|
أنا ولا انتي .. مين بيقعد و مين بيقف ؟ للنقاش الفكرة يا شباب انو من زمان يوم كنا صغار كنا نشوف انو الرجال لما بيكون بباص النقل الجماعي وكان يطلع رجال كبير أو ست كبيرة أو حتى صبية مالون محل كان يوقف ويقعدهم الآن اللي عم يصير كببر السن بعدو مقدّر أما اذا طلعت امرأة أو صبية فالفكرة اختلفت شوي ..كيف؟ صار يبقى الشب قاعد وتارك الصبية واقفة حتى لو كان واضح انزعاجها .............. شو تفسير هالشي؟ هل الرجل ينظر إلى المرأة بعين المساواة التي تطلبها ويريد أن يتساوى معها حتى في هكذا أمور؟؟!! أم أنه لا يرى في نفسه القدرة على تحمل الوقوف ؟؟ وهذه مشكلة حقيقية تدل على خلو مجتمعنا من الرجال. أم هل هو تأثرنا بالغرب بلغ هذه الدرجة ؟؟ وهل ترى المرأة أن من حقها الجلوس مكانك بداعي الضعف ام بما انه هي صارت ند لند الك في كل شي حتى في الوظائف تتحمل وتضل واقفه وليش بتكون قاعد قدام في تاكسي بحكولك حط الصبيه مكانك وتعال ورا هل النخوه ما زالت موجوده ام انعدمت تساؤلات عديدة لا يمكن لشخص واحد جمعها فهل من مشاركات لبلورة الفكرة |
اممم انآ بشوف انه المسآوآة م الها علآقة بالموضوع هون ما خص ازا انت بدك تنآدي بالمساواة معناتو تخلي صبية وآقفة او تققوم وتقعدهآ مكآنك هون الشغلة بترجع للزوق لو عندك زوق ومش حآبب تشوف انه في صبية واقفة وانت قاعد ف بتقوم وبتقعدها مكانك بس برأيي مو حلو نعرض حالنآ لهيك موقف المفروض الشخص قبل ما يطلع للباص او التكسي يشوف ازا اله مقعد يطلع ما اله يستنى بآص او تكسي تآني لحتى ما يحط حاله بهيك موقف مشكور للنقاش مؤيد ما ننحرم |
شو ماننحرم وين رايحه ما خلصنا ههههههههه @ميماآ طيب لو اجيتي لتاكسي وفي 3 شباب واحد قدام وتنين ورا بتقعدي مع الشباب ورا ولا بتطلبي من الشب الي قدام يقعدك مكانه هاي كمان مشكله بدها حل |
هههههه طيب لا هآد ولا هآد ما بحط حالي بموقف اني اقعد جنب شباب اساسا ما برتآح ولا بحب اقعد جنب الشوفير ههههه ما بطلع بهيك تاكسي بستنى التآكسي الي وراه هههههههه بتعرف مؤيد ما بتعرض لهيك مواقف لانه في حدآ يجيبني ويوديني واغلب مشاويري بالسيارة ولو اضطريت بستخدم بآص عنآ بالقدس البآصآت متوفرة اكتر من التكآسي لهيك الموضوع مريح نوعا ما من هيك احراجات |
يمكن هالشيء مش موجود عنا بس بالغالب انا لما بكون راكب تاكسي قدام يعني جمب الشوفير ويكون بالكرسي الخلفي شابين قاعدين وتيجي بنت بدها تركب انا لحالي بنزل من قدام وبقعدها مكاني والمفروض الكل يتصرف متل هيك ويعتبر البنت متل أخته والي ما بقبله لاخته ما يقبله لبنات الناس |
قصي بس مآ فهمت شو الشي الي مو موجود عندكم ! |
الباصات يعني احنا غالباً بنركب بالسيارات والباصات للرحلات والأفراح هادا بس الي لفت انتباهك ما لفت انتباهك زوقي مثلاً :69: |
ههههههههههههههههههههه له له معقول انت منبع الزوق كله ي قصي بس استغربت انه ما عندكم باصات وتكاسي وكأنه هالقضية غريبة عليك ههههه |
تسلمي ايوة هيك انعدلي ولك عنا باصات وعنا طايرات ابابيل واكيد شفتهيم وقت الحرب وهما بحلقو بوسط تل ابيب بس قصدي ما بنستخدم الباصات الا بالرحلات والمناسبات ومعظم مشاورينا بنقضيها بالسيارات |
ههههههه اي خلص فهمت |
احنا عندنا الباص بيكون فيه من 1400 الى1600فرد وكل فرد بيكون جايب من بيته انبوبة اكسجين صغيرة ليعرف يتنفس وتحمد ربك لو نزلت بمحفظتك او بملابسك اصلاً ههه الشباب عندنا لو متربى كويس فبيقوم للست الكبيرة فى العمر فقط المواصلات عندنا خصوصاً بوسط البلد كفيلة انها تكرهك فى نفسك وفى الدنيا معاناه يومية بالذات فى ايام الدراسة ابقى تعالى عندنا زيارة يا مؤيد وبوعدك ما هتكررها تانى |
بصراحة ما صارت معي هالشغلة انو حد يخليني واقفة بالباص الا يقعدوني ويحترموني الشباب بهالشي ربنا الله مزوءين بجد وما عمري ضليت واقفة اصلا لانو ازا طلعت وما لقيت مكان اقعد فيه ف بفضل انزل ولا ادفع اجار الكرسي واوقف ههههه وبالنسبة للتكسي انا ما بحب اقعد جمب الشوفير بحس الكل برة بطلع عليي هههه بعرفش ليش ولو كان ورا شبين وانا جيت اقعد جمبهم بقعد المهم ما اقعد قدام بحس ورا اأمن مرة حكالي شوفير النا انو الوحدة ازا قعدت جمبو احسن ال ليش لانو في مسافة بينو وبينها وما بكون احراج يعني اما لو قعدت ورا جمب شب ف بتكون القعدة فيها احراج وضيق اكتر ويلزو اكتر خاصة ازا كان الشب او الرجال مليان هههه وفي شباب بياخدو راحتهم بالقعدة وفي حرام ببعدو لناخد راحتنا احنا يعني في ناس مزوءة وفي ناس مزعجة بجد بصراحة ما عمرها صارت انو شب ينزل من جمب الشوفير واقعد محلو مش عارفة من وين جبت هاد الحكي يا مؤيد هاد اللي بصير معي انا دايما حكيتو وما في من اللي قلتو عندي بصراحة |
بالنسبة للبآصآت متل مآ ذكر قصي استخدآمهآ للمنآسبآت متل اعرآس و هكذآ الباصات بالقدس بسس الآ ازآ طلعننآ برآ الخليل برضوو اللي بَطلع فيو هو بآص بيت لحم و الله وكيلك بكون من اول النآس فيه ههههههه يعني في الي كرسي مختصر الموضوع الشبآب اذوآق انو يحترم نفسو و يقعد البنت الوآقفة او يتركهآ وآقفة قدآموو بالنسبة للتكسي من زمآآن البنت بتقعد جنب الشوفير ازآ موجود 3 شبآب و مجتمعنآ تعود على هآد الشي صآرت معي اكتر من مرةة الشب ينزل و اقعد مكآنوو بكل بسآطة مرة كآن اخي معي ركبت قدآم و هو جنب الشبآب ورآ بهيك بكون مرتآحة انآ و محدش بقرب علي بحجة منحدر الطريق ( الكوربة ) زمآن كآنت الشغلة منتقدة نشوف بنت جنب الشوفير بس هالوقت ككل شي تغير و عقولنآ وعيت و بنظري القعدة جنب الشفير احسن من تكون جنب شب غريب مآ بنعرف نيتو تحيآتي |
اكيد شفت كل الردود وهذا التّصرّف يجب ان يكون بداعي الإنسانيّة ما اظن في اختلاف كبير بين الجميع وشفت من ردودكم انه الشباب فيهم خير لسا حابب اضيف شي انه البنت ما تستغل ضعفها لما تشوف الباص ملان لا تطلع وتحرج حالها لما تشوف التاكسي فيه شباب تنتظر الي بعده لانه ثبت الي بالدليل القاطع انه ما في مساواه 100 % وفي فرق كبير بين قوه الرجل والمراه كما يوجد فرق بين حنان المراه والرجل ولازم نراعي ضعف المراه وتكوينها وخجلها رغم كل شي هي اختنا وامنا وبنتنا يمكن في الجامعات بختلف الامر كون البنت والشب بنفس مستوى الفكر و ليس الاحترام فقط لأنّ احترامنا للمرأة يجب أن يكون أكبر و أشمل و ليس أن أدّعي الاحترام باجلاسها في مقعدي بل في أن أساويها بالرجل بالحقوق و الكرامة |
لمن يتعلق الموضوع بالختياريه وبالكبار بالعمر كلنا لازم نقوم ونقعدون محلنا، انا شخصيا هيك بعمل لمن اطلع فالباص، اما لمن يتعلق بالشبيبه اللي من جيلي ومن جيلك، ع سبيل المثال، كتير مرات طلعت فيها فالباص ومكنتش الاقي محل اضل واقفه، بس كانوا بعض الشباب يقومولي لأقعد محلون، وكنت اشكرون، بس مش كل مره كنت اطلع فالباص كان يصير هيك، لإنه بكل بساطه مش كل شب ممكن يفكر بهالطريقه، ومش كل شب عندو نظره ! في ناس كتير بيهمها نفسها وراحتها اولا بعدين راحة الناس، بعتقد هذا من حق الإنسان، بس انا شخصيا بقول لازم الإنسان بهالمواقف يكون ذوق واخلاق واصيل ومن حالو يحترم الختياريه قبل ما يقوم للصغار بالعمر، إلا بحالات معينه ومختلفه لازم يكون فيها احترام للشبيبه وللصغار بالعمر وخصوصا للبنات. هذا الاحترام انا بسميه تصرف إنساني، والثقافه الإنسانيه الإنسان بيكتسبها من بيت اهلو ومن بيئتو اللي بكون عايش فيها، وهذا يعني مش كل إنسان عايش بمثل هالبيئه ومش كل إنسان بيتعلم الإنسانيه من اهله. وملاحظه صغيري، انا اعتبرتك عم تحكي عن الباص لإني بطلعش بمونيوت وتكسيات، اغلب مشاويري فالباصات. شكرا مؤيد عالنقاش، موضوع مميز لإنه ولا مره حكينا فيه من قبل. |
اقتباس:
عارف رح تكون فكرتك مختلفه عن البقيه يمكن في غزه ما في باصات كلها سيارات عنا في نابلس لانها مدينه كبيره لازم كل منطقه الها باص او تنين لهيك حبيت اطرح النقاش حكيتي كلمه عجبتني وانا حكيتها من ضمن تعليقاتي السابقه الشغله انسانيه اكتر من انها احترام مو معقول اكون قاعد في باص واشوف بنت تتمرجح يمين وشمال واضل قاعد مكاني هون النخوه لازم تتحرك ومتل ما حكى قصي نتخيل هالبنت اختي او بنتي او امي مهما صار عنا تطور ومساواه وما بعرف شو بضل في عنا شي اسمه زوء شكرا لاضافتك خيتي |
| الساعة الآن 09:36 PM |
Powered by vBulletin® Version 3.8.7
Copyright ©2000 - 2025, vBulletin Solutions, Inc.
Search Engine Optimization by vBSEO ©2011, Crawlability, Inc.
HêĽм √ 3.1 BY: ! ωαнαм ! © 2010
new notificatio by 9adq_ala7sas
User Alert System provided by
Advanced User Tagging (Lite) -
vBulletin Mods & Addons Copyright © 2025 DragonByte Technologies Ltd. Runs best on HiVelocity Hosting.