قالتلي .. عبالي ولد منك
صفنت .. طلعت فيها باستغراب و قلتلا .. شو خطر ببالك ؟!
قالتلي شبك متفاجئ !!
اي .. عبالي بيبي منك .. يحمل اسمك .. عيونو كبار و سود و حلوين متل عيونك .. ريحتو من ريحتك .. يكبر بحضني و يصير شب متلك .. بدي ولد منك .. خلينا نجيب ولد و بعدا تركني .. سافر .. اختفي .. مو مهم .. انا بس بدي بيبي منك .. و بدي .......
غفيت وهيي عم تحكي .. ما بعرف شو حكت بعدا أو قديش ضلت عم تحكي .. و تاني يوم طنشت السيرة كلها وما أخدت حكيا جد .. و هيي بعدا اكتئبت و بردت علاقتنا و انفصلنا .. و مرت الإيام .. و نضجت أكتر .. و عرفت .. انو لما بتقلك حبيبتك انو بدها ولد منك معناها بتكون واصلة لشي جواتا تجاهك أكبر من الحب .. بتكون واصلة لحالة مرضية من الهوس و الوله و الجنون فيك ..
يمكن بتكون حاسة بخطر فقدانك و بدها شي متلك .. شي بيشبهك .. شي منك يبقى معا دايما" .. و انت تركا .. هجرا .. شو ما بدك اعمل .. مو فارقة معا .. لانو شعورا بالامومة اكبر بكتير من هوسا فيك
مبارح سألني رفيقي عشو اكتر شي بندم بحياتي .. ابتسمت .. و قلتلو اكتر شي بندم عليه اني ما رحت تاني يوم طلبتا من أهلا