البيت قرف وجوات البيت ظلم وقرف وخناق و حسن يلي هو املي الوحيد بهالدنيا كمان قصتي معو ماعم تتحرك تسطحت وغمضت عيوني و انا عم امسح دموعي من ع المخدة هيك لحتى غفيت ، فقت الصبح ماكنت قدرانة احكي ولا ارفع راسي يمكن اد ماغصيت وخنقت قبل بيوم التهب حلقي ونزلو لوزاتي وراح صوتي ضليت متسطحة كل الوقت .. رن موبايلي .. حسن : كيفك فرح ( جاوبتو بصوتي المبحوح ع الاخر ) : منيحة حسن : شبو صوتك شوفي قلتلو مو ادرانة احكي ، سكرت وحكينا ع الواتساب تواعدنا نشوف بعض المسا وقت يكون بابا بالسهرة .. لبست ونزلت بدون مايشوفوني اتفقت انا ومرح تغطي عليي .. حسن : لك شبو وشك ليش هيك مريضة هالقد نشالله بموت ريتني انا ولا انتي ياعمري فرح : بعيد الشر عنك ، هلأ تحسنت شوي عن قبل ، بس مافيني اتأخر قلي بسرعة ليش بدك ياني اجي حسن : اول شي كنت بدي اتطمن عنك ، تاني شي انا حاكيت اهلي بموضوع الخطبة فرح : اي ؟ حسن : رفضو رفض تام ، ابي قلي مامعك ولا ليرة لمصاريف الزواج والخطبة وشغلك مو ثابت ونحنا مو خرج نساعدك ، بس يسالك ابوها شو عندك شو رح تقلو ؟ وين بدك تسكنا ومنين رح تعيشا .. و امي قالتلي حق خاتم مامعك سكر ع القصة فرح : ياربي ( حطيت راسي ع رجليي وصرت ابكي ) .. حسن : الدنيا مسكرة بوشي ، رزقتي قليلة و يادوب مكفية و اهلي مامعهن وبحب بنت العالم ريتو الله ياخدني ويريحني .. التفت عليي وشافني كيف طابة راسي وعم ببكي ، قرب عليي رفع راسي لعند كتفو وضمني وهو عم بقلي : خلص حبيبتي لاتبكي الله يجعلك من نصيبي لاتبكي فرح : ماعد اقدر اعد اكتر وماعد اتحمل موجوعة ، انا طالعة ع البيت حسن : طيب روحي وطمنيني عنك طلعت ع البيت والحمدلله سوسن مانتبهت ع غيابي ، ماعملت شي تسطحت ونمت و انا عم ادعي بحرقة - صعب الانسان يحب شخص ويتعلق فيه ومايضمن يكون الو بيوم من الايام الحب حلو بس وقت يتحول لتعب وخوف ووهم بصير بيوجع وببكي .. ساعات بقول خلص علاقة مو معروف نهايتا مسحيها من حياتك وبلشي من جديد وساعات بقول مافيني عيش بدونو هو نفسي وكملي يابنت مع الشخص يلي قلبك ختارو كملي مع يلي بحبك وبتحبيه .. مر يومين بدون ما احكي مع حسن كان موبايلو معطل وماقدر يحكيني غير مرة وحدة دقيقتين ، شتقتلو كتير مو بالعادة هيك يغيب عني لما كنت مريضة غبت تلت ايام عن مدرستي ، واليوم تحسنت شوي قمت لبست وطلعت بس بدال ماروح ع المدرسة رحت لعند حسن ع شغلو ( هو كان بيشتغل بمكتب سياحة وسفر وماعندو حدا ) اعدنا حكينا وتسلينا وشربنا قهوة ، الاوقات يلي بكون فيها معو بحسا بتمضا بسرعة مع اني بتمناها ماتخلص .. ________________ ( بالبيت ) ابي : اهلا وسهلا .. اي هون بيت فرح خير المديرة : انا مديرة مدرستا لفرح بدي اتطمن ع فرح خير ليش ماعم تجي صرلا 4 ايام عم تغيب ابي : ايوا ، اليوم ما راحت ؟ المديرة : لاوالله ما اجت ، طمني نشالله مافي شي ابي : كانت مريضة شوي لهيك مابعتناها المديرة : معافاية .. - بعد ماسكر بابا الخط اجت لعندو سوسن وهي عم تسألو مين كان ع التلفون .. رد عليها وهو معصب : نقلعي من خلقتي _________________ فرح : حسن انا رايحة عالبيت ، خلص وقت دوام المدرسة لازم ارجع .. لملمت غراضي وطلعت عالبيت فتحت الباب بالمفتاح و دخلت لجوى ، لقيت بابا اعد ع اول كنباية بوجه الباب و وشو مقلوب وبين عيونو في نار بدا تحرقني سوسن اعظة جنبو ولافة رجل على رجل وعم تطلع فيني .. فرح : مرحبا ، شبكن ؟ ابي : وين كنتي فرح : مم بالمدرسة وين بدي كون ابي : عم تكزبي عليي ياقليلة الترباية هلئ رح ربيكي مسكني من شعري وشحطني لعند التلفون طالعلي ع الكاشف رقم الدرسة وقلي : هاد شوووو رقم مدرستك اتصلو وقالو انك مارحتي اليوم لككك وين غبتي 7 ساعات وين بلش يضربني بكل مكان من جسمي ع ايديي ورجليي وراسي وشد شعري ، اخر شي زتني بغرفتي فات قفل الشباك و نزل الابجور وباب البرندا شكرو وقفلو و اخد المفتاح .. اخدلي الموبايل واللاب توب وطلع من الغرفة وقفل عليي الباب ، ونبه على سوسن ومرح ماحدا منهن يفوت لعندي وحلف يمين طلاق على سوسن اذا بتخليني اطلع برات هالغرفة غير عالحمام .. ___________ يتبع .. |
ليش هيك يماااا شو هالسخام هاد ههههههه شو صار بعدين طيب هههههه |
رح اقرأهم الليلة ان شاء الله عوافي مؤيد |
كبداية القصة جميلة جدا .. فتحت علينا المواجع ابو كريم .. يعطيك العافيه .. نزل الجزء الثالث في اقرب وقت ممكن .. �� |
قرأتها الليلة قبل م نام وم علقت بكتني هالقصة بانتظار بقية الاجزاء |
اقتباس:
|
اقتباس:
|
اقتباس:
|
اقتباس:
بس ان شاء الله تكون نهايتها حلوه |
اناقرأتها من بدرياتأثرت بيها جدا لانها تقريبا تشبه قصتي نوعاما فيهاعقربة وفيها حب بيواجه ظروف مجتمع قاسي فرح وحسن هنا ياتري ايه هايحصل معاهم متشوقة اعرف العقربة هنا سوسن زوجة الاب متابعة معاك مؤيد |
مؤيد معلش بعد م تخلص هادي أعطيك وحدة الي ههههههه |
يمااا شو هالظلم زكرتني بشغلات عشتها ي ربي |
ابو كريم وين الفصل الثالث يا طيب ؟ @حبيب العمر |
يلا شوي بنزل الجزء الثالث |
الجزء_3 ضليت محبوسة بالغرفة تلت ايام يزتولي الاكل ويطلعو ويقفلو عليي ، مرح كانت تحاكيني من ورى الباب وتخبرني شو عم يصير ، بابا راح ع المدرسة وقلن انو انا مريضة كتير هالفترة مارح داوم ، وهنن ماحكو شي عطوه عذر كل يوم كان عليي اصعب من يلي قبلو حسن مابيعرف شي عني و انا مابعرف شي عنو ، اكيد هو خايف عليي لانو ماعم احكي معو ومنقطعة عنو ، طلبت من مرح تاني يوم تروح لعندو ع المحل وتحكيلو يلي صار .. ______________ ( مرح التقت بحسن بمكان قريب من شغلو ) مرح : كيفك حسن حسن : تمام ، قليلي شو صاير مع اختك ليش ماعم تحاكيني مرح : بابا عرف انو هي غابت عن المدرسة وراحت لمكان تاني ، كزبت عليه وعلى امي لهيك عصب منا كتير وضربا وحبسا بغرفتا ومنع عليها كلشي حسن : نشالله بموت انا ، يبعتلي حما لك كيف هيك كيف بدا تتحمل مرح : والله بابا كسرا تكسير جسما كلو مورم ومعلم عليه الضرب حسن : ياربي يالله يالله دخيلك .. خلص روحي انتي بس طمنيني عنا مشان الله مرح : حسن بس سماع هالكلمتين ؛ فرح بتموت فيك ، كون رجال معا وتعا خلصا من هالمصيبة يلي حلت عليها لان بابا ماعد يتركا بحالا .. مرح تركت حسن بعد ماحكت هالكلمتين ومشيت ، اجت لعندي خبرتني شو صار ماكان طالع بإيدي شي كأني عايشة بعالم تاني ، انا منفصلة عنهن تماماً .. مافي شي تغيير انا لساتني محبوسة بالغرفة وكل يوم بسمع كلام بشع هاد اذا ما بابا كان معصب وفات تفشش فيني ( بعد يومين ) .. سوسن طلعت تجيب غراض ، وتركت مرح بالبيت ومعها المفتاح نبهت عليها انو ماتخليني اطلع الا اذا مضطرة ، مرح قدام اما كانت تحسسا انو هي بتكرهني ومعاملتا شيئة بس مشان اما تأمنلا .. بعد ماطلعت سوسن ، مرح فتختلي الباب وطلعت اعدت برات الغرفة ، اتصلت بحسن .. فرح : الو حبيبي حسن : فرحتي كيفك شتقتلك ياعمري ( صرت ابكي ) : انا رح موت ، يلي صار رح يموتني ساعدني مشان الله حسن : سامحيني بسببي صار معك هيك ، تطمني تؤبريني رح ساعدك ، حكيت مع ابي وجنيت عليه ورضيو يخطبولي ياكي فرح : عنجد عم تحكي حسن : اي والله المسا رح تتصل امي وتاخد موعد وتجي لعندكن هي وخالتي وعأساس انا وياكي مامنعرف بعض من قبل ، هيك حدى دلنا عليكن فرح : حسن بحبك .. هلئ رح سكر قبل ماتجي خالتي لاتتصل لهون ، يلا باي ..... سكرت التلفون ومسحت الرقم من الكاشف ، ركدت لعند مرح ضميتا و انا عم امسح دموعي .. رجعت ع غرفتي وهي سكرت الباب عليي وقفلتو غرقت بالاحلام والفستان الابيض والامان يلي رح عيش فيه ، صرت فكر بكلشي بعدين ونسيت انا هلئ وين وشو صاير فيني اجا المسا و انا كنت ناطرة اسمع صوت رنة التلفون ع أحر من الجمر ، ابي وسوسن و اخواتي اعدين بالصالة عم ياكلو ويضحكو و انا جابلو صينية فيا صحنين اكل ع غرفتي بس نسيت كلشي وكل تقكيري كان متركز ع التلفون ، اعدة بالارض ومنسندة ع التخت ايديي محاوطين ركبي يلي مقربتن ع صدري و مخي مو معي .. بعد شوي رن التلفون ، انتفضت برجفة .. سوسن : اهلا وسهلا ، اي هون تفضلي اي دلوكن ع فرح ؟ ممم طيب شرفونا بكرى العصر ع الساعة 4 .. وسكرت الخط صرت نط ع تختي و ع الخزانة و اضحك وزت المخدات ع الارض ، فرحتي لاتوصف .. سمعت سوسن شو حكت مع بابا : خطابين لفرح بابا : مين هنن سوسن : مابعرف قالتلي حدا داللن بابا : يلله منيح خلينا نخلص من هالهم اجا تاني يوم ، طلعت من غرفتي تحممت وغيرت تيابي ، لبست بنطلون جينز وبلوزة مشلحة حمرا وفردت شعراتي وحطيت مكياج ناعم .. وصلت امو وخالتو استقبلتن سوسن منيح ورحبت فيهن اعظو بالصالة ، بعد شوي دخلت وبإيدي صينية القهوة و ايديي عم يرجفو فرح : مرحبا ام حسن : اهلا وسهلا حبيبتي فرح : كيفك خالة ام حسن : الحمدلله و انتي فرح : الحمدلله اعدت شوي ، وبعدين ئمت لبرى وضليت عم اسمع شو عم يحكو ، سوسن سألتا عن شغل حسن و دراستو .. و ازا عندو بيت وهدول الشغلات .. لما راحو الجماعة اعدنا مع بعض ماحكت معي ولا كلمة لما قرب موعد رجعة بابا ، فتت ع غرفتي ورجعو قفلو الباب سوسن صارت تحكيلو لبابا عن الجماعة . سوسن : شغلو موظف بمكتب ، عمرةدو 23 ، السكنة عند اهلو ، مافي شي خاص فيه ، بيدرس اعلام سنة تالتة ابي : اييييييي شو صرلك ماعد سكتتي سوسن : عم احكيلك عن عريس بنتك شبك ابي : يعني انتي مافيكي نظر معقول جووز بنتي لواحد مابيملك قشة ، بالنهاية هي بنت مابرميها كيف ماكان شو جنيت سكري ع القصة وبس يتصلو قليلون مافي نصيب رجعت لورى خطوتين دموعي ع خدودي بدون صوت ، تمسكت بغطا الطاولة وحسيت حالي دايخة ، بعدين ماعد توازنت وقعت ع الارض انا والغراض يلي ع الطاولة .. اهلي سمعو صوت الفازة وقت انكسرت وصوت شي تقيل وقع ع الارض فتحو الباب عليي ، وفاتو لما شافوني هيك حملوني حطوني ع التخت وصارو يصحوني .. فتحت عيوني و انا ماعم اتحرك ومصدومة بس عم اتطلع بالسقف وحجر عيني جامد .. ابي : ليكا صحيت يلله تركوا وتعو __________________ تاني يوم اتصلت امو لحسن تاخد الجواب ، وطبعاً رفضو ، يمكن انا تعودت ع الضربات يلي بتوقع على راسي ماعدت زاد اني اتحمل شي اكتر من هيك ، الدموع ماعم تفارق عيوني ووجع الراس والتعب معشش بدماغي بعد مدة اسبوع و انا ع هالحالة ، دراستي وتركتا ، حسن وماعد عرفت شي عنو .. بس طالعوني من الحبس يلي كنت فيه مرت ابي صارت تقول لابي يطالعني كرمال ساعدا بشغل البيت ونكفلت انو ماتخليني اطلع من البيت ولا اتحرك بدون ماتشوفني حاسة حياتي وقفت ع الاخر خاصة يوم التنين الساعة 6 المسا .. ( لما اجا بابا ) بابا : سوسن ، مرح ، فرح تعو لعندي التمينا حولبه كلياتنا .. بابا : رفيقي ابو ياسر طلب فرح لابنو ياسر نسندت ع الكنباية وتنهدت وغصيت .. بابا : سمعيني فرح انتي بنتي رغم كلشي ، انا بدي اعطيكي لشخص اوثق فيه و اغرفو خرج يحميكي ويكون سند الك ، ياسر انسان مناسب الك هو عايش بتركيا بسبب هالاوضاع هو عمرو 26 و دارس وعندو شغل و انا شايف فيه رجولية وقدرة ع المسؤولية وخدي هالكلمتين مني ، انا فهمان عليكي شبك بس الوقت مو خرج انتظار ومو خرج زواج بدون ماتطلعي لمستقبلك .. هزيت براسي وابتسمت ، قربت ايديه ع خدودي ومسحلي دموعي .. ____________ ( ببيت حسن ) لك يالله يالله ليششش هيك ( كان عم بصرخ بملات صوتو ويكسر كلشي قدامو ) .. يارب ليش هيك عملت فيني ازا خلقتني فقير شو ذنبي لحتى ماتعطيني البنت يلي حبيتا شو ذنبي لينكسر قلبي يالله .. ام حسن : خلص يا امي الله يرضا عليك لاعد تبكي حرقتلي قلبي تؤبرني خلص كلو نصيب خلص ______________ يتبع .. |
ههه حرقت قلبي انت كمان .. القصة جميلة جدا ..مشوقة جدا عوافي ابو كريم .. بالانتظار الفصل الرابع |
اووف شو هالحزن والله الواحد ما ناقص حزن ونكد حسيت قشعر بدني ببعض الجمل |
ياااا الله بكفي تقطيع لهالقلب |
ي الله بوجعو القلب |
سلامة قلبكم الي جاي دايما احلى ولو ما كان كما نشتهي |
مطولة لتخلص ! نهاية سعيدة ولا حزينة عشان نتفاءل |
اقتباس:
نهايتها حلوه جدا بس الجزء الرابع رح تتفاجئو فيه عكل حال هادا جزء من حياتنا فش انسان باخد كل شي انزل الرابع هلأ:) |
اه اه ياريت نزلو |
نزلو اه فائلتني شوي |
نزلو ابو كريم ... |
حاضر من عيوني تكرمو |
الجزء_4 تزوجت ياسر وسافرت لعندو ع تركيا سكنت ببيت كبير ومرتب ، حياتي كانت حلوة بيت كبير وعايشة لحالي انا وياسر بدون مشاكل وهموم لا في اهل و لا عيلة معنا مشاكلنا مابتزيد عن طبخة او اكلة ياسر شب كتير منيح معاملتو معي خلتني بلش حبو كان حنون كتير معي ويحبني ويعطيني شو مابدي وماينقص عليي شي خصوصا انو هو مقتدر ووضعو منيح .. مضو اول اربع شهور من زواجي وكانت حياتي عم تتحول من بنت متعزبة لمدام واعية ومسؤولة عن بيت وزوج طلعت حامل كان هالخبر هو السعادة بحد ذاتا بالنسبة الي ولزوجي كل تفكيرنا كان ع هالبيبي يلي رح يجي ويعمل شي جديد بحياتنا انا و ياسر ، الاهتمام و الدلال و الحنان كان مملي حياتي عليي بعد الاوضاع يلي زادت بالشام خبرت انو حسن سافر ع تركيا اختي مرح هي يلي عرفت وقالتلي بس حسن ماعاد بحياتي الا ذكرى عابرة ، كان شي حلو حرك مشاعري و اخد قلبي بس هالشي كان بوقت معين .. صرت بالشهر السابع من حملي و انا عم انطر البيبي على نار ، كنت حاسة انو عم يكبر جواتي ويتنفس من نفسي يوم ورى يوم مضو التسع شهور .. وخلفت بنتي ألين فعلاً ملاك شقرا بعيون خضر وشعر ناعم وبياض التلج .. هي كانت فرحتنا انا و ابوا ونور عيوني .. طبقت الين السنة ، وحتفلنا بعيد ميلادا سوا ( بصبح فيه ضباب وغيومو رمادية ) كانت الساعة 7 الصبح ، اعدت انا وياسر ع البرندا عملنا قهوة لنشرب قبل مايطلع ع شغلو الجو كان غايم وشكلو رح يمطر ، صوت فيروز عم يرن بأداني .. كيفك قال عم بقوولو صار عندك ولاد .. أنا والله كنت مفكرتك برات البلاد .. شوبدي بالبلاد .. الله يخلي الولاد .. اييييه .. كيفك انت .. ملا انت .. ياسر : فرح انا رايح ع شغلي ديري بالك ع الين انا بحبك كتير ، خليا بعيونك فرح : ياسر ليش هيك عم تحكي روح ع شغلك وبلا زناخة هالكلام اتطلع بألين وفيني بنظرة غريبة وكأنو عم بقلي مارح ارجع .. ضمني وباسني ، قرب من ألين وباسا .. طلع ع شغلو ، و انا رحت نضفت بيتي و بلشت بتجهيز الغدا .. ( رن التلفون ) عامر : كيفك فرح فرح : اهلين عامر عامر : ياسر بالمشفى عمل حادث بسيارتو رح اجي اخدك انتي و الين .. زتيت الموبايل من ايدي و الدموع معبية عيوني لبست بسرعة و حملت بنتي ونزلت استنا بالشارع لحد ماوصل عامر لعندي ، طلعنا بالسيارة ووصلنا للمشفى .. ناولت الين لعامر و صرت اركد لعند السكرتيرة : جوزي وينو مشان الله وينو ياسر لسكرتيرة : هدي مدام ، هو بقسم العمليات ( طبعا هي عم تحكي بالتركي ) طلعت ع قسم العمليات ، كان هلئ الدكتور طالع من الغرفة ، شال الكمامة عن تمو وعم يلقط نفس ، ركدت لعندو : مشان الله ياسر وين وين الدكتور : روقي ، الاعمار بإيد الله فرح : شوووو شو يعني شو عم تقول لك .. لا لا عامر : فرح اهدي وقعت ع الارض وماحسيت ع حالي الا ع سرير بغرفة بالمشفى صحيت و انا عم ببكي و اصرخ و اضرب الغراض يلي حوليي وقعت السيروم ع الارض و الابرة جرحتلي ايدي .. كنت عم اخبط و اضرب كلشي حوليي .. اجو الدكاترة ، اعطوني ابر وماعد حسيت ع حالي .. الدكتور حلل الحالة يلي صابتني بالانهيار العصبي نتيجة الصدمة القوية يلي اكلتا ، ضليت بالمشفى اسبوع بدون حركة وكلام او اي تصرف عامر هو رفيق زوجي وشريكو بالشغل ، وقف معي وماتركني لحالي لا هو ولا مرتو طول الوقت عندي بالمشفى ومرتو صارت تدير بالا ع الين يلي نسيتا انا و نسيت انو عندي بنت اساسا ، صارت ترضعا مع ابنا و تغيرلا وتهتم فيا و انا لا حس ولا خبر .. وحتى دموع ما عد نزل وماعد بكيت بس مفتحة عيوني وعم اتطلع بالسقف اجا الدكتور لعندي ، وصار يحكيني .. علاجي كان الحكي بقساوة وقوة ، والدكتور صار يقلي : جوزك مات الله يرحمو بس الطفلة يلي عندك شو ، بدك تموتيا مشان جنانك انتي ام اومي ديري بالك ع بنتك وبلا كزب وتمثيل يلله تحركي هون ماعد نستقبلك .. بعد لحظات من كلامو انفجرت بالدموع و الصوت .. وقتا الدكتور اتطلع بعامر وقلو مشي الحال ... اليوم المسا خرجوا من المشفى ونشالله معافاية .. طبعا كلشي حوارات مع المشفى و الدكاترة كانت عم تدور باللهجة التركية .. خرجوني المسا و اخدوني لبيتي ، كنت متحسنة عن قبل صرت اهتم ببنتي ولاعبا ، زبطت بيتي و حاولت قوي حالي مشان ماحسس بنتي اني ضعيفة ومو حمل مسؤولية .. اهلي لما خبرو صارو بدن ياني انزل ع الشام مشان ماضل عايشة لحالي ، بس هاد الشي كان مستحيل لان شغل جوزي كلو صار برقبتي صرت انا متوكلة فيه ولبين ما انهي شغلو و زبط الوضع و انقلو للشام بدي لايقل عن سنة خاصة انو عندي عدة وفاة الزوج لبين ماتخلص لابدا بشغلي .. كنت عم اتحجج اني عايشة مع مرت رفيقو لزوجي ومبسوطة ومو ناقصني شي بس انا كنت عم كزب لانو كنت ببيتي لحالي انا وبنتي وبس دايما خايفة ومرعوبة من قلة الامان وخاصة انو صرت معروفة بحارتي انو انا ارملة وعايشة لحالي كل الليل ضل سهرانة بدون نوم و الخوف معبي قلبي .. ______________ يتبع |
ي الله قشعر بدني اقسم بريي يي ع حظها |
م حبيتو ابدا بس رح اكمل لاني بديت أقراها |
شو هل الحظ النحس هاد .. مشتوق اعرف النهاية .. |
بكره ان شاء الله بحط الجزئين الاخرين لانه في وراها قصه احلى |
القصة مش عادلة وعملت هيك الكاتبة بس لتعطي مجال انو فرح ترجع تلتقي بحسن لا أكثر و لا أقل انزعجت |
هفففففت بكفي تقطيع بجد |
اقتباس:
وانا اخدت منها اذن انشر رواياتها ودعيتها تسجل معنا هون لتنشر بنفسها قصصها وعدت خير لكن ما اعطتني تأكيد بعدين كل المسلسلات هيك اجت على هاي القصه هههههههههههه |
جدد بتحكي مؤيد !! سورية هي !؟ |
بدو يجيب فرح بحالها هههههههه اكيد بمزح مالك |
| الساعة الآن 03:28 AM |
Powered by vBulletin® Version 3.8.7
Copyright ©2000 - 2025, vBulletin Solutions, Inc.
Search Engine Optimization by vBSEO ©2011, Crawlability, Inc.
HêĽм √ 3.1 BY: ! ωαнαм ! © 2010
new notificatio by 9adq_ala7sas
User Alert System provided by
Advanced User Tagging (Lite) -
vBulletin Mods & Addons Copyright © 2025 DragonByte Technologies Ltd. Runs best on HiVelocity Hosting.