منتديات بنات فلسطين - اثنان في قفص النقاش ...

رح ابلش بأسئلتي، رح اركز اكتر اشي ع مواضيع البنات بما انك شب ..

يللي برجع لورا بتطلع ع الماضي وايام زمان بتفاجئ بسبب الفرء الكبير بين حياة اليوم وحياة زمان، مع إنه ايام زمان برضه كان يصير فيها مشاكل كتير، بس مستحيل تكون متل بشاعة مشاكل اليوم، ليه حسب رأيك؟

"الحريه"، ليش الناس فاهمه الحريه غلط؟ بتطلعوا عليها نظره سلبيه؟ وكإنها اشي سلبي او حرام، حسب رايك شو السبب؟ ولو اجاك انسان وطلب منك تشرحله ايش مفهوم الحريه، شو بتجاوبه؟

"ما الحب إلا للحبيب الاول"، لمن تيجي تسأل أي انسان عن الحب، رح يجاوبك بهالجمله، مع إنه اللي منشوفه هو العكس، منلائي الواحد بئدر يحب مره تاني واذا بدو مره ثالثه كمان، طالما بئدر يحب اكتر من مره، لكان ليش الناس بتآمن بهالجمله ع الفاضي؟ اللي مش لازم يآمنوا فيها اصلا؟ تناقض ..

بنت فقدت عذريتها، بس الاشي صار معها غصبن عنها، بس لمن تفتح الموضوع بالمجتمع ئدام الناس رح يئولوا "مستاهله، كان فيها تمنع هالشغله تصير"، ما بيفهموا إنه الاشي صار غصب، وهي بالاصل مخطرش ببالها إنه يصير معها هيك، لإنها من الاساس شريفه وبنت عالم وناس، فبهالحاله بتفكر تعمل عمليه جراحيه لترجع عذريتها، برأيك هل بيحئلها تعمل هالعمليه وتتزوج في حال شب تئدملها لسبب إنه اللي صار معها بالماضي غصبن عنها؟ او إنه تئضي حياتها تنحرم من الحياة الزوجيه وحلم الامومه لسبب "حكي الناس والمجتمع"؟

"غنج ومياعة البنات" بنات بغيروا تصرفاتون وحكياتون وبحكوا بلهجات تانيه لهدف يغروا الشباب او لحتى يلائوا عريس ويتزوجوا، برأيك شو بمنعون يكونوا ع طبيعتون بدون ما يغيروا بلهجتون الاصليه وبدون ما يتصرفوا بدلاعه؟ وانت كشب كيف بتطلع ع هيك بنات؟ بتنبسط؟

ليش الشب لمن يشوف بنت ع ماشيه الموضه، دغري بئول "هاي فلتانه وشاذه" ليه هالنظره السلبيه؟! ليش اغلبيه الناس بحكموا ع البنت من شكلها؟ ما بيخطر ببال الشب انه هالبنت اللي لابسه ع الموضه ممكن تكون اشرف من الف بنت محتشمه؟ ما احنا ع اساس دايما منئول "مش كل البنات واحد" ..

البنات والنسوان بالمجتمع العربي دايما بيعملوا فعاليات وحفلات واجتماعات ومحاضرات عن "مساواه بين الشب والبنت"، إنه البنت بحئلها تكون متل الشب، مع إنه مستحيل يكون مساواه، لإنون ما بيشبهوا بعض، الشب اشي والبنت اشي تاني، برأيك شو سبب كل اهتمام البنات بهالشغلات اللي مفش منها امل؟ وبرأيك هل ممكن يجي يوم ويكون مساواه تامه؟ لإنه فش اشي مستحيل ..

"اشخاص عندون مشاكل معينه، او خلئوا بوضع خاص"، وبالذات الناس اللي عندون مشكله سمع وبلبسوا سماعات في الدان، مش مهم ليش حددت هالمشكله بالذات، بس بدي اعرف إنه ليش الناس بتطلع ع هالاشخاص نظرات شفئه؟ ومرات نظرات سلبيه او استهزاء؟ وكإنه عندون نئص بعئلاتون، مع إنه هالناس ممكن يكون طبيعين اكتر من الناس اللي معندنش مشاكل سمع، وممكن يحئئوا انجازات كبيره اللي الانسان الطبيعي مستحيل يحئئها ..

انا بتمنى تجاوبني بصراحه ع اسئلتي، من زمان كنت حابه اسأل هالاسئله، وشي حدا يجاوبني عليهون،
وبتمنى انك تكون حبيتون كمان، يسعدك خيا :137: ..