كيف العدس ابو العبد

الغبي , العيش , ابو

هاظ يا حفيظ السلامة برجع ابوالعبد ع الدار
وخاف عقله من الشغل والمشاكل
وتراكم الديون والشيكات والكمبيالات
اللي كاتبها والقضايا المتلتلة الي فوق راسه
بفوت ع الدار بتستقبله ام العبد بالبجاما الي ريحتها بصل
وشعرها منكوش مثل حزمة الجرجير المفروطه
وصوتها واصل لاخر الحاره على ابنها الي معوفها حالها.
بغيير اواعيه وبروح بقعد على عرشه بغرفة القعدة قدام التلفزيون
عشان يشوف شو صاير بالدنيا بقترب منه بصينية الاكل
وبتكون مسخنة العدسات وحاطة
زيتون وفجل وبصل ومخلل شحدة من جارتها ام وصفي
لسا بده ببلش يسلخ ويتسمم
وبتبلش شهرزاد حكاية الف قصة وقصة
مش ابنك جاب صفر من 5 في الامتحان ،
اه صحيح بكره فيه اجتماع امهات بالمدرسة اروح !؟ ولا كيف !؟
المي اجت اليوم وتعبى نص الخزان !!
شفت صاحب الدكانه اخته تجوزت وجوزها طلع بخلفش !!
العدس زاكي !؟
والله اخو جارتنا عمل حادث تصادم !!
بس ما مات الله ستر !!
بحكو بكره رح تشتي الدنيا دفي حالك !!
زاكي العدس !؟
شفت في عصابة بخطفوا الاولاد وبسرقوا اعضائهم !!
حط ابني مع الباص ائمن !! ترا عاملين عروض ب المول !!
العدس زاكي !؟
طبعا شهريار ولا معطيها اي اهتمام بوكل وهو ساكت
كانه على وضعية الصامت بتعصب شهرزاد
وبتبلش تبرطم والحكي المعتاد واللي شهريار حافظيته
اه اه مهو انا بحكي مع حالي !!
حمارة اناا اصلا اللي بألفلك قصص !!
كلبة عندك جايبني بس للشغل امسح واجلي واطبخ !!
خسارة فيك الفجل !! خليني احكي مع حالي !!
شو يقولو عني الناس هبلة صح !؟
انتا هيك بدك يحكو عني !!
عشان تخلص مني !!
وتروح تشوف حالك مع وحدة ثانية !!
احكي ما بدك اياني !! احكي !!
ليش اتجوزتني !؟
ليش !! ما انا كنت ملكة بدار ابوي !!
اعطيني المتأخر وطلقني !!
طلقني يعمي ليش حاويني !؟ طلقني !!
برضه بتكون تحكي مع حالها
لانو شهريار بكون نعس ونام بنص الحكي .
بتنافخ شوي وبتروح بتقيم الاكل وبترن ع ام وصفي
وبتبلش لقلقة وحكي معها وما بخلو حدا من شرهم .

المصدر: منتديات بنات فلسطين - من قسم: النكت والطرائف