|
في المدرسه .. مسا الخير، سبق وصار موقف فمدرسة الثانويه عنا فالبلد، من كم يوم، وحكتلي اختي لإنها معلمة وبتشتغل فالمدرسه، قبل ما احكي عن الموقف، بحب قول انه النظام عنا بيعملوا امتحان اميريم لصفوف التواسع ما بعرف شو بيحكولوا فالعربي، المهم هذا الامتحان لحتى ينعرف كل طالب شو هيي قدراته، ومن نتائجه بتحدد لأي صف ينقل لإنه الصفوف مقسمه ل 3، عم بحكي عن صفوف التواسع، صف للاقوياء، صف للوسط وصف للضعاف، لحتى لمن يطلع ع الصف العاشر يعرف اي اختصاص يفوت بحسب علاماته ومجهوده فالسنه كلها. في بنت بصف التاسع بما اني عم بحكي عن التواسع، هي مش كل هالقد فعلاماتها ودراستها، وكانت المفروض تروح ع صف الوسط، بس ضلت بصف الشاطرين، اجت عليها المعلمه ردينه اللي من حرفيش معلمة انجليزي، بس بتعلم ف ساجور عنا فالبلد. قلتلا "انتي بتحملي حالك وبتروحي عالصف الوسط". والبنت لمن طلعت من الصف غششت بكى واتصلت لأهلها، واهلها صفوا مع بنتون واجو عالمدرسه وبذات الوقت جابوا المشطرا عالمدرسه يعني الشرطه، وصاروا يحكولها "معلمه حيوانه انتي ومش مستوى"، هددوها ليكرتوها من المدرسه بس قالتلون "انا محدا بينزلني". واكيد صار حكي اكثر من هيك، انا بس حكيت بالمختصر، ما بعرف شو صار آخرتا. سؤالي هل كان الامر محوج لحتى الاهل يجيبوا شرطه عالمدرسه؟ وهل المعلمه حسب رأيك كان طريقتها فالحكي مش عاديه؟ ولا كان لازم تؤمرها لإنه غير هيك يمكن ما كانت رح تفهم البنت؟ والحق على مين؟ وسؤالي الاهم ليش دايما الطالب صعب يتقبل وحتى بستحي من إنو ينحط بصف الوسط او صف الضعاف؟ والطالب لمن تكون قدراته ضعيفه، برأيك هذا بكون اشي رباني يعني ربنا هيك بخلقو؟ ولا بيكون اهمال من الاهل هني اللي بوصلوه لهاي الحاله بإنه ينحط بصف الوسط والضعاف؟ مجرد موقف صار وحبيت احكيه، ومنو بعرف كل واحد فيكوا كيف بيفكر. |
مساء النور سمره انا اول مره بعرف بهالتصنيف قبل اعطيكي رايي بحب احكي ما في شي اسمه فرز الطلاب ذكي ومتوسط وضعيف هاي حركه عنصريه مؤذيه بشكل كبير بالنسبه لسؤالك اول شي في قانون مع اني ذكرت رايي فيه والكل ماشي عليه من حق المعلمه تؤدي واجبها لكن يجب ان تتبع طريقه لائقه وما تجرح بكلامها الطالبه تاخدها على جنب وتحكيلها انتي لازم تروحي المكان الفلاني بعد الحصه مش امام الطلاب كلهم بالنسبه للاهل ما بحقلهم يجيبو الشرطه بهيك امور الا لو كانت البنت حكت شي مش صحيح يعني غلطت عليها عنفتها او اذتها بكلامها غير هيك الشرطه لشغلات تانيه وهون مش مكان للشرطه تتدخل فيه ما بعرف لو قدرت اجاوبك |
اقتباس:
اهلين حبيب، حبيت وجهة نظرك، ومفكرتش فيها من قبل، يمكن هالنظام ماخذين عليه بس متخيلتش بإنه يُعتبر عنصريه، كنت افكر دايما بإنو العنصريه بتكونش غير بين الطوائف، بس الظاهر حتى بهالامور بكون في عنصريه. ويمكن لهالسبب الطالب بكره حالو بصف الثاني والثالث وبكون حابب يكون بصف الشاطرين، لإنه بكون مفكر انو هني اشطر منه، فعلا هالموضوع بعمل مشاكل، كل فتره عم بصير مشاكل فالمدرسه. بالنسبه للشرطه فعلا مش محوج الامر لحتى يجبوهن عالمدرسه، بغض النظر عن طريقة حكي المعلمه، وانه مكنش لازم تحكي قدام كل الصف، بس الله يساعد المعلمين ع الطلاب وع معظم الاهالي، يعني لشو الشرطه فالموضوع؟! شكرا حبيب ع التعليق المقنع والمميز. |
خليني بس احكي شي عن التحيز بتعرفي انه عنا ما في اختلاط في المدارس حتى يصل الطلاب للجامعات وسبب عدم فصلهم انه يكون في تنافس بين الذكور والاناث ولانه صار عندهم وعي وفهم انه البنت ما عادت صغيره ينضحك عليها او حدا يأذيها من هون مننتقل لموضوعك كمان مره لو الذكي لحال والضعيف لحال ايمتى رح يتطورو ويتقدمو الاصل يندمج الجميع في صف واحد والضعيف يتعلم من القوي والوسط يتعلم يصير قوي التنافس بجلب التقدم والتحدي مستغرب جدا من الفصل بهيك امور منيح ما بكرهو الطلاب بعض وبحقدو على بعضن هيك :doh: |
اقتباس:
ما بعرف إذا بالفعل بحقدوا ع بعضون او لاء، انا شخصيا مكنش هيك ع زماني وما بعرف مين اخترع هالنظام الجديد لإنه ع زماني مكنش موجود. كان صفين ع زماني علمي وادبي مش اكتر وانا كنت بصف العلمي رغم انه كنت بعرف بإنه الصف الادبي اهون بكتير، بس للصراحه ما كان ولا اي لغه بينن الصف العلمي والادبي. بس كان في صباحات وسلام مش اكتر. اما بالنسبه للاختلاط مدارسنا من يوم يومها مختلطه ويمكن معروف هالشي بمعظم المدارس عنا بعرب 48 مختلطه. وما بعرف إذا هالشي إلو تأثير كمان. بس لو فكرت فيها شوي، الطالب الضعيف كيف بدو يتقدم بالصف لمن الشاطرين عم بتقدموا بسرعه واكتر من الضعيف؟ بغض النظر عن كل الامور السلبيه اللي بتصير نتيجه هالتحيز. |
بس لو فكرت فيها شوي، الطالب الضعيف كيف بدو يتقدم بالصف لمن الشاطرين عم بتقدموا بسرعه واكتر من الضعيف؟ بغض النظر عن كل الامور السلبيه اللي بتصير نتيجه هالتحيز. هلا لو فرضنا انه المدرسه متل البيت معقول نفصل الاخوه عن بعض الشاطرين بغرفه والضعاف بغرفه؟ هلا بعد الدراسه الاكاديميه ليش في شي اسمه خبره واندماج بالمجتمع انا ما بدي افرض عليكي رأيي ما بصير نفصل الطلاب عن بعض بضلو بصف واحد والامتحانات هي الي بتقرر كل واحد مستواه |
بتذكر صار معي موقف مشابه لهاد الموقف وقتها اعطونا امتحان وانا كان عندي ظروف وما كنت جاهزة ف ما قدمت فيه منيح وقتها نقلوني ع صف الضعاف كتير انحرقت وزعلت وكرهت المدرسه حتى بتذكر المعلمة وقتها شو قلتلي كتير جرحتني .. بس يعني ما جبت لا شرطه ولاشي وضليت بصف الضعاف لحد ما صحيوا ع حالهم وعرفوا انه هالمكان ما بلبقلي وكانو اغلب المعلمات بيقلولي انتي شو جابك عهالصف كتير سيء هاد الشعور وبلأخص لما تجي معلمة وتحتقر هالبنت .. ما حبيت لا تصرف البنت ب انها جابت الشرطه ولا بتصرف المعلمة ومعاملتها لهالبنت |
مؤيد مآ خلآ شي لنحكيه انآ بتفق بكلآموو 100% فعلاً هاد النظآم سيء جداً نفسية الطآلب بتتأثر و بتصير للأسوء بس يكون بصف ضعيف او يشوف حد احسن منوو و فعلاً عنصرية و تمييز انآ معك بإنو في قدرآت لكل شخص و هاي خلقة ربآنية مهمآ حآولتي تحسني فيهاآ ’ الطآلب ما بعمل الا اللي بيقدر عليه عنآ النظآم مختلف و كل صف بيجمع قدرآت مختلفة و لو هالنظآم صآر عنا الكل بعترض عليه الطآقم المدرسي المفروض هم اكثر الناس ثقآفة و وعي كونهم بصنعوآ اجيآل و تصرف المعلمة مش لآيق ابداً في اسآليب كتير بتكون الطف و ارقى بدون احرآج البنت هلأ انآ مش فاهمة كيف الشرطة وآفقو يجو على مشكلة متل هاي هههههه مش محتاجة الشغلة يسعد مسآكِ |
لا تعليق ما في عنا هالشي اول مرة بسمعو منك سمرة انو اي علمي وادبي وهالشي حسب القدرات بفصلوهم لصفين اما انو الاذكيا لحال والضعاف لحال مش حلوة |
احنا عنا ما في شي متل هيك يعني تصنيف الطلاب اما بالنسبة لموضوع الطلبة والمعلمة يمكن المعلمة جرحت الطلبة بكلامها او حكت معها بطريقة مش مناسبة كمان يمكن تصرف الاهل غير مناسب انهم يجيبو الشرطة يعني في طرق احسن من هيك لحل المشكلة اما من ناحية انو هاد الطالب شاطر او ضعيف او متوسط ربنا خلق للجميع عقول فضعف الطالب فهاد سببه اهمال الاهل في البيت كمان الطالب هو نفسه بكون مهمل مشكورة سمرة على الطرح تحياتي الك |
| الساعة الآن 11:43 AM |
Powered by vBulletin® Version 3.8.7
Copyright ©2000 - 2024, vBulletin Solutions, Inc.
Search Engine Optimization by vBSEO ©2011, Crawlability, Inc.
HêĽм √ 3.1 BY: ! ωαнαм ! © 2010
new notificatio by 9adq_ala7sas
User Alert System provided by
Advanced User Tagging (Lite) -
vBulletin Mods & Addons Copyright © 2024 DragonByte Technologies Ltd. Runs best on HiVelocity Hosting.