منتديات بنات فلسطين - نظام الفرح في غزة 🙆😂

هسا يوم العرس وبعد ما العروسة تروّح من عند كرستينا، طبعاً اللي بتروح ع كرستينا لو كانت من جنوب أفريقيا بتطلع إحدى مشجعات هولندا في كأس العالم،، وبعدين ييجوا المعازيم والناس ع دار العريس وينطلقوا لدار العروس، الباصات بتكون مليانة وفي الغالب بكونوا باصات أبو علبة للسياحة والنقل 😂
بروحوا يجيبوا العروسة، بقعد العريس وعروسته وأمها ورا 😂
وأمه قدام جنب السواق 😂
المسكين العريس مش قادر ياخد نفسه، من فستان عروسته والحديد اللي فيه ومن أمها وفستانها اللي وزنه 13 كيلو، بخنقوه خنق لدرجة صرنا نشوف العريس دايماً طالع من سقف الجب وبرقص 😂
مش لله، من مكعبات الأسمنت اللي قاعدة جنبه 😂✌️

المهم بصلوا الصالة ، وبتكون أختها للعروسة جايبة فحم القمة "يشتعل سريعاً ويدوم طويلاً"، وزبدية أفوكادو فاضية وشوية بخور ومستكة ، وبتبخرهم أول ما يدخلوا عشان الحسد والعين 😂
زمان أول ما يدخلوا العروسين كانوا يشغلوا أسماء الله الحسنى ، هلقيت ي كبير بشغلولك "سمعني نبضك لسلمى رشيد" وبكون في كبشة ولاد صغار ، ومعهم شمع مولع ، وكريم ابن أخو العريس حامل مصحف 😂 أنا مش عارف شو الحكمة من قصة المصحف جوا الصالة، بس هيك العادات أنداري 😳

بدخل روميو وجولييت، ع الرقص ع السريع 😂😂
ومن هنا تبدأ الانتقادات من قبل الجمهور 😂
بتكون وحدة شريرة هادي أصلاً معنسة ومحدش متطلع في وجهها بتيجي بس ع العراس عشان تنقر ع العروسة وتمدح في العريس 😂
وفي بكون شلة بنات زعرات، بقفن فوق الطاولة عشان يشوفوا الكوشة والستيج 😂 والمصيبة أنهن براغي وكمان بعيبوا ع طول العروسة !

في مجموعة بنات هدول كانوا يعرفوا العريس قبل ما يخطب عروسته، بيجو يفروا بحالهم وياكلوا تمهم ويحاولوا يمسكوا عيب ع عروسته عشان يفضحوه 😂😂

وأزنخ حاجة في هدول اللي بروحوا ع العراس عشان يخطبوا "خطابات" ، الوحدة منهم بتقعد في زاوية الصالة ومعها منظار تحت الأشعة الحمراء ودفتر وقلم، وبتتصايد الجميلات الرشيقات الراقصات الناعمات شعورهن 😂💃💃🙆🏻

بعد شوية بطلع العريس ، بنطوا صاحبات العروسة 😂😂
اتفرج ي حبيبي فساتين سواريه وشفافيه وفزكوز وجاليه وعريانيه ، بتحس الستيج قلب كاباريه 😳😱
بخلصن ! بتيجي أخت العريس اللي في أولى جامعة، هادي بتكون أمورة وفرفورة وكيوت ووزنها 49 كيلو وطولها 170cm ، بتكون عاملة فرقة رقص هندي مكونة من صاحباتها في الدفعة (أشواريا راي ، بريانكا تشوبرا ، ديبيكا ، كاجول ، كارينا كابور ، كاثرينا كيڤ ، سوناكشي سينها ، ديڤيا بالان ، سهى علي خان ، راني موخيرجي )

برقصوا الرقصة الهندية المعد إلها مسبقاً على أغنية فيلم دهووم 2 😂😂

ومن ثم بتيجي أهم عنصر وهي أخت العريس القوية ، طبعاً هادي بحكولها حسن صبي وسميحة الرداحة ، ودعبس عشانها متوحشة في الدار ، بتقوم بتشد العروسة وبتخلي تبعت الستيريو تشغل أغنية رقصة البطريق ، وخدلك عاد بعملولك قطار بشري ، كل الصالة بتقوم ترقص بطريق 😂😂

بهدوا حيل العروسة 😂 ، برجع بدخل العريس تاني ، كل الأشكال الهندسية العارية اللي كانت ترقص بتختفي 😂
بشغلوا أغنية "مشاعر تشاور " وبرقصوا سلووو ، بس الخازوق لو العروس ماكلة بصل أخضر ، أو هو ماكل تومة مع الرز الأصفر ، بتبطل رقصة سلوو بتصير رقص باليه 😂😂

في كتير بطلعلك عريس بعرفش يرقص سلوو والورطة أنها العروسة تقعد تعلمه قدام المعازيم 😂😂 ، يخي مش صنعة هيا ، بتحط ايدك ع خصرها وهي بتحط ايدها ع كتافك او بين كتافك وصدرك وبتعملوا لفتين لعند ما تخلص الأغنية وتبعت الستيريو بتشغل جهاز الدخان عشان لو بستها محدش يشوفكم وخلص مش قصة يعني 😏

بالنهاية بدخلوا شباب العيلة ونص الشباب كل واحد حبيبته قاعدة مع المعازيم 😂
وبشغلوا أغنية مفيش راجل بقى راجل ، والستيج بقلب حارة الألماني 😂😂

مش لو جبتوا الحوتة لكان ارتحتوا من كل هالعروض
العسكرية اللي صارت في عرسكم ، بلا نيلة 😂😂