حياة وعايشينها (١)

(١) , حياة , وعايشينها

كنت أشوفه لعمي وضعه كثير منيح وبعطي غيرنا كثير؛ بس احنا ولاد اخوه شايفنا مش لاقيين ناكل ولا متعرف علينا


كنت اضل اسأل ايوي ، يابا بما انك وضعك صعب ما تطلب من اخوك، يقلي ابوي لا ، الله لا يعيزنة لحدا ...


لما كبر اخوي ونجح بالتوجيهي وبدنا ندخله الجامعة، كان محتاج يندفع قسطه وابوي وضعه صعب و كرامته ما سمحتله يطلب من عمي، بس انا كنت الكبير، رحت اتصلت على عمي حكتله وضعنا صعب، يا ريت لو تساعدنا شوي


ما بنساها قالي مش ضروري يتعلم نزلوا يشتغل معك ومع ابوك !
بس يا عمي اخوي هاد شاطر وجاب بال90 ...
قلي بردلك خبر .... وغاب وما بين ... ما رجع اتصل ، ضليت مهموم طول الفترة، انا بعرف اخوي نفسه يتعلم، وصار همي اشتغل لحتى اجيب زيادة بس عالفاضي ..


كنت قاعد مع صحابي، وسمعت واحد بحكي انه في ابن حلال بتبرع لطلاب الجامعات، وبمدحوا في ...


حكتله امانة احسب حساب اخوي، الشب ما خيبلي طلب؛ واخد من الميزانية تاعت التبرعات واعطاني ، كان بدو يحكيلي ادعي للي تبرع بس انا رحت بسرعة وقلتله برجعلك ...


ركضت عالدار يابا ، انحلت مشكلة اخوي ، هاي ابن حلال اتبرعله بالقسط، اخوي صار ينط من الفرحة وامي تزغرت !


بفتح عالفيسبوك ببعت لصاحبي الله يجزي كل الخير لي تبرع، ما قلتلي بعرفه انا؟
قلي صاحبي انا بعرفوش للزلمة بس بخليك تحكي مع الشب لي بعتلي المساعدات ...


رحت احكي معه، بعتله، رد علي الشب بالاسم الي تبرع، قلي نزل بوست شكر لأله !
وقفت عند الاسم كثير ، قريته مرة ومرتين وثلاث


عند الرابعة كان نفسي اكسر الموبايل ...
هاد عمي ما غيره؟ الي الله منعم علي ؛ وطلبت منه وكسر بخاطري ...
متبرع ب 20 قسط ل 20 طالب جامعي !
بلعت الغصة، كان نفسي ارمي المصاري بوجهه، قديشه منافق ورياء كل حياته، احنا القريبين ما ساعدنا بس للغرباء وعشان يبين كريم اعطاهم .!
اتصلت علي ةقلتله الله يباركلك ولا يحيجنا لالك قسط اخوي برجعلك!
انصدم قلي شو؟
قلتله التبرعات الي وزعتهم وصلنا منهم!.... وشكرا يا عمييي وسكرت الخط


فات اخوي الجامعة، والحمد لله تفوق باول فصل، وحصل على منحة ، وضل بس مصروفه الجامعي، واول ما خلص طلعتله منحة عاوروبا ، ليكمل ماستر، وقرايبنا ما تدخلوا الا يخوفوا ابوي علي ويقضوها يحكوا هناك بلاد صياعة وهمل ، ويراقبوا حياته لما سافر ،وهناك اشتغل شغل منيح كتير ،


وصار وضعه ممتاز ويبعتلنا،
واول شي عملو حول لعمي المصاري ، عمي استصغر حاله كثير ، صحيح عمي ما انكسر وضل وضعه غني، بس ولله صار يحترمنا ، ويتصل يسأل على اخوي، لأنه معظم البضاعة بجيبها من هناك !ولما صرنا اغنيا صاروا كل العيلة بحبونا وبزورونا وبتفقدونا


واخوي ابن اصل معمروش قله لا !


انا الي نفسي افهمه ، ليش معظم القرايب مع الغرباء مناح ومع الي بقربولهم ولا فيهم خير، ولا هي الشغلة مظاهر ورياء وبس !
وانا عارف انها الدنيا حتلف وتدور وترجعلوا الحاجة الي احتجناها اله ... بس احنا ما رح نقصر معه


احسنوا للقريب قبل الغريب


بقلم /



هديل قاسم

المصدر: منتديات بنات فلسطين - من قسم: قصص أدبية , روايات , حكايات , تاريخ الأدب والأدباء