لو فلسطين مش محتلة..

دايما كنت اتخيل لو فلسطين مش محتلة كيف رح تكون حياتي، يا ترى رح اكون بنفس الشغف والطموح وهالحب لفلسطين؟ اتخيلت كتير، وبكبسة وحدة على الفيسبوك
خلّيت عشرات الآلاف يتخيلوا ويحلموا معي بفلسطين مش محتلة، ما توقعت هالقد يكون في اقبال عهالجملة، ما توقعت الاقي هالكم الكبير من الأحلام والأوجاع والقصص اللي انحطت عالصفحة، قرأت أحلام من فلسطينية من كل مكان، من المخيمات، من الغربة، من كل فلسطين المحتلة، كلنا توحدنا تحت حلم " لو فلسطين مش محتلة".

لو فلسطين مش محتلة كان ما قضيناها مبحلقين بالأفق الغربي عالطرقات عشان نشوف خيال البحر. لو فلسطين مش محتلة كان 48، 67، 242 مجرد أرقام. لو فلسطين مش محتلة كان ما في لاجئين و لا عنا 60 مخيم فلسطيني في لبنان وسوريا وفلسطين والأردن.. كان ما في ناس أمنية حياتها تشوف وطنها إلي كل العالم بقدروا يفوتوا عليه إلا همه. لو فلسطين مش محتلة كان ما قلنا "انقذوا مخيم اليرموك.. عم بموت من الجوع". لو فلسطين مش محتلة كان ما صارت المجازر ولا حرب المخيمات، ولا صبرا وشاتيلا ولا تل الزعتر ولا دير ياسين، ولا عنا ذكرى مؤلمة نتذكرها كل سنة، ونكتب عنها عالفيسبوك "لن نسامح ولن نغفر..". لو فلسطين مش محتلة كان عنا لون هوية واحد، ولون نمرة السيارة واحد، وحكومة وحدة، وعلم واحد، ولون واحد، مش أحزاب أشكال ألوان. لو فلسطين مش محتلة كان بتسمع بالحسبة: بتلاتة جنيه كيلو البندورة، بخمسة جنيه سمك طازا من عكا، بعشرة جنيه صندوق برتقال يافاوي على كيف كيفك. لو فلسطين مش محتلة كان ما تبهدلناش بالسفر.. وما شفنا اشي اسمو جسر، كل ما بدنا نروح على عمان، وبجوز ما نوصل عمان بالمرة، بنسافر من مطاراتنا، كان عنا طيران فلسطيني وجناحاتو مطرزة، وبنقدم مسخن وجبة بالطيارة. لو فلسطين مش محتلة بتلاقي كراج تكاسي بحيفا بنادي: آخر راكب ع بيروت.. آخر راكب عدمشق.. آخر راكبين عحلب.. وبغزة بتسمع بكراج التكاسي: آخر راكب عالقاهرة.. آخر راكب عأم الرشراش.. آخر راكب عالقدس.. وطبعاُ غير القطار اللي بكون شغال عالخط وعليه أزمة، طبعا لأنو السياحة حتكون مزدهرة جداً في فلسطين. لو فلسطين مش محتلة كان ما بنحكى عن الأصابع المملحة "بيجلا" ولا بنحكي عن الاشارة "رمزور " ولا بنحكي عن اللبن "شمينت" ولا في معبر وحاجز ومحسوم وطريق التفافي ومستوطنات و طريق الـ dco للناس الواصلين. لو فلسطين مش محتلة كان محتارة وين أعيش في يافا ولا حيفا ولا عكا ولا طبريا.. كان ممكن أشتغل بحيفا وأروح بالعطلة عند أهلي عطبريا.. وأدرس ماجستير بيافا بما إنها بلد الثقافة والمعرفة حيكون فيها أحسن الجامعات العربية أكيد.. وبيجي طلاب عليها من كل دول العالم. لو فلسطين مش محتلة كان الحياة أرخص، والسيارات أرخص، والبنزين والاتصالات وكل اشي أرخص، بس بجوز ما يكون في رواتب منيحة، لأنو ما في مؤسسات ان جي اوز تشفق علينا وتدعمنا. لو فلسطين مش محتلة كان عنا مهرجانات ليوم المهرجانات.. مهو إحنا ومحتلين ومش ملحقين مهرجانات. كان حيكون في مهرجان برتقال يافا السنوي، ومهرجان سمك عكّا، ومهرجان طبريا

لو فلسطين مش محتلة كان الصحفية بطلو يشتغلوا والقنوات الاخبارية والجرايد سكرت.. مضلش أخبار.. وكان الشعرا ما بكتبوا شعر إلّا عن الحب.. لو فلسطين مش محتلة كان عملنا أطول صف دبكة بالعالم بمتد عطول الساحل الفلسطيني ودخلنا موسوعة غينيس بما إنوا احنا شعب بنحب ندخل موسوعة غينيس. لو فلسطين مش محتلة كان ما حد معو ميداليات وسناسيل عليها حنظلة، يمكن كان ما عرفنا حنظلة، أو يمكن عرفناه وهو مبسوط لافف وجهو علينا. لو فلسطين مش محتلة كان في مسلسلات فلسطينية في رمضان بتتصور بزقاق القدس أو يافا أو عكا أو صفد، زي باب الحارة. لو فلسطين مش محتلة كان البحر الميت حزين وحيد محدش معبرو إلا أهل الأردن.. هاد إذا عبروه وما إجو عطبريا والساحل الفلسطيني.. طبعا أهلا وسهلا بالجميع بنرحب بكل الدول العربية.. رح نكون أحسن منكم وندخلكم بلا فيزا..

لو فلسطين مش محتلة كان كل المسلمين بيجوا عالأقصى برمضان.. وكل المسيحية بالشرق الأوسط بييجوا يعيدوا في بيت لحم والناصرة ليلة راس السنة.. ويمكن كان اليهود صحاب معنا وبحتفلوا باعيادهم عنا وإحنا بنحتفل معهم.
لو فلسطين مش محتلة كان رحل مدارس الضفة ما كانت على وادي البادان، وحديقة الحيوانات بقلقيلية، واريحا وقصر هشام والتلفريك.. وان طارت عالخليل وبيت لحم، كان رحلنا حتكون عيافا وحيفا وصفد وعكا وبيسان وغزة.. لو فلسطين مش محتلة كان معظمنا ما درس بمناهج أردنية.. وكتاب "بيترا" تبع الانجليزي.. وجلالة الملك والخ..
لو فلسطين مش محتلة كان كتير فلسطينية سمعوا نشيد موطني الصبح كل يوم.. حتى النشيد الوطني طلع حلم لكتير فلسطينية! لو فلسطين مش محتلة كان كتاب تاريخ فلسطين 20 صفحة بس.. وكان طلاب الجامعات متريحين من مساق الدراسات الفلسطينية اللي معقدهم من كتر ما فيه تواريخ وقرارات وتقسيمات وبلاوي زرقا. لو فلسطين مش محتلة كان ابن غزة حب بنت نابلس، وابن القدس اتجوز من بنت جنين، وما في قوانين بتمنع لم شمل عيلة. لو فلسطين مش محتلة كان ما عنا حلم اسمو "تصريح".. حلم الغني والفقير بهالبلد. لو فلسطين مش محتلة كان ما في بكل بيت صورة مبروزة لأسير أو شهيد أو صورة معلقة لخارطة فلسطين بدون تقسيم. لو فلسطين مش محتلة كان وكان وكان.. مش رح الحق أحكي كل الأحلام.. كان كتير أشياء صارت.. وأشياء ما صارت.. ويمكن كان أنا ما اجيت عالحياة، لأنو كان دار جدي ضلوا ببلدهم وما تهجروا عبلد تانية!

المصدر: منتديات بنات فلسطين - من قسم: ะ» فِلِسطِيـטּ وآلقَضِيـةٌ |▪●™