ليس دفاعاً أو تحيزاً, و إنما لنشر الوعي العام ~~
 

ليس دفاعاً أو تحيزاً, و إنما لنشر الوعي العام ..


عزيزي المواطن المحترم 😊


إبن عمي وقريبي وصديقي وجاري..
أنا فاهم انه أغلبكم في فكره براسه أنه المستشفيات الحكوميه سيئه..من ناحيه الخدمه الطبيه والفندقيه ومن ناحيه النظافه و الزحمة والمشاكل والطوش..الخ.
وعندك فكره انه في مليان أخطاء طبيه بتصير وإهمال وتسيب وبتفكر الكادر الطبي مقصر دايما.
خليني أوقف معك شوي وأعتبر فكرتك هاي الها مبرراتها عندك.
طيب أسألك؟بما انك بتعرف كل هالحكي ولساتك بتيجي عالمستشفيات الحكوميه تتعالج.او تعالج أهل بيتك.وأولادك كلهم الله يحفظهم مواليد هاي المستشفيات ..حاب الوضع يتغير؟؟حاب تشوف المستشفيات الحكوميه احسن؟؟
نظيفه..مرتبه...كادرها الطبي رايق ..بشتغل صح..مش معجوق...ما بغلط...مركز مع كل مريض ..معطي كل مريض حقه بالوقت والتفكير..؟؟؟ها...حابب؟
اذا جوابك اااه....ساعدنا
●بس تجيب الوالد او الوالده الله يشفيهم ويطول عمرهم عالمستشفى لا تفزع كل الحاره..الي بشوفك بالسياره طالع قله رايحين نشيك عالحج مافي اشي..والولد الصغير الي بحط حاله بالسياره عشان يطش شيله من بلوزته ورجعه عالدار..
●لما تيجي المدام تخلف مافي داعي كل النسوان الي بقربولك والي بقربولها ييجوا يستنوا باب قسم التوليد خبر الولاده..تعال انت وياها وحماتك لحالكو..بس ييجي ولي العهد الله يحفظه.روح اعمل عرس بالحاره..
●لما يدخل جارك الي عمره 90 سنه قسم الicu او الccu وتسمع انه وضعه مخطر..روح على ولاده وبناته بالدار وقللهم اذا محتاجين مساعده انا جاهز..هيك أحسن من ما تروح تزور الحج بالمستشفى وتضرب الحارس الي عالباب ﻷنك جاي مش بموعد زياره وهو مش راضي يدخلك اصلل الحج بكون بغيبوبه وما رح يعرف انك اجيت.
●اذا كنت مرشح كثير وحاس جسمك مكسر والساعه 10 بالليل ..خذ حبتين بانادول وأشرب كاسه شاي سخنه مع ليمون واترك نفس الأرجيله وحط راسك ونام والصبح بتروح على اقرب مركز صحي ..مافي داعي تراجع الطوارئ وتجيب معك صحابك.
●لا تكون داخل عالطوارئ وانت مستشر وحاط ببالك فكره انه اذا ما صيحت ما حدا بطل علي..غلطان كثير..اذا صيحت ببطل حدا اله نفس يشتغل معك..المراجع المحترم والهادي من الخجل بصير الكادر يخدمه بعيونه..
●صديقي..!!الطبيب والممرض لما يكون يشتغل وفوق راسه 30 شخص بحكوا معه بنفس اللحظه وكلهم بدهم تمشي شغلتهم فورا..ببطل يركز..وبصير مش عارف المريض من المرافق من بياع العلكه المتجول وساعتها تركيزه بقل ..ونسبه الخطأ بتزيد.
أغلب أطباء القطاع الخاص المبدعين كانوا يوما ما في مستشفى حكومي .بس طلعوا على عياده خاصه رايقه..زاد إبداعهم..ﻷنهم بشتغلوا بهدوء..وفي مكان نظيف..والمراجعين بحكوا معهم بصوت واطي..انا بقول زاد إبداعهم ﻷنهم أصلا كانوا مبدعين بتحملهم ظروف العمل الصعبه.
●قرابتي .ابن عمي!!..عامل النظافه مسكين..ما بلحق يمسح كاريدور الا هو متوسخ بعد 5 دقايق بالزبط..ﻷنه بال5 دقايق هاي مرق 10 مرضى فيه و100 مرافق..منهم ولاد صغار معهم شيبس وعصير جايين يتطمنوا على جدتهم..عشان هيك ما بتشوف مستشفيات القطاع العام بتلمع
●مرضى الicu مناعتهم ضعيفه جدا..دخولك عليهم 20 مره باليوم ومعك وجبات شاورما بتضرهم.وجودك الدائم اصلا بعمل للكادر قلق..وبتخليه يبطل يعرف يشتغل مع مريضك...مساعدتك الماديه الي بتعرضها عالحارس مشجعيته يتمادى..
بدك نصيحتي خفف زيارتك لمريضك قد ما بتقدر بتحسن مريضك اسرع(رد علي).
بعرف طولت عليك بس والله هذا غيض من فيض
● لما الطبيب و غيره من الطواقم الصحية, بيشتغلوا على مدار الساعة من دون راتب يسد فيه أفواه ولاده المرميين بالبيت, يدفع فيه فواتير الكهربا و المية و غيرهم, حتى يدفع تكلفة المواصلات لحتى ييجي يخدم حضرتك!


اذا نفسك تصير مستشفياتنا الحكوميه مثاليه ساعدنا باللي بتقدر عليه..ورح تشوف انه في أشياء ممكن احنا نغيرها مش الحكومه, وسلامتك