حبيتهآا ،★

فكرة .. يا ريتك ما جيت .. يا ريتني ما عرفتك ..
يا ريتك تركتني الطفلة اللّي كانت تحب الغزلة و الشوكولا قبل ما تعرفك ..
يا ريتك تركتني الطفلة اللّي كانت تحب تركض تحت المطر و تلعب بالطين و الرّمل ..
يا ريتك تركتني الطفلة اللّي كانت أوقات تروح و تنام ع رجل إمها ..
يا ريتك تركتني الطفلة اللّي كانت همها الوحيد إنو تتعلّم كيف تعمل مناكير لإيدها الشمال ..
و شو التّسريحة اللّي تعملها لمّا تفيق ..
و شو تلبس كنزة أو فستان و شو تلبّق معهن حلق و إسوارة و طوق و بكلات ..
يا ريتك تركتني الطفلة اللّي كانت تزعل وقت حدا ينسى يجبلا الشوكولا ..
يا ريتك تركتني الطفلة اللّي كان حبها الوحيد زياد الرّحباني ..
يا ريتك تركتني الطفلة اللّي كانت حريصة إنها ما توقع بـ قلب حدا ..
ما تتفشكل بـ قلب حدا .. ولا تعشق عيون حدا ..
و يا ريتك ما كنت إنت هـ الحدا ..!
يا ريتني ما عرفتك .. يا ريتني ما حبّيت عيونك ..
يا ريتني ما حبّيت أسلوبك و طبعك ..
و يا ريتني ما كبرت و حبّيتك ..
يا ريتو ما تحرّر قلبي من جواتي ، و انكسر جناحو قبل ما يطير لـ عندك ..
صرت لـ قلبي وجع .. بعد ما كنت الدّوا ..
ضلّيت طفلة وقت حبّيتك ..
بس طفلة بعد ما عرفتك .. نسيت طفولتها ، و نسيت كيف بكون الغفى ..
ما عم إحكي هـ الحكي لأنك مو منيح ..!
لا بـ العكس .. لأنك كتير منيح أنا عم إحكي هـ الحكي ..
أنا و إنت ما إلنا حظ مع بعض ..
أنا و إنت متل اللّي عم يطلعو ع جبل ..!
و عرفانين و متأكدين إنو في حدا رح يجي و يدفشن لـ يوقعو سوا ..!
ع أساس الدّنيا رح تجي و تضحكلنا بـ هـ الموضوع مثلا ..؟!
بس بتعرف .. كل ما بفتح ع صورتك .. بدعيلك من جوا قلبي ..
الله يبعتلك وحدة بتستاهلك .. و تحبّك ربع اللّي حبّيتك ياهن بس .. بس الرّبع ..!
مع إنو متأكدة ما رح يحبّك حدا أكتر مني ، طبعا بـ استثناء إمّك ..
الله يعطيك أيام حلوين متل عيونك ..
أكتر شي كان جايي ع بالي شوفو أصلاً هنّ عيونك ..
وشو كنت حابة شوف ضحكتك ..
بس يلا كلو للخير ") ..
هـ الجملة اللّي منكون عم نضحك ع حالنا وقت نقولا ..
و لا تسألني شو بـ النّسبة لـ إلي ..
أنا إلي الله ..
يمكن بـ يوم إتجوز ساعتا رح إدعي إنو الله يبعتلي إبن متلك ..
الدّعاء ممكن يحقق كل شي .. و إنت هيك كنت تقلي ..
يلّا ..
الله كبير .. ")

المصدر: منتديات بنات فلسطين - من قسم: همس القوافي , النثر و الخواطر