منتديات بنات فلسطين - اختار عضو واحكي عنو

الحكي هاد كتبته ب 8\11

بحكي عن أحمد ابن عمي الله يرحمه

لك عم تشتي والجو كتير بجنن ، بهيك وقت انت عارف شو بحب اعمل صح ، انت اكتر حدا عارف عاداتي شو بحب شو بكره ، انت وحدك يلي بتفهمني بدون لاحكي ، أنت الي حافظ كل تفاصيلي الصغيرة لهيك وحدك انت يلي حبني كتير يمكن اكتر من حاله ...
ذاكر جنوني وحركاتي الهبلة الي كان الكل يضحك عليها بس انت كنت تعشقها ، ، كنت تقلي أنتِ حدا مختلف عن كل هالعالم ، أنتِ بجد ملاك ونياله يلي راح تحبيه ، كنت تتغزل فيا وفي عيناي على طول ، شو كنت تعصب بس تشوفني ببكي ، وتقلي ولك انتِ ليش بتكبري الامور وتعصب مني وانا عصب عليك وقلك لا تحكي معي ، تروح معصب مني وبعد شوية صغيرة بلاقيك راجع بشي بخليني اضحك من قلبي ، لك انت مش معقول شو ما حكيت عنك عمري ما راح اقدر اوصفك صدقني ، انت حدا همه بس كون انا مبسوطة ، حدا عايش ليقلي بس حاضر ونعم وطلباتك اوامر ، وقت كنت انت معي صدقني عمري ما نمت وانا جواتي وجع ولا حكي مخبئ ، لك انت كنت تاخد مني كل وجعي كل شي بشع وتعطيني كل شي حلو ...
لساتني ذاكرة وقت كان بدي شوكولاته وكانت عم تشتي بشكل مش طبيعي وانت جيب بعز الشتا لتجيبها الي ، هه لك لهلأ بضحك وقت اتذكر لما فتت عنا عالبيت وامي بتقلك لمين هالشغلات وقتها شكلك كان بضحك وانت مرتبك مش عارف شو ترد .. ووقتها انا سمعت حكي مرتب بس شو ضحكنا بعدها ...
متل اليوم كان عيد ميلادك ، ما بتذكر انك مرة احتفلت فيه او انك حبيت تحكي انه عيد ميلادك كأنك كنت خايف من هيك يوم وكل ما سألتك ليه تتهرب من الجواب وكنت عصب منك وازعل .. لك اليوم انت مش هون لأسالك هاد تاني عيد ميلاد يجي وانت مش هون ، اليوم المفروض تكون كملت سته وعشرين سنة من عمرك ، بس الموت سرقك قبل سنة واربع شهور وخمس ايام ، سرقك مني من اهلك ، سرقك من كل حدا حبك ، عارف يلي بوجعني اكتر من موتك انك متت وانت جواتك غصة مني وانت ما بتستاهل هيك شي ، انت بالذات ما بتستاهل مني هيك ، لك والله كنت غبية وقت حكيت الك لا ، ريتك ترجع صدقني راح قلك وانا كمان بحبك ،
لك لو بس تعرف الفراغ يلي بحياتي من بعدك ، لو تعرف شو صار الي بعدك ، لك صرت نام كل ليلة والدموع مغرقة مخدتي ، تعبت وانا افسر للناس ليش انا هيك مزاجيةة ، محدا راح يفهم انك السبب ، انه غيابك من حياتي كسرني وكسر قلبي ، انك لما رحت اخدت روحي ، صرت بدون روح ، وصارت كل ضحكاتي كذابة ، صرت خاف اتعلق بحدا من بعدك ، وصار الحب شي تافه بالنسبة الي ، لك مين متلك انت راح يفهمني ، مين متلك راح يحبني لاني انا !! لك كلهم ما حبوني لحالي متلك ، كلهم جرحوني عكسك ، لك ابويا وامي ما فهموني ولا حبوني متلك انت ، انت استثناء بحياتي ، شي بدفع عمري ليعود يوم وقله انا اسفة وخدني معك ، لك بحكولي الميت بحس فينا ، معقول حاسس في انت ، معقول مانك زعلان ولا مقهور مني !!
اليوم رحت على البحر لحالي ، نفس المكان الي كنت تحب تتجمع فيه مع رفقاتك وتاخدنا عليه وقت تطلع العيلة ، قعدت هناك ساعتين بلا حركة بلا صوت ، لك شفتك قدامي شفت ضحكتك وجهك الي اشتقت اله كتير ، لك بحبكك انا اكتر ما في احكي
اشتقتلك كتير يا انا اكتر ما حدا بهالكون اشتاق لحدا ، لساتها عم تشتي يا انا ، ولساتني من جواتني عم ببكي ع فراقك الي سرقني وغيرني ، ريتني بهداك اليوم ما حكيت الي حكيته ، ريتك كنت معنا وما رحت على البيت ريتني منعتك وما صار الي صار .. وبشو راح تنفع يا ريت خلصت انت رحت وانا انتهيت ، ★