منتديات بنات فلسطين - قصه اليوم ‏نايم_والبحر

- أنا من الناس الي بتخاف تنام بالباص :/
لإنو مهما كانت المسافة بعيدة ، بضل عندي فوبيا من أشيا كتير !
فوبيا إنو يروح علي المكان الي نازلة فيه ، فوبيا إنو تلفوني ينسرق ، فوبيا إنو حدا يكون بتأمل وجهي ونا نايمة ،
فوبيا إني يخطفني معجب من اول لمحة ! 😰
بس بستغرب كيف كتير ناس ما بفرق معهم اشي ،
و بنامو بالباص و ممكن يشخرو او يعبطو الي جنبهم عادي ! 😳
أنا عمري ما عملتها ، بس اليوم ،
طلعت ع دوامي مش نايمة غير ساعة بس بالزبط !!
و لما إجا آخر الدوام ، كنت شايفة كل الناس روسهم مخدات !
كنت ماشية بين الباصات زي واحد عامل عملية و هارب من المستشفى و هو لسا تحت أثر التخدير !
عيوني مسكرات و بتمايل يمين شمال و فاتحة ايدي و بمشي بسرعة و بتعرقل !
و مش عارفة استوعب لسا أي باص اركب ، سمعت واحد واقف جمب باص بنادي طبربور ماركا زرقا ،
اول ما لمحت كلمة طبربور رميت حالي عالباب رمي ، شايفين الدرجتين الي بكونو عباب الباص ،
تسلقتهم تسلق ونا بزحف ، و تشعبطت ع أول كرسي ورا الشوفير ! فش فيني حيل !
نص غافية ! النص التاني سايح من الشوب ! وصلت الكرسي ونا ماسحة ببلوزتي شحبار كنادر نص أفراد المملكة !
مرقت أول عشر دقايق ! وحنا لسا بنفس المكان الي ركبت منو !
أزمة رهيبة ! شوب ساحق ! و فوق هيك الباص مشغل شيلة ، من هدول الي بنعسو تاعون طريق جرش !
صرت كل شوي أنقز ألاقي حالي كاينة غافية و راسي واقع ع كتفي !
رحت عبطت شنتتي مع انو فش فيها غير ليرتين و نص ، و علبة عطر خالصة ،
و سندت وجهي ع قزاز الشباك مشان ما يضل يلولح زي راس الكلب الي بحطوه ع تابلو السيارة !
و من الشوب و الحم ، وجهي بلمع ، ملمسو مائي ،
ممكن ازا بتحط إصبعك ع وجهي ، يغوص و يسلم ع جمجمتي ، قد ما أنا سايحة !
المهم الطريق طولت ، صارت نص ساعة و أنا لسا بعيدة عن بيتي ، و أغنية الباص مصرة تنيمني !
بنص الطريق طلع جمبي شب وسيم ، وسيم يعني جميل بامتياز !
واضح انو موظف شركة بس لو الحياة تعطيه فرصة ممكن يصير موديل و يعمل دعايات عطر غالي ع mbc ،
أنا جمبو من السعادة غفيت مبتسمة و حلمت حلم جميييييل ،
انو هاد الشب الوسيم خطفني و عشنا بسلام بحياة خالية من القروض و الديون !
، وقتها كاين هو و كنترول الباص و شب عالواقف صافنين بوجهي ، مو لإنو وجه ملائكي لا !
لإنو وجه مبتسم بالرغم من انو مبتل و بالرغم من ارتجاج القزاز الي مسنود عليه زي الهبلة !
و كانو بتطلعو ببعض و بضحكو علي ! 😷
المهم بدون طول التفاصيل الكندرائية ، صحيت بمجمع الزرقا !
الكنترول صحاني ! ساعة و أنا أقبع وجهي عن القزاز !
حتى علم عليه دائرة من الفاونديشن و شوية جلد من وجهي !
قمت زي المجنونة ادور ع تلفوني ما لقيتو ! و لما سألت الكنترول حكالي ما دخلني !
مش ضروري تنامي و تبتسمي بالباصات ! نامي بدار أهلك !
أنا مو زعلانة ع اشي هلأ غير إنو ليش تحققو مخاوفي التلات !
و الرابعة تاعت الخطيفة ما تحققت ! ليش ما خطفني الوسيم الحقير ؟

واكيد لي عوده بقصه جديده