بس لحظه ||~ ...

.,





بس لحظه يامهمّلني وناوي في غيابك
دامك اللي ناوي الفرقى بقول اللي بقوله

إنت يعني لا نويت تغيب باقـف عنـد بابـك !
لا وربي تاقف الدنيـا وأنـا تأبـى الرجوله

ما تعودت أتبع المقفي ولو حضـرة جنابك
رح عساها خيرةٍ والدرب لك عرضه وطوله

روح لا جابك مجيب الغيم واترك لي صوابك
جيت حلم ورحت حلمٍ تشبه أحلام الطفوله

ما انت بأول من طعن هالقلب والدرب إنتهى بك
يا ثقل خطواتـك البارح وهالليله عجولـه

باغي الفرقى ! جعل ربي يعجـل في ذهابـك
بايعٍ قلبٍ لك الله كنـت مـا تحلـم تطولـه

من يلومك؟ شايفٍ حالك وفي بدايـة شبابـك
طاغيٍٍ تجرح قلوب الناس تحسبها بطولـه !

بسألك كم واحدٍ قبلي هقى بك واشتقى بك؟
إنت ياللي نظرة عيونك قبل أعرفك خجوله ,

ياكثر ما كانـت ظنونـي دخيـل الله تهابـك
بس أكذبها واقـول أوهـام والقلـب وميولـه

واثـرك اللي تستلـذ إن ذاقـوا العالم عـذابـك
مشكله !! والمشكله هـذي بسيطـه ومحلولـه

كان ما لبستـك الغيـره مثـل لبسـة ثيابـك
قل عوافي .. قل مثل غيره تركته وبسهولـه

واجد اللي مشتهين الوصل والخـط متشابـك
كان لك جوله ترى محاكيك له تسعين جولـه

لا بغيت تغيب فارق لا وربـي مـا درابـك
شاعرٍ يا كثر ما تل القلـوب وصفقـوا لـه

لا هلابك في حضورك .. في غيابك لا هلابك
رح مهف امقيط يوم امقيـط ودنّـه رجولـه

باكر إن ماشفت غيرك جا يعوضني غيابـك
قل حكي شعار ما تفعل ربـع هاللـي تقولـه




,.