أنا مش مخلوقة لطيفة ♥
 

صعب كتير أكون بنت بالصورة الي بدكم إياها, أسهر طول الليل بزبط بشعري وبحط مناكير, بمضي ليالي كتيرة بمعدة فاضية ليصغر خصري, كل مصروفي بيروح لكريمات الوجه والفاونديشن والعطر, وبين المحاضرة والمحاضرة لازم أمر على التواليت لأزبط الأيلاينر لإنه بيضله يخرب, ولازم تضل ريحتي حلوة, لازم أكون بنت – ناعمة -.



طيب ما هو أنا انسان مش لعبة باربي أو قزازة عطر مرصعة بالدهب, ما ضروري أضلني ماشية على نظرتك المعتادة للمخلوقة اللطيفة إلي قدامك, ما ضروري أكون نسخة مكررة إنت السبب بوجودها, أمشي على تعليماتك إنت وهالمجتمع, وأعودكم على منظري بالمكياج ويصير بدونه متل كإني مريضة.



وين المشكلة بإني أكون إنسان معتدل لا ناعم كتير ولا خشن كتير – صار بدي كنافة
– أعمل الي بدي اياه أو بالأول أعرف شو بدي بعدين أعمله, ما قياس بنطلوني الجينز مش هو هويتي, طول شعري, لون عيوني أو قصدي لون اللينسيز, أبداً مش هو هويتي, صار وقت نكسر القالب الي عم بيخلينا نسخ, نفس الشكل, نفس الملمس, نفس المكونات والمواصفات, والمشكلة الأكبر إنها نسخ صينية, صار وقت نتعايش مع عالمنا, عالمنا الحقيقي مش السطحي, صار وقت نعيش متل ما نحنا من جواتنا متل ما انخلقنا, إنسان من لحم ودم مش من بلاستك وألوان, ما حدا بيختار أكله مشان لونه ما هو ازا هيك حتاكل السم ازا لونه عجبك, أو نحب ريحة الزبالة مشان لون الكيس, بيكفي ألوان بكفي نعومة وجمال كزابي بيروح مع المي, حياتك خليها تيجي من جواتك مش من معايير حطوها غيرك وجيتي إنتي قدستيها.



الحياة بسيطة بدون تعقيدات وأفكار مخللة ومحفوظة بروسنا, عادي أطلع متل جعفر وتحكي عني مش حلوة المهم انا مرتاحة وعم بعيش حياتي متل ما بدي مش متل ما بدك إنت

ححلو الواحد يكون ع طبيعته وما يتزيف ولا يتصنع مشان النآس ومشآن يرضيهم
حبييت الكلام
عوافي ي سكرة

كلاام جميل

يسلمو سمر

عوافي

يحلي ايامك
نورتي حبيبتي

يعافي قلبك
نورتي حب


يعافيكي
نورتي

حلو الشخص يكون ع طبيعته ومابيعرف اي تصنع

كلمات حبيتهم جدا


عوافي ي سكككرتنا

احلى ششي يكون الواحد ع طبيعتوو

طرح بجنن بجد يسسلمهم

ارضآء الناس غآية لآ تدرك

و مصيبة اعيش حيآتي لأجل بس ارضي هالعآلم اللي ما بعجبو العجب
أهم شي بالنسبة ليآ أكون انا رضيآنة عن حآلي


حبييت