|
روايه وقصه الكف الاسود > بقلم رند محمد http://www.bntpal.com/up/uploads/bnt...4237697571.jpg قصتي بلشت من لما هداك الختم انحط على وراقي الفاضية ومن لما تقرر اسمي بدون كنية وبدون مايرافقو اسم ام او اب حتى بدون ميلاد ، انا وكتار متلي عايشين بسيطرة ناس اختارولنا اسمائنا ومكان نعيش فيه حتى اعمارنا هن يلي اختاروها .. بقولو انو اخدوني ع هداك المكان من بعد ما انحط الختم من مخفر الشرطة ع اوراقي بإني يتيمة او بمعنى اوضح ( لقيطة ) .. 14 سنة مروا و أنا كل يوم عم اتأمل يجي الوقت يلي يطلع فيه عندي عيلة و اخوات و أم و أب متل مابشوف عند باقي الناس .. كل ماكانت مديرة الملجأ تقول اسمي كنت فكر انو رح ادخل ع مكتبا ولاقي امي و ابي اعدين يركدو عليي ويحضنوني .. بس كنت شوف العكس ، كنت روح لاقي يا اما حدا بدو يتبنى ولد ويشوفوني الي بس كمان ما اعجبهن لاني مو صغيرة يا أما كون رايحة لاتبهدل .. _____________ _____________ روان , وداد , لبنى ، و أنا ( تكوين ) مابعرف مين سماني هالاسم الغريب لانو انا وصلت لهون باللفة يادوب عمري شهر وبدون اي دليل عن اسمي او عمري او شي يدل عليي بس ابصر مين اختار هالاسم، لكل وحدة فينا قصة مختلفة عن التانية .. اجتمعنا سوا وصرنا نلعب مع بعض .. انا اكبرهن وعمري 14 ، روان كانت اصغر مني بسنتين تقريباً عمرا 12 و وداد 10 اما لبنى هي اصغر وحدة عمرا 7 سنين .. الست فاطمة هي الأزنة بالملجأ صرلا بتشتغل هون 20 سنة ، هي يلي بتهتم فينا وبأكلنا ونضافتنا ولبسنا وكانت كتير حنونة علينا لدرجة اوقات حب قلا امي كرمال حس بلذة هالكلمة من اكتر حدا حنون عليي .. اما مديرة الملجأ ( الغراب ) .. هيك كنا نسميها لأنو كانت لئيمة كتير ومابتنطاق ، تعاملنا وكأنو نحنا خدم عندا او كأنو اعدين ببيتا ، كل هي المعلمة لذنب نحنا ما ارتكبناه .. مو نحنا يلي اخترنا قدرنا ولا نحنا يلي اخترنا نعيش ايتام ، مانسترجي نفتح تمنا وقت تكون موجودة بسبب ظلما و اهانتا النا .. العم جودت هو حارس الباب يلي بناوب كل الليل كرمال مايفوت علينا حدا غريب يأذينا او نطلع نحنا لبرى بكونو كل الموجودين اطفال .. _____________ (( بعد سنتين )) كنت واقفة ع شباك الغرفة عم اتأمل القمر حاطة إيدي ع البلور يلي مغبش من رذاذ المطر الخفيف ، يمكن الهدوء هاد هو احلا شي بحياتي دائما بحس انو القمر هو الوحيد يلي رح يضل معي طول الليل ويسمعني لساعات طويلة اذا حكيتلو وجعي .. فاتت الست فاطمة ( قربت لعندي بلهفة وسرعة ) : بنتي الله يرضا عليكي نامي بفرشتك وتغطي منيح عم بقولو بالنشرة الجوية الليلة في عاصفة ومطر بلا ماتاخدي برد .. تكوين : بتأمري خالتو ، معلش تغطيني فاطمة : تكرم عينك رميت حالي بتختي و قربت رجليي الصغار لعند صدري و انا عم ابتسم للست فاطمة : خالة ، انت بتحبينا كتير مو فاطمة : اي بنتي بحبكن متل ولادي تكوين : و انا بحبك ، وبتمنى لو عندي ام حنونة متلك وتهتم فيني متلك فاطمة : ياعمري اعتبريني امك ، يييي تأخر الوقت يلله لشوف نامي بكرى عندك مدرسة تكوين : تصبحي على خير .. فاطمة : تلاقي الخير فقنا الصبح بكير فطرنا وبعدين لبسو ليروحو ع المدرسة بس انا ضليت بتختي ، كانت حرارتي مرتفعة وعم اسعل .. ( دخلت الست فاطمة وبلشت ترفع الجلايل وهي عم تقول ) : يلله يابنات رح تتأخرو - رفعت راسي بهدوء وسندت حالي ع التخت و انا عم اسعل .. فاطمة : تكوين بنتي الله يهديكي مبارح قلتلك ماتوقفي ع الشباك بتاخدي برد .. تكوين : ياخالة شو كنت عرفانة انو رح امرض من هالوقفة رفقاتي طلعو ع المدرسة و انا ضليت بالتخت .. المدرسة كانت متعاملة مع الميتم وفي باص فيه انسة بياخدونا من ناح باب الميتم وبرجعوني لناح باب الميتم يعني العم جودت بسلمنا الصبح للباص و بيستلمنا الضهر منو .. سمعت صوت حدا عم يفتح ويسكر بالبواب ويخبط و مشي سريع بالممر .. بعد شوي دخلت رقية خانم ومعها فاطمة ( اتطلعت فيني بزورة وعصبية ) : ليش مارحتي ع مدرستك تكوين : مرضانة كتير رقية خانم : شو مفكرة حالك عايشة ببيت اهلك ، تغيبي ايمتا مابدك وتروحي ايمتا مابدك ، نحنا هون مو امك و ابوكي لنحن عليكي هه ذاتاً يلي زتوكن ارتاحو منكن و رموا الحمل علينا .. هي عم تبهدلني و انا كنت موطية راسي ودموعي عم ينزلو ع خدودي فاطمة : رقية خانم بسـ .. رقية : خلص ماتحكي طلعت من الغرفة وسكرت الباب وراها بقوة .. يمكن كان معها حق بكلاما انو نحنا مو عايشين مع ام و اب يحنو علينا .. يعني المفروض مانرتاح ونعيش تحت رحمة الناس التانيين بسبب الحقد و القسى يلي بقلوبهن .. حطيت ع حالي شال سميك ونزلت ع حديقة الميتم ، اخترت كرسي بعيد شوي عن الضجة و الولاد ، تحت شجرة اعدت عليه و ماكان الي نفس احكي ولا حرف ضليت شي نص ساعة بعدين سمعت صوت طفل عم يبكي وفي معو مرة صبية ، التفتت لعندن كانت المرة جاية و بإيدا الولد و عم تحكي هي و رقية خانم قربت شوي لاسمع شو عم يحكو .. رقية خانم : خلص لاتاكلي هم نحنا هون منعتني بالولاد وكأنهن ولادنا و اكتر الست : انا رح اتركا هون و اترك قلبي معا ، امانة اهتموا فيها انا مجبورة بس رقية خانم : طيب ، فاطمة يافاطمة فاطمة : نعم رقية خانم رقية : خدي البنت من ايد المدام و روحي ، و انتي مدام تفضلي معي توقعيلي ع الاوراق حملت فاطمة البنت يلي كان يادوب عمرا كم شهر و اجت بدا تمشي .. التفتت الست لعندا : ستني ركدت لإيديها مسكت البنت وصارت تضما وتبوسا وتبكي وهي عم تقول سامحيني يابنتي سامحي امك يا قطعة مني .. بعدين الست فاطمة اخدت البنت ومشيت و الام طلعت مع رقية خانم ع المكتب .. كان مشهد مؤثر فعلاً دموعي صارو ينزلو لحالن .. ياترى شو الشي يلي ممكن يجبر الأهل انو يرمو قطعة من روحن بهيك مكان بشع ؟ ليش الأهل ليخلفو من الاساس اذا ماكانو حمل مسؤولية الطفل !؟ ياربي معقول انا كنت هيك وقت امي تركتني !؟ معقول بوستني وضمتني وحنت عليي لٱخر مرة من 16 سنة ؟؟ معقول انا ببال حدا من اهلي ؟ كانت اسئلة عم تنطرح براسي بس بدون اجوبة .. الساعة قريب الضهر رفقاتي رجعوو من المدرسة و اعدنا بغرفتنا حكيتلن يلي صار .. روان : اي وليش زعلانة ؟ تكوين : لك عم قلك عمرا شهور بعدت عن امها روان : خلي كل الولاد يعيشوا متلنا ، ليش هن يكون عندن اهل و ام و اب ونحنا عايشين بالميتم تحت الظلم و القهر تكوين : فظيعة انتي عم تتمني هيك شي دايقة بشاعتو لباقي الولاد روان : اي عم اتمنى .. روان كان عمرا سنة ونص لما اما و ابوها انفصلو عن بعض وبلشت المشاكل بيناتهن ، الام بدا روان و الاب بدو ياها ويوم يتخانقو مشان تنام عند الام ويوم يتخانقو مشان الاب .. بالاخير امها تزوجت ابن خالتا وسافرت معو مامنعرف لوين و ابوها بقولو انو مات بحادث وعيت روان شوي وبعمر السنتين جابتا اما حطتا هون قبل ماتسافر وهاد الشي سبب لروان عقدة وكره وحقد ع كل الاهل و الولاد .. صارت تكره الاهل لانو بنظرها الكل نفس الشي ماحدا بحب ولادو وبيعطف عليهن ، وبنفس الوقت ماتتمنى السعادة للولاد ولا انو يعيشوا بجو اسرة وعيلة .. وقت صار عمرا 6 سنين اجت ع الميتم ست كبيرة كتير عأساس هي ستها لروان وكانت بدا تاخدا ، اجتمعت فيا وحكتلا قصة اهلا وكيف تركوها وليش ، وبس بلشت تجهز الوراق لتطلع ، ماكملت معا وتوفت ستا .. ------------ ( اندئ باب غرفتنا ) .. بعد لحظة دخلت مديرة الملجأ ومعها مرة ورجال ، صارو يتطلعو علينا ويتفحصونا بنظراتون الثاقبة .. بعد لحظات التفحص ، اتطلع الرجال على لبنى وهز براسو ، هون ركدت المرة عليها وضمتا .. للوهلة الاولى توقعنا انو هدول اهلا ، بس بعد شوي عرفنا انو جايين يتبنو طفل وعجبتن لبنى لانها صغيرة عمرا 9 سنين وحلوة وناعمة .. اخدوها وطلعو من الغرفة ، نحنا متعودين ع بعض كيف فينا نفكر انو وحدة تبعد ، كل وحدة كانت عم تخفي خوفا و دموعا تحت كلمة ^ معلش بصرلا عيلة مو متلنا ^ بعد شوي اجت الست فاطمة ، ( قربت لعندا بخوف وتردد وسالتا ) : ليش اخدو لبنى ! الست فاطمة : هدول عيلة وبدن يتبنوها واليوم رح ياخدوا معهن تكوين : لاا كيف ياخدوا الست فاطمة : مشي الحال يابنتي العقد توقعو و الجماعة اتكفلوا فيا وشتغلو بأوراق التبني .. __________ بحكم انو كنت انا اكبر وحدة فيهن كنت اعتني برفقاتي وكأنو اخواتي ولبنى كنت حبا كتير طعميا وغيرلا ولاعبا وهلئ شعوري صعب .. رح تروح لمكان بعيد يمكن بعمرنا ماعد نشوفا .. ويمكن بالصدفة نجتمع فيا بعد سنين .. مين بيعرف !! قربت عليها و انا عم حاول احبس الدمعة بعيني و اكتم صوت الغصة .. ضميتا و قلتلا بصوت مخنوق ( لاتخافي من شي وتذكرينا ) .. ماقدرت اكتم اكتر من هيك نزلو دموعي بقوة تركتا ورحت لغرفتي .. زعلنا كلياتنا ع روحة لبنى وصفينا انا ووداد و روان .. اعمارنا .. انا بنت 16 ، روان 14 ، وداد 12 ____________ يتبع |
قصة بتحكي مأساة من نوع آخر كم قاسية هذه الحياة متابعة معك مؤيد تكوين ياتري ايه هايحصل معها هي وصديقتها بعد مغادرة لبني ؟ |
الجزء_الثاني ( 2 ) الكف الاسود الساعة بحدود 11 بالليل كل الولاد بالميتم نامو بهالوقت .. والمفروض حتى انا كون نايمة بس بحب السهر كل يوم بنطر يجي الليل مشان اعد اتفرج ع القمر و النجوم .. مافي ولا صوت غير صوت عتمة الليل والهدوء .. شباك غرفتنا بطل ع الحديقة والشجر وبعدين الشارع اعدت ع طرف الشباك وانا عم راقب النجوم والقمر وعم دندن بصوت خافت كتير .. فجأة اطلعت ع الحديقة لمحت حدا قاعد ع الكرسي اتحرك وبهالوقت مستحيل يكون في حدا برى .. فتحت باب غرفتي ونزلت بهدوء ع الدرج حتى ماتحس عليي المدام رقية .. حاولت افتح الباب الخارجي للبناء بس كان مسكر ومقفول .. لفيت للباب الخلفي فتحتو وطلعت و انا عم امشي بخوف من الست رقية .. لانو اذا بتعرفني طلعت رح اتعاقب عقاب كبير و انحبس بالقبو يوم كامل و انحرم من الاكل وفوق كل هاد لمدة اسبوع ممنوع حدا يحكي ويمشي معي .. كنت ماشية بهدوء لحد ماوصلت لعند الشجرة و انا عم راقب بس مافي حدا .. ماحسيت من ورايي الا ايد عم تضرب ع كتافي : شوووعم تعملي هون التفتت بخوف : مم س سست فاطمة فاطمة خانم : مابتعرفي انو النزلة ممنوعة شو نزلك ! لو رقية خانم تشوفك رح تعاقبك تكوين : لا مشان الله لاتقليلا .. والله كنت ع الشباك ولمحت حدا هون نزلت شوف مين اتطلعت فيني فاطمة خانم باستغراب وضحكت : طلعي ادامي طلعي لشوف .. ____________ " اليوم التاني " صحيت بكير ع صوت البنت الصغيرة يلي اجت جديد .. كانت عم تبكي بالغرفة التانية يلي مخصصة لهالعمر هاد البنت عم تبكي بصوت قوي وماحدا سامعا ، قمت من تختي ومشيت باتجاه الغرفة التانية فتحت الباب ودخلت كانو حاطينا بسرير وملبسينا افرول زهر ومكشفة عم تبكي الشمس جاية على عيونا الزرق وشعرا يلي عم يبرق متل الشمس .. اول مافتحت الباب صارت تلعب بإيديها وتضحك وتكاغي .. بتسمت وحسيت من جواتي في شي اتحرك قربت ع السرير حملت البنت وضميتا ولاعبتا هيك لحتى نامت وهي حاطة راسا ع صدري .. يمكن حست بالامان و الحنية يلي فقدتا من هالعمر الصغير .. فتحت الباب فاطمة خانوم وهي مستغربة انو لقتني هون وحاملة المى ع ايدي !؟ فاطمة : شو عم تعملي هون تكوين : اجيت ع صوت المى كانت عم تبكي فاطمة : طيب هاتيا لحطا بتختي وروحي يلا قربت ع خدا بستا وبهدوء ناولتا لفاطمة .. طلعت وسكرت الباب و انا حاسة انو تركت بنتي .. و انا ماشية بالممر لبين ما اوصل لغرفتي بمر من جنب غرفة الست رقية .. سمعتا عم تحكي مع حدا وهي اول مرة بحب وقف و اسمع الحديث قربت ع الباب و انا مركزة .. كانت عم تقول : (( اي اي تمام .. عندي تلاتة ونشالله يومين بيجهزو وبتجو بتاخدوهن .. ههههه ولو بدنا خدمة تحرز ، رح احكي مع منى مشان نشوف اذا في شي جديد .. هههه مع السلامة )) .. هي سكرت التلفون من هون و انا بسرعة البرق طلعت ع غرفتي لانو خفت تسمعني ، اعدت ع تختي و انا عم فكر بطريقة لازم جيب المى وخليا تنام عندي بالغرفة مشان دير بالي عليها و اعتني فيا ... انا صافنة وعم فكر ، سمعت صوت وداد وروان من بعيد وهن عم يعيطو ع بعض .. هن بنتين من جيل بعض بيتخانقو كتير ومابيتفقو زيادة . طلعت من غرفتي بسرعة قبل ماتسمعون رقية .. و انا عم اشر ع تمي بمعنى هشش تكوين : اييييي شبك انتي وياها . حابين تتعاقبو ؟ وداد : هيي اخدتلي ربطة الشعر تبعي تكوين : روان اعطيها الربطة وتعي اعطيكي من تبعاتي احلا روان : اي ماشي خديا وداد .. __________ " بعد يومين " كنت متسطحة بتختي و رح اغفا .. وداد و روان عم يرسمو ع دفاترن باب غرفتنا مسكر وهدوء كتير شوي وبينفتح الباب بسرعة .. فاطمة خانم : يابنات قومو لعند المدام رقية بدا ياكن ضروري تكوين : شوفي ؟ شو عاملين فاطمة : مابعرف انتو قلولي شو عاملين حتى بدا ياكن ؟ حكيت براسي و انا عم افتل بالغرفة : معقول لانو حملت المى ؟؟ لا لا انا سكتتا بس ماعملتلا شي .. التفتت لعند وداد وروان : هي اكيد سمعت صواتكن و انتو بتتخانقو وهلأ رح نتعاقب .. فاطمة : يلله يابنات لاتتأخرو نزلو شوفو شوبدا .. نزلنا ونحنا عم نرجف .. لانو عارفين قساوة رقية خانم يا اما رح نتعاقب بدون سبب وتخلينا نجلي جليات الميتم كلو بالمي الباردة وهاد اقل عقاب .. يا اما نمسح الميتم او ننضف غرفتا او ننحبس بالغرفة يوم كامل وننحرم من الأكل .. دقيت الباب تلت دقات و انا مترددة .. رقية : تفضل دخلنا بخطوات هادية : ست رقية شو عاملين نحنا ؟ رقية : لاتخافو مو عقاب هالمرة وداد : لكن ؟ بدك تعاقبينا لانو تخانقنا انا وروان ماهيك .. رقية : خلصنا قلتلكن مو عقاب .. سمعوني شو رح قول في عالم رح يجو بعد ساعة بدون ياخدوكن تعيشوا عندون بتفوتو بكل ادب و انتو موطيين راسكن ع الارض .. تكوين : كيف يعني ياخدونا ؟ اصدك يتبنونا .. تنهدت وهي عم تنفخ وحطت ايديها فوق بعض وبعدت عن الطاولة : تماماً رح يتبنوكن .. ورح تعيشوا احلى عيشة روان : يعني هنن اهلنا الحقيقيين ؟ رقية : هههههه حبيبتي لو اهلكن الحقيقين بدون ياكن مازتوكن هون اصلاً .. اي حدا بيسألكن عن المعاملة هون بتجاوبو انو كتير منيحة ومرتاحين غير هيك يلي بتحكي حرف رح تتعاقب عقاب شديد .. تكوين ، روان ، وداد ( بصوت واحد ) : حاضر .. رقية : ممتاز يلله ع غرفتكن لوقت ناديلكن بتنزلو رجعنا ع غرفتنا و احنا مصدومين .. وداد : كيف يعني رح يتبنونا ؟ تكوين : مابعرف يعني رح ياخدونا لبيوتهن متل ما اخدو لبنى روان : اي ليش لاء منعيش حياة حلوة ع القليلة مع عيلة كنت مترددة انو احكم ع الشي يلي سمعناه من رقية .. شوي فكر انو فعلاً رح يتبنونا ونعيش حياة حلوة وفيا دلال و امان وشوي خاف وفكر انو يمكن ماننبسط او نفترق او ننحبس او مانتعود ع حياة العائلات .. بقيت صفنة وعم فكر لوقت انفتح الباب بجية فاطمة خانم .. فاطمة : تكوين ؟! تكوين .. لك تكوووين تكوين : هاااا اي فاطمة : وين شاردة بنتي الي ساعة بناديلك .. يلله قومو انزلو لعند الست رقية الجماعة وصلوا تكوين : يالله انا خايفة كتير مابدي روح معهون فاطمة : لابنتي نشالله رح تنبسطوا بالعيشة .. يلله انا طالعة عندي شغل طلعت وسكرت الباب وراها ، ئمت من تختي رفعت شعري عن وجهي وناديت روان ووداد ونزلنا سوا ع غرفة رقية .. دقيت الباب ويمكن كانت دقات قلبي مسموعة من كتر الخوف .. استغربت من طريقة رقية يلي استخدمتا معنا قدام الضيوف .. لبقة ولطيفة كأنو نحنا بناتا وقت قالتلنا : تفضلو حبيبات قلبي .. اعدو يا امي ع الكراسي .. اتطلعنا ببعض انا وروان ووداد ونحنا متعجبين من اللطافة يلي طلعت فجأة ع الكرسي يلي مواجهنا كان اعد رجال اصلع وضخم لابس مانطو جوخ اسود وكندرة سودة لامعة ، باينتو رجال على مستوى .. وجنبو صبية مو كبيرة ومو صغيرة لابسة تنورة سودة وكنزة حمرا وفوقا جاكيت رسمي اسود .. عم يتطلعوا فينا ويتأملونا .. بعدين ابتسمو اتطلع الرجال وعطانا نظرة من تحت لفوق وهو عم يشغل السيكار ، ويأشرو بأصبيعو ... اتطلعت فينا الست رقية و اشرتلنا : طلعو لبرى بناتي طلعنا وقفنا جنب الباب ونحنا عم نتطلع ببعض ومو فاهمين شي ، بعد شوي اجت الست فاطمة اخدتنا ع غرفنا وبلشت تفتح الخزاين وتضب اغراضنا وهي عم تمسح دموعا تكوين : خير خالتو فاطمة شوفي ؟ فاطمة : حبيبتي انتو رح تروحو مع هدول الجماعة يلي تحت ، رح تعيشو عيشة حلوة هنيك وتشوفو حياة الرفاهية مابعرف ليش نزلو دموعي بدون ماحس ع حالي .. ____________ يتبع .. |
احداث مثيرة وقصه تروي معاناه من قصص الواقع متابعه معك يسسسلمووو |
قصة بتوجع القلب برضو م اصعب انه الواحد يعيش بلا ام و اب متابعة معك اكيد |
اقتباس:
|
اقتباس:
|
اقتباس:
|
اقتباس:
حياتنا مش هون ولم تبدأ بعد حياتنا الحقيقيه في الجنه ان شاء الله |
الجزء_الثالث ( 3 ) .. طلعنا بسيارة سودة وفخمة ، انا و روان ووداد اعدنا بل كرسي الخلفي والست اعدت قدام والرجال عم يسوق .. كانت هي اول مرة بحياتي بركب بسيارة غير باص المدرسة .. مابعرف ولا اي طريق تاني غير طريق المدرسة ، صرت اتطلع من الشباك و الهوى عم يطير شعري الاسود ع وجهي .. حسيت ولأول مرة اني عايشة ، يمكن نسمات الهوى القوية كانت قادرة تطير من راسي كلشي سيئ عشتو .. وصلنا على بيت فخم كتير ، نزلنا من السيارة ونحنا عم نتطلع بغرابة !! المرة والرجال يلي كانو معنا دخلو ع البيت وبقينا نحنا واقفين بأرضنا برى البيت ونحنا صافنين ، فجأة بيجينا صوت خشن : تعو معي التفتت لورايي و انا ماسكة روان ووداد من ايديهن : ل لوين -- : امشي ورايي " كان رجال طويل عريض و اصلع وحاطت نضارة ولابس طقم رسمي مشي خطوات متوازنة قدامنا " مشينا حولين البيت كان في غرفة معزولة شوي فتنا ع غرفة واسعة وفيا تختين وبرداية وبسس استغربت كتير انو كل هالبيت الفخم والحرس والخدم و اخر شي هي الغرفة ؟! تركنا الشب وطلع لبرى وقفل علينا الباب ، وقت سمعت صوت طقة القفل حسيت حالي طلعت من سجن وفتت لسجن اكبر من يلي قبلو ، داق نفسي وحسيت بخنقة حوالي رقبتي روان : تكوين شو عم يصير !! مو عأساس رح نعيش ليش حبسونا وقفلو الباب تكوين : هسس ولاكلمة رجعت خطوتين و اعدت ع التخت و انا بعدني مصدومة بعد لحظات نفتح الباب ودخلت الست يلي شفناها ، صارت تفتل بالغرفة بخطوات ثابتة وصوت كعب كندرتا عم يطرئ ع الارض .. بلشت تفتح الشبابيك وهي عم تحكي : اومو احكولي اسمائكن " تجلست شوي و قلتلا " : انا تكوين وداد : انا وداد روان : و انا روان المدام : __ تكوين : نحن ليش هون فينا نعرف شو عم يصير المدام : لبسو تيابكن وحملو غراضكن مارح تبقوا هون .. نحنا تركناكن هون بس لبين مانجهز غرفكن رفعت صوتا الناعم وهي عم تقول : ايهم ، رمضان .. دخلو الشبين ووقفو جنبا باستعداد ، اشرتلن بأصبعتا على وداد و روان .. كل واحد فيهن مسك ايد وحدة و اخدا و انا بلشت ارجف و قول : وين وو وين رايحين وين رح تاخدوهن .. وداد وروان صارو يرجفو من الخوف قربت مني المدام وهي متوترة : اهدي وعدي كل وحدة فيكن رح تعيش بغرفة انتي عمرك 16 ووداد 14 موهيك تكوين : اي صح المدام : ممتاز ، اومي معي ع غرفتك نقلونا ع غرف مستقلة وماعد التقينا ببعض ولا نمنا ولا حكينا ولعبنا مع بعض ابدا كل يوم منجتمع بالحديقة لمدة ساعة وحدة وبس .. ------------------- ------------------- بقينا شهر كامل ع هي الحالة عايشين ضمن المجهول ، كل وحدة بغرفتا الخاصة ممنوع نطلع لبرى الا بوقت الاستراحة يلي هن بيعطونا ياها اما باقي الاوقات ممنوع الطلعة .. كنت اعدة بغرفتي وعم اتطلع ع التخت والخزانة والبيرو بقرف وملل : هفففف شو هالعيشة ياربي عمرنا رح يضييع بهي الغرفة .. نفتح الباب ودخلت بنت قالتلي : تكوين ؟ تكوين : اي ! الصبية : تعي معي طلعت وراها و نحنا عم نمشي باتجاه البيت او خليني قول باتجاه القصر ، دخلت لجوى وكأني فتت لعالم تاني .. الدفا و النظافة و الهدوء .. كان الرجال ويلي اخدنا من الميتم اعد ع كرسي هزاز ووجهو ع حديقة الفيلا .. بين اصبيعو في سكار وعم يهز بالكرسي .. وصلنا لجنبو وبدون مايلتفت علينا قلا : روحي انتي وتركيا هون - وقف وصار يلف حوليي : انتي شو عمرك ياتكوين ؟ - تكوين : انا بآخر ال 16 - هيثم بيك : انتي رح تكوني الدرع ، وبنفس الوقت هالدرع اذا خان ، مندعسو .. -اتطلعت و انا مستغربة : ممكن توضح اكتر لاني مافهمت - هيثم بيك : انت رح تشتغلي معنا و اذا بتخونينا عيارك رصاصة (( فهمتي اكتر ولا عيد ؟ )) .. وطيت راسي و انا ماني عرفانة شو احكي - رفع صوتو وهو عم ينادي : ملهم تعا خود تكوين وعطيا التعليمات بعد شوي اجا شب طويل وحنطي عيونو بنيات و الو دقن خفيفة .. ابتسم : امرك هيثم بيك اخدني ع غرفة فاضية كان فيا كرسيين وطاولة - ملهم : عدي اعدت و انا شابكة ايديي ببعض ومتوترة كتير - ملهم : مابتعرفي شو رح تشتغلي هزيتلو براسي بمعنى لاء ملهم : رح تروحي ع بيت حدا بخصنا وتشتغلي عندن بالتنظيف و التعزيل والطبخ يعني خدامه ورح تخدميهن تكوين : بس انا مابعرف شي من هدول وهاد الشغل لوحدة اكبر مني مو الي انا بدي ارجع ع الميتم - ملهم : اول شي توطي صوتك وقت تحكي معي ، تاني شي الميتم انتها ماعد في رجعة : التالت و الاهم : بتتعلمي قاعدة اسما " امرك مطاع " وشو ما امروكي اسيادك بتنفذي ، وانتبهي تجيبي سيرة انو كنتي عايشة بميتم - تكوين : طيب - ملهم : تمك مابينفتح بكلمة ، بتسمعي يلي عم يصير وبتخبرينا فيه و أي معلومة على هيثم بيك بتطلع من تمك عرفي انو عيارك " رصاصة " .. خليكي هون شوي وراجع وصلك ع هداك البيت مشي خطوتين وهو حاطت ايديه بجيابو بعدين التفت لعندي : بالمناسبة البنت الصغيرة يلي بتحبيا اسما المى وقت تغلطي انتي ، اعرفي انو هي حرام تعيش هيك ! فهمتي عليي مو تركني وطلع لبرى ، كان بيقصد انو اي غلط بيطلع مني رح يقتلو هالطفلة المى .. يلي مالا ذنب بشي -------------- -------------- طلعنا بالسيارة و انا فاتحة الشباك وعم اتطلع ع الطريق بكل برود - ملهم : ولا غلط بدي شوف منك ، اهم شي تسمعي الحكي والقصص وتنقليلنا ياها - تكوين : امرك امرك ، بس فيني اعرف ليش انت شايف حالك كل هالئد ؟ بالنهاية مو انت البيك ، البيك هو هيثم - ملهم : فيني اعرف كيف بتحبي تموتي ؟ التهي بحالك ولا تدخلي بغيرك احسنلك .. شرفي انزلي هاد هو البيت اول ماتفوتي بتقولي بعتني ملهم .. وبس نزلت من السيارة ادام بيت كبير ، ملهم راح وبقيت لحالي بالشارع عم اتطلع ع البيت و اتصفنو .. مشيت و انا مترددة وحاسة في دموع بعيوني بس مو راضيين ينزلوو نقرت ع الباب نقرات خفيفة ، بعد شوي فتحتلي ست عمرا بل 50 او اكتر شوي ، كانت اكابر كتير لابسة فستان طويل ورافعة شعراتا و بإيدا في عكاز .. ابتسمتلي : تفضلي بنتي تكوين : م ممرحبا الست : اهلا وسهلا تكوين : انا بعتني ملهم مشان نظف البيت و ابقى عندك الست : اه اي اي اهلا وسهلا مزالك من طرف ملهم معناتا لازم تدللي بالاول .. رتاحي اعدت ع الكنباية و انا متوترة .. الست : من وين جاية انتي تكوين : من البيت ؟ .. لا من الشارع .. امم لا بقصد من من غرفة كنت مستأجرتا ووقت ماعد اشتغلت تركتا ونمت يومين بمدخل بناية الست : اهلك وينون تكوين : مم اهلي ماتو بحادث الست : طيب ، اومي تحممي وغيري تيابك و انا رح حضرلك اكل تكوين : لا لا انا بتحمم وبغير تيابي وبحضر الاكل لحالي لاتخافي عليي تحممت و اكلت بعدين رتبت البيت ونظفتو و اعدت .. الست نوال : تكوين معلش تحضريلي القهوة بعد شوي رح يوصل زوجي وهو بحب يشربا اول مايفوت ع البيت تكوين : اي تكرمي بعد شوي وصل زوجا كان رجال معبي مركزو من اول مادخل للبيت حسيت بالهيبة تبعو ، اعدت ع طرف الكنباية وهو عم يأشر عليي : مين هي الست نوال : هي صبية بعتا ملهم لتنظف البيت و تخدمنا رأفت : ممممم طيب ------------- يتبع .. |
يعني تكوين شكلها راح توقع بمشاكل مع اللي اسمع هيثم بك لان الست نوال وزوجها رأفت شكلهم ناس طيبين والله متشوقه اعرف الأحداث طيب روان ووداد لسه عند هيثم ع وضعهم بليز مؤيد نزل جزء كمان اليوم اواتنين متابعه معك |
يعني تكوين شكلها راح توقع بمشاكل مع اللي اسمع هيثم بك لان الست نوال وزوجها رأفت شكلهم ناس طيبين والله متشوقه اعرف الأحداث طيب روان ووداد لسه عند هيثم ع وضعهم بليز مؤيد نزل جزء كمان اليوم اواتنين متابعه معك |
يا ويلي ع هيك بنت تتحمل هالشي بس شو نعمل بالظروف إللى عاشتا يسسسلمووو متابعة معك |
اقتباس:
اقتباس:
|
الجزء_الرابع ( 4 ) .. صارت الدنيا نص الليل الست نوال وزوجا نامو ، و انا دخلت ع الغرفة يلي اعطوني ياها بالبيت ، اعدت ع التخت و كان بدي نام .. بس سمعت صوت حدا عم ينقرلي ع الشباك ، انتفضت من مكاني بقوة وفتحت الشباك تكوين : سيد ملهم هاد انت ملهم : ولا كلمة ، حكيلي شو صار بالتفصيل تكوين : مافي شي جديد تعرفو عليي و حطوني بغرفة لحالي وعم اشتغل وساعدا ورح بيضلك وشك ملهم : لك ياغبية انا باعتك لهون لتبيضيلي وشي ؟ انا باعتك لهون لتسمعي الحكي وتوصليلي ياه فهمانة تكوين : بلله يعني بدك ياني اتسمع ع خصوصيات غيري لا مستحيل ملهم : تكوين لا تجنيني قلتلك عيارك رصاصة اذا مانفذتي حكيي تكوين : طيب امرك ملهم : يلا فوتي لجوى بلا ماينتبهو عليكي ------------- تاني يوم الصبح فئت من بكير حضرت الفطور ع الطاولة وعملت قهوة للست نوال وزوجا السيد رأفت و رحت ع غرفتون لدق الباب كرمال يفيقو .. سمعتون عم يحكو .. رأفت : تأكدتي من هوية البنت ومين هيه نوال : لك رأفت شبك عم قلك ملهم بعتا اكيد مارح يبعتلنا ناس مو موثوقين رأفت : طيب منشوف دقيت الباب : ست نوال سيد رأفت ، القهوة صارت جاهزة بعد دقايق طلعو من غرفتون .. اعدو معي وشربنا القهوة مع بعض بعدين رأفت بيك راح ع شغلو و ضليت انا و الست نوال تكوين : ست نوال معلش اسألك سؤال !! .. نوال : .. تفضلي تكوين : شو بيشتغل رأفت بيك نوال : هو مسؤول عن الملاجئ بهي المنطقة .. تطلعت فيا وجمدت بنظري : ملاجئ ؟ اصدك الميتم نوال : تماماً ، هو مستلم المياتم ومسؤول عن الجمعيات يلي بتساعد الاطفال الايتام بلعت ريقي و انا مستغربة : مممم " اندئ الباب " قمت فتحت طلع ملهم : اهلين سيد ملهم تفضل ارب عليي بقوة وسكرلي تمي : اصحك تحكي شي فهمتي .. طلع صوت من عند الست نوال : مين ع الباب ياتكوين ؟ ملهم : هاد انا خالتي .. تركني واقفة وفات لعندا .. ضليت واقفة بحيرة " خالتي " فتت ع المطبخ جهزت القهوة وطلعت ضيفت فنجان لملهم وفنجان للست نوال .. ولفيت وجهي بدي ارجع ع المطبخ ملهم : عدي شوي تكوين تكوين : -- اعدت ع كنباية .. ملهم : سمعيني منيح انت من طرفي وبدي منك تبيضيلي وشي مع خالتي نوال فهمانة تكوين : اي اي لاتوصي حريص ملهم بيك كمل فنجان قهوتو وطلع .. كأني ماعم افهم شي كيف ملهم وهي خالتو وبدو ياني اتسمع عليهن مع انو علاقتو فيا منيحة غريب شو القصة .. ما اخدت كتير بالقصة ضليت عايشة عندا وعم اشتغل بل بيت و ابداً ماحسيت بشي غريب بيوم من الايام الست نوال وزوجا طلعو ع سهرة بمطعم وبقيت لحالي بالبيت اعدت ع البرندا و معي فنجان قهوة ، شوي وبحس ع حدا عم يقرب لعندي ، صرت اتطلع حوليي بس مو باين شي لانو عتمة .. بعد هدوء لحظات .. سمعت صوت ملهم : ياغبية تكوين : اي اي رعبتني شو صايرلك ملهم : اخخ يالله عم تشربي قهوة لك فضي هالفرد براسي و ارتاح منك تكوين : لك شو اعمل يعني الست نوال وزوجا مو هون ملهم : لوين راحو ؟ تكوين : قال معزومين ع مطعم مع زملاء رأفت بيك ملهم : ممممم ، روحي صبيلي قهوة تكوين : وين بدك تشربا ملهم : هووون ع البرندا تكوين : بس مارح خليك تفوت عيب لانو مافي حدا طالع ملهم الفرد من خصرو و مسكو بإيدو وهو عم يقول : لااا اليوم المشط مليان ومابعرف براس مين بدو يفضا نسحبت شوي شوي ع المطبخ عملتلو قهوة و رجعت اعدت معو .. ضليت دايرة وجهي عنو وهو عم يتطلع ع حديقة البيت .. تكوين : ملهم بيك انت شو دارس ؟ ملهم : دارس كلية حربية .. تكوين : يعني بتروح ع الحروب ؟ ملهم : يالله شو غبية ، لا انا مقدم بالشرطة .. تكوين : اممممم ملهم : تكوين انتي كيف كنتي عايشة بالميتم تكوين : كنت مبسوطة اكتر من هلأ ملهم : بس هون مانك محبوسة متل هنيك تكوين : ماني محبوسة ، بس عايشة بالمجهول ومابعرف ليش انا هون وشو عم يصير وشو عم بعمل !! ملهم : هلأ لاتعمليلي فيا دراما ، غباء مابدي .. بتتسمعي ع كل شاردة وواردة وخاصة وقت يكون رأفت وبتعرفيلي كلشي عم يصير ومابتخلي حدا يشك فيكي تكوين : معلش اسألك ليش ؟ ملهم : اي معلش تسأليني ليش ، ومعلش جاوبك بس بهالفرد يلي بإيدي .. ابتسملي و دار ضهرو ونط للجنينة بعدين طلع من البيت .. ------------------ ------------------ ملهم كل يوم بيجي لبيت خالته نوال وبيعد وبيحكي وبيتمسخر عليي وبحسسني بغبائي بعدين بمشي ، انا فعلاً بكرهو ولا مرة قدر الشي يلي عم بعملو ولا مرة قال انو ممكن بيوم من الايام خبر الست نوال يلي كانت منيحة معي لابعد حد .. اوقات بحس اني خاينة ، خنت البيت يلي حاويني وعم وصل اخبارو لعالم تانيين .. بعد ماخلصت ترتيب البيت وتركين الاغراض كلا ، اعدت بالصالون و صرت اتفرج من الشباك ع العالم شوي وبينفتح الباب ودخل رأفت بيك و بإيدو في ولد صغير رأفت : نوال وينك ركدت لعند الباب : اهلين رأفت بيييي.... !! اتطلعت و انا مستغربة : مين هالولد رأفت : ناديلي للست نوال بعد شوي اجت نوال : اووووو بيبي لمين هالطفل رأفت غمزا لنوال : ايي اليوم اهلو جابوه ع الجمعية و بكرى بدي اخدو ع الميتم دمعو عيوني : اهلو يلي جابوه ؟ رأفت بيك : اي اهلو تكوين : كيف في اهل بيرموا ابنون هيك ؟ كيف بدو يعيش هاد بهيك مكان كلو ظلم و قسى .. رأفت : هههه شبك تأثرتي وكأنك كنتي عايشة بميتم ومظلومة .. هاد الطفل اهلو منفصلين و امو رح تتزوج و ابوه مسافر مو خرج حدا يهتم فيه بلعت ريقي : هه لا ابدا بس يعني زعلت عليه رأفت : يلله روحي حضريلي غدا ... دخلو هو والست نوال ع غرفتون وصارو يحكو بالهمس صوت مو مسموع ابداً ، انا ماتطمنت ليلي صاير ضليت عم حاول اتسمع عليهن بس ولاشي كان مسموع .. بعد شوي سمعت صوت المفتاح عم يدور بالقفل بعدت بسرعة عن الباب وصرت رتب المخدات تبع الكنبايات وعأساس انو ملتهية .. الست نوال : يعطيكي العافية يابنتي .. بكرى في عزيمة لزملاء رأفت بيك بالشغل ولازم تكوني مرتبة كتير و انيقة .. هلأ رح اتصل بملهم يجي ياخدك ع السوق تشتريلك شوية تياب .. تكوين : اي متل مابدك .. ----------------- يتبع |
ياتري ايه هايحصل ف العزومه دي وملهم ده ليه بيعمل كده مع ان نوال خالته شوقتنا متابعة |
الجزء الخامس / الكف الاسود اتصلت بملهم وبعد شوي اجا ، طلعت انا وياه لجنب السيارة فتحت الباب الخلفي وبدي اطلع .. ملهم : هييييي انسة تكوين انا مو شوفيرك الخاص لتعدي ورا و تتخنمي ، شرفي عدي ادام تكوين : اتطمن مانك شوفيري بس مابدي اعد ادام مشان ما ازعجك .. طلعت ادامو وهو عم يسوق ، كان ضهرو ثابت ع الكرسي و مسنود وشعراتو عم يطيرو من الهوى .. اتطلعت فيه باشمئزاز و انا عم قول بصوت خافت : ياحوينة هيك شخصية بهيك بني ادم ملهم : شو التيلي حبيبتي ؟ كأني سمعت منك حروف حلوة عيديا تكوين : عم قول شوب يمكن الحرارة 50 وفوق ملهم : مممم غريب الدنيا شتا و الغريب اكتر انو الجو ماعندو شخصية مو ؟ .. فتلت وجهي و انا عم اتطلع ع الشارع ومطنشتو .. ملهم : يلله شرفي وصلنا ، انا اخرتي اخد نسوان وجيب نسوان وروح ع الاسواق بس يلا .. لك اومي نزلي شو صرلك لزقتي تكوين : لك شبك عم تصرخ عليي لعما ملهم : لمين هي العما ؟ شو مفكرة حالك انتي وليه مين انتي لتحاكيني هيك ؟ تكوين : شيل ايدك عني تركتو ودخلت ع المحل ، صرت اتطلع يمين ويسار ع التياب المعلقة ولا بحياتي تخيلت حالي فوت لمحل البسة و اشتري شي .. اجت عيني ع فستان زهر عليه وردات : يالله شو حلو ملهم بدي هاد ملهم : ياعيني ملهم الشوفير عند حضرتك ؟ سيد ملهم تكوين : اوك سيد ملهم .. " ناديت للصبية " : اذا بتريدي فرجيه هاد الفستان لملهم حط ايدو ع راسو : اووفف من الغباء يالله .. ضليت ساعة و انا محتارة بين الفستان الزهري و الفستان الازرق .. و انا عم فكر اي واحد اخد ملهم : يلله ياتكوين خلصيني تكوين : هفففف بدي اخد شي مرتب ملهم : تكوين حاج ترفعي صوتك عليي تكوين : اي فهمنا شو مفكر حالك انت .. خلص رح اخد الزهري ، لا لا الازرق .. خلص ع الاكيد بدي الزهر احلا بكتير ، بس الازرق بيلبق لبشرتي اكتر .. ملهم : معلم ضبلي التنين مسك الكيس وحاسب وطلع ع السيارة شغلا طلعت ادامو و انا عم اتشكرو انو جبلي التنين .. ملهم : خلص حاج تتشكريني فهمي عليي !! اليوم بتتسمعي ع كلشي بدو يصير بتضلي واقفة بيناتون وبتسمعيلي كل الحكي .. تكوين : لك مابصير هي خصوصيات انت شو بتستفاد ملهم : لك تكوين حاج تجادليني والله ماعد اتحملك يا بتنفذي يلي عم بحكي عنو يا اما بموتك مابتركك عايشة تكوين : لك شو انا عبدة عند يلي خلفوووك لسا بتصرخ عليي وبتقلل ادب معي مين انت ؟ مين لتحكي معي هيك شو مفكر حالك خلص خلص مليت انا تعبت مادهلني فيك صف السيارة ونزلني هون ماعد بدي روح لمكان ولا بدي ارجع لعند نوال .. نزلني هون والله لاحكيلا كلشي عم تخليني اعملو هي ماغلطت معي بحياتا وبعاملوني بالمنيح بس انا عم خونن و اخدم يلي عم يغلط معي ويقلل من احترامي .. صف السيارة ع جنب ووطا راسو وهو عم يقلي : انا اسف .. انا عم موت ، انتي كنتي رح تساعديني شوي .. خلص روحي ماعد رح كفي خطتي بس بتمنى ماتحكي لنوال شي عن يلي كنتي تعمليه ... اجيت بدي افتح الباب و انزل ، بس يلي خلاني التفت عليع هو صوت الشهقة يلي طلعت منو .. التفتت كانو دموعو ع خدودو .. تكوين : ملهم شبك ؟ عم تبكي .. ملهم : انا ماني حجر عم ابكي اييي تكوين : حكيلي ليش عم تبكي شوفي ملهم : ابي مات بحادث سيارة وقت كان عمري 7 شهور و امي هبت عليها انينة الغاز وماتت حرق و انا عمري سنة وشهرين .. اخدتني خالتي نوال هي وجوزا ، ع الميتم يلي كنتي فيه .. ضليت هنيك لعمر الاربع سنين كانو يزوروني و رقية مديرة الملجأ كانت تعرف بقصتون .. دبرلتلن رجال غني .. باعوني لهيثم بيك و قبضوا حقي مصاري .. تاجرو فيني وطبعا رقية اخدت نسبة منيحة .. هيثم بيك كان ادمي كتير رباني وعاملني متل ابنو وقت كبرت عرفت القصة .. متل ماباعوني الي .. باعوكي الك كمان ورقية قبضت حقك انتي وروان ووداد مصاري صارو خالتي وجوزا و رقية عصابة يتاجرو بالولاد .. مو بس مع هيثم ، مع كل الاغنياء شي من الولاد يتحول لخدم وشي لبيوت دعارة وشي للسرقة والاحتيال تكوين : لا لا ماعم سدئ صرت ابكي معو .. بعدين حطيت ايدي ع وشو ومسحتلو دموعو : ملهم لاتبكي انت ضابط لازم تكون قوي و انا رح ساعدك ووقف معك بكل خطوة ملهم : شكراً الك ، انا اسف ع كلشي -------------- -------------- رجعت ع البيت بلشت ضبضب و جهز العشا و الطاولة و غراض السهرة كلن .. الست نوال ساعدتني شوي ، بعدين خلصنا انا دخلت ع غرفتي لالبس وسمعت صوت ملهم بالصالون .. لبست الفستان الزهري وفردت شعراتي الطوال حطيت حلقات و شوية حمرا .. طلعت من الغرفة كان اعد مواجهي ملهم وقت شافني طلعت من الغرفة قام وقف وقرب لعندي : لابقلك الفستان تكوين : شكراً ملهم : وشعراتك حلوين تكوين : شكراً ملهم : و الحلقات حلوين .. تكوين : شكراً ملهم : يالله ع الغبااااء يالله تكوين : شكراً .. شرف ساعدني بنقل الاكل ع الطاولة وبعدين روح مشان ماتنزع الخطة .. بلشو يجو الضيوف ، كلن رجال اعمال وناس من طبقة راقية هالشي كان مرسوم ع قطع التياب يلي لابسينا و على مشيتون وضحكتون وحكيهن .. دخلو ع البيت وكل واحد فيهن اعد ولف رجل ع رجل و السيكار بإيدو ماكان معهن غير ست وحدة ، سلمت عليي بطراف ايديها الناعمين وبعدين قربت لعند الست نوال وسلمت عليها .. وشا كان مارر عليي وشايفتا قبل حطيت العشا ع الطاولة ووقفت ع جنب ، قربو كلهن وصارو ياكلو بالشوكة مابعرف كيف كان الاكل عم ينزل ع قلبون وهنن عم يقطعو قطعة صغيرة بالسكين وياكلوا بالشوكة .. ابتسمت ابتسامة استهزاء و درت و رحت للمطبخ .. ضليت واقفة جوا المطبخ بس كنت شايفتون من الشباك يلي بطل ع الصالون .. كل تركيزي ع وجه هديك المرة متأكدة انو شايفتا .. بعد شوي سمعت الست نوال عم تقول : ست منى كلي مابصير هيك هون التفتت بسرعة وتزكرت حكي رقية وقت كانت عم تحكي ع التلفون وقالت اسم منى .. رجعت دققت بملامحا بعد وقت طويل كتشفت انو هي نفسا الست يلي جابت المى ع الميتم .. اي هي هيه كانت عم تبكي وتضما و اعطتا لرقية وهي عم تبكي ؟ معقول هاد تمثيل . ضليت ساكتة وعم راقب كلشي .. خلصو عشاهن والتفتو كل مين يحكي عن الشركات والاموال يلي عندو و كأنو عم يتفاخرو .. شلت الاكل وضيفت الشاي .. رأفت بيك هو ورجال تاني كانو اعدين ع التراث وعم يحكو بصوت خافت ، وقت جيت ضيفون الشاي مانتبهولي .. سمعت جزء من حديثون .. رأفت : هيك مابيمشي الحال بدنا عملاء اكتر وناس مليانين ضياء : يارأفت صعب نوثق بحدا دغري .. لاتنسا اي نقطة بتنكشف منروح فيا رأفت : طيب طيب .. بس لازم عن قريب نلاقي لانو في ولاد كتير بالميتم و الست رقية كل فترة بتحاكيني ضياء : شو مشان الصفقة ؟ رأفت : والله محتار هي صفقة مع عصابات مو سهلة ضياء : عصابة " الكف الاسود " هي اكتر عصابة قوية و اذا شتغلنا معهن رح نعطيهن الاولاد بمبالغ كبيرة وهن عندن عدة افرع لاتنسا .. شي سرقة وشي نصب وشي تشغيل .. وغيرو رأفت : طيب طيب .. - سعلت وقربت ع مهلي مشان ماينتبهو انو كنت عم اتسمع عليهن .. ابتسمت : تفضل ضياء بيك ضياء : يسلمو يا انسة تكوين : تفضل رأفت بيك .. ------------- ------------- الضيوف مشيو وبقيت عم رتب ونظف البيت لحالي ، الست نوال اخدت دوش و نامت والسيد رأفت شرب قهوتو ونام كمان .. ماخلصت تنظيف وترتيب لبعد ساعتين ونص .. عملت قهوتي و اعدت ع برندا غرفتي ، بعد ربع ساعة اجا ملهم .. انا كنت دايرة وجهي ومو منتبهتلو ملهم : بسست تكوين : اي رعبتني ملهم : وينون ؟ تكوين : نامو ملهم : احكيلي يلا شو صار تكوين : الست منى انا شفتا مرة بالميتم ومعا طفلة صغيرة كانت عم تبكي عأساس هي بنتا وبدا تتركا بل ميتم والسيد رأفت وضياء حكو شغلات بتخوف حكيتلو كلشي دار بين رأفت وضياء .. هو اعد ع البرندا بالارض وحاطت ايديه ورى راسو وعم ينفخ : يالله بدي اوصل لهل عصابة انا تعبت ماعم بمشي لقدام تكوين : ليش رجليك واجعينك ؟ ملهم : تكوين انا بنفسي اسلم حالي لهل عصابات و اخلص من غبائك تكوين : ههههه عم امزح معك ، بس لاتخاف انت عم تمشي لقدام وكتير ونشالله رح نكشفون اتطلعت فيه وقت خلصت حكيي ، كان صافن فيني و انا عم احكي .. ملهم : وجعني راسي من صوتك يلي بضل يزئزئ تكوين : اووف ووجعوني عيوني من شكلك يلا اوم تحرك ع بيتك ------------- يتبع .. |
كده اتوقعت انه هايحصل قصة حب بين ملهم وتكوين متابعة معك مؤيد حلوة كتير |
قصةة كلها اكشن هههههه بتزبط مسلسل متابعة |
@حبيب العمر كمان جزء اواتنين بليز |
|
قراتها اليوم باجزاءها اثرت فيي كتير القصة بستنى بتكملتها |
اه والله نسيت لقله المتابعين ههههههههههه اليوم بنزل الجزئين الاخيرين السادس والسابع |
الجزء_السادس ( 6 ) دخلت غرفتي بعد تعب طويل غيرت تيابي وتسطحت .. ماعد فيني حيل اتحرك ، نمت لتاني يوم وغرقت الصبح بكير كتير فئت ع صوت موبايلي عم برن رفعت راسي وسحبت الموبايل من تحت المخدة : الووو .. ملهم : تكوين لبسي بسرعة معك دقيقتين وجاي اخدك تكوين : لك لوين .. شوفي سكر الخط بدون مايفهمني اكتر ، قمت انا بسرعة كرمال ما اتبهدل ، رفعت شعري بربطة و لبست بنطلون جينز وبلوزة .. حطيت موبايلي بجيبتي وطلعت ع الحمام غسلت وشي .. لبين مانزلت كان ملهم بالسيارة ناطرني .. فتحت باب السيارة و اعدت جنبو : شوفي ؟ ملهم : هلأ رح اخدك ع الميتم بحجة انو بدك تسلمي ع رقية وفاطمة وتشوفي المى فهمانة وبتفوتي لهنيك وبتضلي .. لاتطلعي اصحك ، اليوم في تسليم تكوين : تسليم شو ؟ ملهم : الصفقة يلي اتفقو عليها ضياء و رأفت ، اليوم يتم تنفيذا .. عصابة الكف الاسود رح تشتري اكتر من 5 اطفال اليوم اذا ماقدرنا نقبض عليهن ونكشف اللعبة رح ننتهي و رح ينتزع كلشي .. وصلنا ع الميتم .. صف السيارة وتنهد بعدين اتطلع فيني وقلي : نزلي .. اصحك تآتي بأي حركة تكوين : انا قدا بوعدك .. نزلت من السيارة وبوجهي ع باب الميتم الرئيسي كان الحارس واقف عالباب فورا عرفني سلمت عليه ودخلت لجوى .. لقيت الست فاطمة واقفة بأول الدرج وضهرا لعندي قربت لعندا وغمضتلا عيونا بإيديي : حزري مين انا الست فاطمة : الصووووت ؟ ... تكويننن ضميتا .. للحظات حسيت حالي حنيت لهالمكان صح ماكان محل مريح او مخدم وكامل ، بس كانت كل ذكرياتي فيه ع القليلة كنت عايشة طبيعية وطفلة .. تكوين : كيفك امي الست فاطمة : ياعمري شو اخبارك انتي وين وداد و روان ليش ما اجو معك تكوين : رح يجو نشالله .. ايييه وينا رقية ؟ بقصد رقية خانم الست فاطمة : بمكتبا روحي لعندا رحت باتجاه غرفتا و انا متمنية اخنقا موتا ... دقيت الباب ودخلت ع غرفتا و انا عم حاول ابتسم و اخفي الكره يلي جواتي .. رقية : تفضل تكوين : كيفك رقية خانم ردت عليي بنشافة وقرف : اهليين ماشتقنالك لسا حكيت بيني وبين نفسي عأساس انا يلي شتقتلك اعدت ع الكنبا : هههه بتعرفيني اديش بحبك وشتقتلك يارقية خانم رقية : اومي اومي جاييني ضيوف اكابر هلأ تكوين : ضيوف اكابر ولعندك ؟! رقية : شو قصدك ! تكوين : اصدي لا .. انو اصدي مين هالضيوف الاكابر رقية : جماعة ماعندن ولاد وبدن يتبنو ولاد تكوين : اه متلنا يعني هيك تبنونا ناس اكابر متل هيثم بيك ماهيك .. اي والله يارقية خانم انتي بتحبينا وبتريديلنا الخير رقية : هه اي حبيبتي اكيد بردلكن الخير يلا اومي لشوف اطلعي شوفي رفقاتك اوام .. بقيت اعدة عم ماطل بين حديث وقصة وضحكة .. كنت عم اتغابا عليها و احكي و اسألا وهي مضطرة تجاوبني .. اجاها تلفون : الووو .. اهلا وسهلا .. بانتظاركن سكرت تلفونا و التفتت لعندي : يلا تكوين بسرعة لبرى الجماعة وصلو اوام اتطلعت فيا : خليني اعدة معك الله يخليكي والله مشتاقتلك رقية : لك ييي طلعي لبرى تكوين : طيب بس اخد محرمة معلش رقية : خدي وبسرعة لبرى قربت ايدي ع الطاولة سحبت محرمة بقووة ودفشت فنجان القهوة بطرف ايدي ، انكب كلو ع المكتب و الاوراق رقية : الله لايعطيكي العافية ياتكوين تكوين : يييييي مو بقصدي ، يلا رح جيب عدة التنظيف ونظف كلشي هون رقية : بسرعة طلعت ع مهلي جبت غراض التنظيف وضليت واقفة برى هييييك لوقت شفت الضيوف دخلو ع مكتبا ، جبت الغراض وفتت : مرحبا .. طبعا ماحدا رد عليي ، قربت ع المكتب وصرت اعمل حالي مو متتبهة ونظف ورتب كلشي بالاول اتطلعو عليي وتغامزو بعدين الست رقية اشرتلن براسا بمعنى عادي .. الرجال : حكينالك وضعنا ياست رقية رقية : اي اكيد الرجال : انا و اخي مابيجينا ولاد وبدنا نتبنى انا طفلين وهو طفلين . يعني بتعرفي الاولاد بيملو البيت رقية : اي والله الحق معك ..الله يجزيكن الخير اكيد .. احم احم .. حبيبتي ماخلصتي شغلك لسا تكوين : مبلى ضل شوي وبخلص .. الرجال : شايفا لهالبنت يالله وين .. " وقت حكا هيك خفت يقول انو عند السيد رأفت لانو هاد الزلمة كان من ضمن المدعويين وشافني عندو فعلا " تكوين : لا اكيد مو انا .. يلا خلصت تنظيف عن اذنكن .. سحبت حالي وطلعت من الغرفة ، درت كل الغرف وسلمت ع كل رفقاتي ورجعت وقفت قريب من الباب و انا عم حاول اسمع .. طبعا كانو محتاجين مدة ووقت ليوقعو الوراق ويشوفو الولاد ويعملو اتصالات وتجي السيارات ويقبضو المصاري يعني شغلة طويلة بل مختصر .. اعدت ع الدرج القريب من الغرقة و اما عم حاول اسمع .. بعد شوي رن موبايلي : الو ملهم : انتي وين تكوين : بل ميتم اعدة ع الدرج ملهم : تخبي فوراً فوراً اختفي تكوين : شووفي شو صار ملهم : هاد الحقير يلي اعد جوى عرف انك كنتي عند رأفت و اتصلو خبروه انو انتي بالميتم ، وهلأ هو بدو يجي اذا شافك رح تخرب الدنيا تكوين : اي اي يلا عم اطلع ع غرفة الكركيب بس خبرني ليش بدا تخرب الدنيا ماعم بفهم ملهم : لك تخبي وبسس انا جاية بس اوصل بخبرك -------------- يتبع .. |
متابعه |
@حبيب العمر الجزء7 والاخيرمنتظرة |
كملها مؤيد اتشوقت اعرف التكملة ونعرف اخرتها |
الجزء_السابع_الثامن والاخير ركدت لعند الست فاطمة بسرعة وماكنت لاقية انزل و اطلع ع الدراج والغرف لحتى لقيتا : ست فاطمة بسرعة نزلي الولاد ع القبو فاطمة : شوفي شو صار تكوين : مشان الله مافي مجال للحكي نزلي الكل خلال تلت دقايق كنا منزلين الاولاد ع القبو و معهن فاطمة خانوم تركتون وطلعت لاخر طابق .. دخلت ع غرفة كراكيب الميتم وحطيت خشب ورى الباب ، فتت تخبيت بين الاغراض قربت رجليي لجنب صدري وطبيت راسي و انا عم ابكي .. كان في فتحة صغيرة بالحيط قدرت اتطلع منا ع الحديقة الرئيسية للميتم شفت سيارة ملهم .. ملهم نزل من سيارتو و بإيدو فردو ، دخل ع الباب الداخلي وماعد قدرت اعرف شو صار .. كل الوقت كنت عم ادعيلو و ابكي مافيني اتصرف شي ماعد قدرت اتحمل ضل متخبية فتحت الباب ونزلت ع الدرج شوي شوي ، كان هدوء تام ومافي ولا اي صوت فاطمة اخدت كل الولاد ع القبو و اعدت معهن كرمال مايصير عليهن شي .. كل غرف الطوابق كانت فاضية مافي غيري عم امشي ع دقات قلبي مو على رجليي .. نزلت درجة درجة لوصلت للكردور الاخير .. الغريب انو مافي حدا لا ملهم ولا رجال ولاشي.. فتحت باب مكتب رقية كان فاضي ، التفتت بدي اطلع منو مالقيت الا حدا سكرلي تمي وحط فرد براسي .. هون طلع ملهم و بإيدو الفرد : بعد عنا الرجال : وين كنت متخبي ياضابط ؟ خايف انت وجماعتك ملهم : ولك بعد عنا عم قلك ، شغلك معي مو معا ضل حاطت ايدو ع تمي وعم يشدني لورى لحتى يوصل للباب الخارجي ملهم موجه الفرد عليه : تركا واحكي معي الرجال كانت خطواتو لورى وملهم عم يقرب خطوة خطوة و انا بين ايدين هالمجرم والفرد براسي .. طلعنا من باب الميتم الرئيسي وصرنا بالحديقة .. طبعا منطقة الميتم شبه فاضية والحديقة كبيرة مابتبين لبرى ضليت ارجف و انا بين ايديه وملهم يحكي بهدوء و هو اعصابو مشدودة .. فجأة بيطلع الرجال التاني يلي كان بغرفة رقية مع هاد يلي مسكرلي تمي ، ركد بسرعة بجهة ملهم وقوصو بصدرو . . وقع ملهم ع الارض هون انا دفشت يلي حاطت الفرد براسي وحاولت اركد بس سكرلي تمي وشحطني ع السيارة خلال ثواني ومابعرف كيف وصلت سيارة الشرطة وصار في اشتباك بين العصابة والشرطة .. هون قدرت افلت من بين ايديهن وركدت لعند ملهم يلي كان ملحوش ع الارض وعم يحاول يتحرك : ملهم قوم قوم معي ملهم : اخخ روحي أهربي أهربي تكوين : لك مستحيل مستحيل صرت جر ملهم من قميصو لان ماكان قدران يمشي هيك لوصلت لمكان مخبى شوي .. الرصاص كان عم يطير بالجو وعناصر الشرطة عم يوقعو واحد ورى التاني .. بعد دقايق من هالاشتباكات وصلت سيارة تانية فيها رجال صارو يقوصو ع العصابة .. بكل هي الاشتباكات والاصوات يلي قتلت ناس كتير وموتت رجال قوية .. ماقدرت تقتل المشاعر .. رغم الوجع والدم مانقتل الشعور .. سندت ملهم ع غصن شجرة وهو عم يتنفس بصعوبة : صبور شوي رح طالعك من هون ملهم : تكوين انا رح موت بعرف نفدي انتي تكوين : لا لا تحكي هيك ملهم : اخخخ سامحيني ع الغلط يلي غلطتو معك والحكي و الاهانة .. كنت عم احكي و ابكي : لك خلص سكوت سكوت ملهم : انا كنت ناوي انو .. انوو انهي هالمشكلة وقلك اني بحبك .. بحبك كتير تكوين : و انا بحبك ، حاج تحكي بل موت انت بدك تعيش معي حط ايدو ع قلبو وصار نفسو اسرع من قبل : كان بدي جيب منك بنت قوية متلك وحلوة متلك و اد حالا متلك تكوين : لاتحكي هيك نحنا رح نتجوز ورح جبلك هيك بنت والله والله بس خليك معي .. انا بحبك انا تعودت عليك .. ملهم لا تتركني لاتتركني انا بموت بلاك .. ملهم : وعديني .. وعديني انو تضلي قوية وتعيشي وعدي تكوين : بوعدك ضل قوية بس و انت معي لاتتركني صرخ بصوت عالي : آآآآآآآآآخ بعدين غاب عن الوعي .. طبيت راسي ع صدرو وصرت ابكي بطريقة بتخوف كأنو روحي يلي طلعت مني .. يمكن شتهيت بوقتا تجي رصاصة براسي وتموتني فوقو .. صرت اصرخ بطريقة مجنونة كأني مو خايفة من الموت .. غبت عن الوعي بعد دقايق ، لما صحيت لقيت حالي بفرع شرطة مسطحة ع كنباية وعلى جسمي حرام .. رفعت راسي و انا عم ابكي و قول : ملهم تعا لعندي التفت لعندي الضابط يلي كان بالمكتب : الحمدلله ع سلامتك بنتي شهقت بصوت عالي وحطيت ايديي ع راسي : اييييييي سلامة ياريتني متت و ارتحت .. انا من لما خلقت ع الدنيا كنت ضايعة ووحيدة .. خلقت كمالة عدد خلقت لاتعذب وبسسس .. تمنيت افرح بيوووم لك لييييش لييييش ؟!! الضابط : اهدي اهدي .. نادى للشرطي يلي برى وجبلي كاسة مي .. شربتا بعدين مسحت دموعي وصفنت .. الضابط : ملهم حكالي كل القصة ولما اقترح انو يلقط هي العصابة ، انا خالفتو الرأي لان بعرف انو هي مو عصابة هي شجرة وكل فرع فيا بيحوي الف عصابة .. بس هو عاندني كان بدو ينتقم وياخد حقو .. تكوين : كان بدو ينتقم لان عاش بظلم وكذبة وهلأ هو رااح .. اجا دوري لانتقم من الظلم والكذبة ومن الرصاصة يلي اخدتو مني الضابط : انتي مافيكي تتحركي ولا حركة .. لاتنسي انو ولاشي انتها والعصابة بعدا عم تتفتل بالشوارع تكوين : المعنى ؟ الضابط : المعنى انك تتركي المنطقة وتعيشي بمكان بعيد ، اذا وافقتي انا بساعدك وبهربك من العصابة يلي عم تراقب تحركاتك تكوين : هيككك بهل بساطة بدي انسا يلي قتل ملهم ؟ الضابط : الرصاصة يلي قتلت ملهم مو صعب عليهن يقتلوكي فيا .. نفدي بحياتك احسن ------------- ------------- يتبع |
الجزء الاخير انتقلت ع بيت بمنطقة بعيدة طبعاً بعد ما الضابط هربني بألف طريقة كرمال العصابات يلي عم تراقبني ماتقدر توصلي ، لان كنا عارفين انو انا رح اتراقب لتنعرف كل تحركاتي .. اعدت بهاد البيت يومين تقريباً و انا منقطعة عن العالم فتت بحالة كآبة فظيعة ماعد عملت شي بحياتي غير النوم حتى اكل ماعد اكلت زيادة .. كنت اعدة عم ابكي لما اندئ الباب بقوة .. صرت ارجف ونحلو رجليي ماعد قدرت اوقفو منيح ، تسمدت ع الحيطان لوصلت للباب .. فتحتو واعدت بالارض خبيت عيوني وصرت صرخ وقول : تركووووني لك خلص بعدو عني خلص خلص ماحسيت الا ايدين حدا انحطت ع راسي : روقي ... رفعت راسي شوي شوي : هيثم بيك ؟ هاد انت هيثم : جيبي غراضك وتعي معي كنت مأمنة بهيثم بيك لان هو كان مع ملهم وعم يساعدو ليمسك العصابة .. لبست وطلعت معو بالسيارة .. اعدت ادام وسندت راسي ع الكرسي ، التعب والوجع كان مرسوم تحت عيوني هيثم : في شي لازم تعرفيه تكوين : شو ضل شي ماعرفتو ؟ هيثم : بس نوصل رح تعرف وصلنا ع الفيلا نزلت من السيارة وصرت امشي ع مهلي .. دخلت ع باب الصالة و ضليت واقفة عم اتصفن الحيطان ، ماكان الي نفس احكي مع حدا .. هيثم : طلعي ع الدرج تكوين : هيثم بيك اعذرني انا ماني قدرانة كمل بشي سامحني انا بدي انسحب هيثم : التلك طلعي ع الدرج طلعت ع الدرج ومشينا يمدخل عرض وطويل بآخرو في غرفة فتح الباب هيثم بيك وقلي : فوتي انا خفت وترددت .. بس ماكان عندي شي خاف عليه اكتر دخلت ع الغرفة والتفتت ليميني .. كانت المفاجآة انو ملهم اعد ع التخت ومافيه شي .. جمدت بأرضي صرت اتطلع فيه ودموعي عم تنزل .. كان اعد ع التخت وجرحو مضمد ، شعراتو منكوشين كتير ابتسملي وقت شافني : تكوين تكوين : انت عايش ؟! مشي خطوتين هيثم بيك ووقف جنب الشباك : بعد ما اجو رجالي و اشتبكو مع العصابة انتي غبتي عن الوعي الشرطة نقلت ملهم ع المشفى و انتي اخدوكي معهن لان عرفو مافيكي شي بعد فحص الدكتور .. بعد ما الدكتور طالع الرصاصة من ملهم وطالعو من حالة الخطر انا هربتو من هنيك وجبتو لهون .. اادكاترة ماقصرو وحكو للكل انو مات ، مشيت بمراسم الدفن وكأنو يلي صار عنجد .. طبعاً كل هاد خوف على حياة ابني .. ملهم : عرفو انو هي انتي نفسك يلي بتشتغلي عند رأفت و اتصلو فيه حكولو انو هي البنت بالميتم و اصلا كانت عايشة فيه .. اتصل فيني رأفت وهو معصب وعم يقلي انو رايح ع الميتم يقتلك لان كزبتي عليه و كشفتي اسرارو هيثم : الخطة انا رح نفذا و رح تنمسك العصابة .. ------------ ------------ هيثم : الو .. كيفك يارأفت شو الاخبار .. طمني مسكتوا للبنت يلي كانت تشتغل عندكن .. ايوا ايوا .. طيب تعو سهرو عنا انت و الست نوال .. اي الله يرحمو ملهم كان روحي تمام اهلا وسهلا .. سكر التلفون هيثم بيك وتوجه لعنا : سمعتو يلي حكيتو ؟ هي الغرفة مابتطلعو منا فهمتو .. بعد مدة وصلو رأفت ونوال .. اعدو بالصالة وتعشو بعدين صارو يحكو عن الشغل وبلش رأفت يستشرف ع قصص المياتم و انو هو قدوة وبربي الولاد وبيحميون وهالحكي الفاضي .. انا وملهم كنا بالغرفة بس سامعين كلشي من جهاز التنصت يلي تركلنا ياه هيثم بيك .. هيثم : رأفت خرج تأمنلي شي طفل من الميتم .. بتعرف ابني توفى وبدي ولد رأفت : اي اي ماتاكل هم .. بس بدك تدفع هيثم : لك بدفع بدفع المهم ولد .. رأفت : اي وبسلامة فهمك ياهيثم بيك بس انا بيطلعلي كمسيون كن هالشغلة هيثم : ولووو كلو بالحفظ والصون .. ايمتا فينا نروح ع الميتم نختار ولد رأفت : بكرى اذا بدك هيثم : حلو بدي من الميتم نفسو يلي اخدت منو ملهم ، بتعرف يعني ريحتو ضلت هنيك نوال : الله يرحمو .. تاني يوم كانوو متواعدين يروحو هيثم بيك والست نوال و السيد رأفت ع الميتم وهنيك رح يجتمعو برقية .. يلي صار انو هيثم بيك اتصل بالشرطة وخلاهن يحاوطو المكان بدون ماحدا ينتبه بس .. و دخل معو جهاز تنسط ع مكتب رقية ، حكو كلشي و اتفقو ع كل شي رح يصير وطبعا الشرطة كانت عرفانة شو يلي عم يصير .. رأفت : شو هيثم بيك عجبك الولد ؟ هيثم : عجبني كتير .. وقف هيثم بيك وصار يفتل بالغرفة اعطاهن ضهرو وهو عم يحكي بعدين التفت عليهن والفرد بإيدو : ولا حركة .. فتح ملهم الباب و كمان بإيدو الفرد .. رأفت : ملهم ؟ خلال دقايق الشرطة كانت بل مكتب رأفت : شو عم يصير ؟ هيك ياهيثم عم تعمللنا كمين .. ماشي فاتت الشرطة اخدت رقية والست نوال و رأفت .. و انا وملهم وهيثم بيك رحنا ع قسم الشرطة معهن كمان الضابط : ممم هيك لكن يارأفت عاملي فيا شيخ عصابة .. ملهم : باعني هو وخالتي بمصاري .. وباعو غيري وعاملين عصابة كاملة بتجارة الاطفال الايتام !! شو ذنب هيك ولاد .. ذنبون انو مافي حدا يحميون .. ذنبون انو ما الهن اهل يديرو بالن عليهن الضابط : لاتاكل هم سيد ملهم ، هدول وقعت بشر اعمالون ورح يتعاقبو اشد العقاب .. فيكن تروحو ع البيت شكراً لتعاونكن معنا طلعنا من المخفر ونحنا فرحانين ، انا عم اضحك وساندة ملهم وهيثم بيك ماشي قدامنا .. طلعنا بالسيارة هيثم : يلا يا ابني شد فينا ع المحكمة ملهم : ليش بابا شوفي هيثم : والله عندي كتب كتاب ابني ع الهبلة يلي اعدة جنبو تكوين : هههه ملهم : لا لا مو الهبلة اصدك الغبية تكوين : هلأ انا غبية يامغرور ملهم : بس عنجد بابا خليا لبكرى منكون ارتحنا .. وصلنا ع البيت ونحنا تعبانين ، عملت عشا وتعشينا بعدين هيثم بيك دخل ينام وضليت انا وملهم سهرانين ع البرندا .. ملهم : بتعرفي انو وقت بشوفك قلبي بيضعف تكوين : يضعف ؟ ماخبرتني من قبل انو معك مرض القلب ملهم : اي معي مرض القلب والضغط و السكري تكوين جلطتيني تكوين : عم امزح .. بعرف انك بتضعف وقت تشوف عيوني ووقت تزقف معي .. من نظراتك ببين ملهم : وفعلاً عم اتطلع بعيونك وقلبي عم يقلي قلا بحبك تكوين : و انا بحبك كتير هيثم : حبيباتي و انا بحبكن كتير شرفو نامو .. لان بكرى عندكن تعب بترتيب امور العرس يلله ادامي ع غرفكن .. ئمنا ونحنا خجلانين من يلي سمعو هيثم بيك .. انا رحت لغرفتي و ملهم راح لغرفتو .. --------- " بعد سنتين " تكوين : ملهم اول ولد سميتو هيثم ع اسم ابوك التاني بدي اسميه قيس ملهم : ابدا ابدا .. قيس مابسمي تكوين : طيب مو بس انت يلي بدك تختار الاسماء هدول ولادي كمان ملهم : لا انا يلي بختار نسيتي انو انا الرجال تكوين : لا مانسيت .. يالله مألمك هيثم : هههه حاج تتخانقو .. رح يجيكن بنت وتسموا لين عاسم المرة سلي رح تصير خالتك ياملهم اتطلعنا ببعض انا وملهم : ليش رح تتزوج هيثم : اي نعم ، وهلأ في مفاجأة لتكوين .. دخلو روان ووداد وهن متغيرين كتير كانو صبايا ولابسين لبس اكابري وبجنن .. ضميتون وصرت ابكي .. يلي عرفتو انو هيثم بيك كان حاطتون عند رفيق من رفقاتو مابجيب ولاد وبقيو عندو هو ومرتو .. وتوتة توتة خلصت الحتوتة 💜💜 ----------- بقلم_رند_محمد *النهاية* |
ملهم مامات صح ؟اكيد وكمان اتقبض ع عصابة الحقيقية نوال ورافت وكمان روان ووداد أصبحت حياتهم حلوة حلوة القصة ميرسي مؤيد بانتظار قصةجديدة |
محلاهم حبيتها للقصة هههههه فيها اكشن ورومنسية يسلمو ي مؤيد عنجد قصصك مشوقة |
| الساعة الآن 01:04 AM |
Powered by vBulletin® Version 3.8.7
Copyright ©2000 - 2025, vBulletin Solutions, Inc.
Search Engine Optimization by vBSEO ©2011, Crawlability, Inc.
HêĽм √ 3.1 BY: ! ωαнαм ! © 2010
new notificatio by 9adq_ala7sas
User Alert System provided by
Advanced User Tagging (Lite) -
vBulletin Mods & Addons Copyright © 2025 DragonByte Technologies Ltd. Runs best on HiVelocity Hosting.