"إصرف عنّي كل شر".. ❤
 

ما بعرف كيف هالطلعة ما زبطت والله كنت مخططلها، ولبست وجهزنا بس ما طلعناها!


اختي طول عمرها معدلها 98، و ٩٩ دخلت توجيهي فجأة نزل معدلها ل ٨٠ كانت بدها تدرس طب، بس وينها ووين الطب، ودخلت تخصص تاني.


كان عندي صور بالتلفون بحبها، وكان التلفون كل ما يعطيني full memory احكي لا ما بدي امحيهم، خلّيهم، اجا اليوم وهم انمحوا لحالهم.


طول حياتي بحكي انا وصاحبيتي لا زمان ولا مكان ولا شي حيغيّر صداقتنا لكن سبحان الله مرّت الايام وبطلنا نعرف بعض حتى.


كان عندك انسان قريب منّك، بكل شيء بتتشاركوا، وبكل دقيقة ممكن يسمعك فيها، كنت تحسه حالك ما بتفرق عنه، وكنت تحكي ممكن الكون كلّه يتغيّر علي الا هو، بس تغيّر وبعد وبعدتوا وعدتوا غرباء.


كنت بحكي لماما لازم نطلع ع الساعة ٩ وازا اتاخرنا راح يخرب كل شي! ماما تأخرت طلعنا ٩ ونص وتأخرنا قلتلها، ها شايفة! هي في ازمة ومش راح نلحٌق، حكتلي ابصر شو سبب هالازمة.. مشينا ولا هو حادث ضارب ٤ سيارات من نص ساعة.


درست للإمتحان من اول لفصل عشان هالمادة لارم أنزلها A+.. ويوم الامتحان الصبح رحت المستشفى، وراح علي الامتحان بعد يومين حكت مع صاحبيتي قالتلي اعلى واحد بالشعبة جاب 20/40..


جيت بدي البس البلوزة الخفيفة الزرقا، لقيت عليها نقطة سوردا، حطيتها ع الغسيل لبست وحدة تانية وطلعت ولا هي الدنيا بتشتّي..


قبل شهر كنت طالعة مع أهلي الساعة ٩ بالليل، واحنا بنص الطريق طلعت ماما ناسية شنتتها، وجعنا ع من نص الطريق ولقينا باب البيت من برا مفتوح..


بتذكّر صاحبيتي باخر امتحان فاينال الها بفصل تخرّجها ما داومت لظرف عائلي، ورسبت بالمادة وتأخرت فصل، وبهداك الفصل تعيّنت بشركة قبل لا تتخرّج..


"صار معي ظرف اضطريت ائجل فصل دراسي واقعد بالبيت... بهاد الفصل سافرت ع دبي وصرت سفير لاكبر افنت لذوي الاعاقة بالشرق الاوسط، طلعت ع قناة رؤيا وحكيت ع مسرح تيدكس بجامعة النجاح 💙"


قلنا خير، خير اللهم إجعله خير!
بسيط الموضوع.. كنت بصلّي بصلاة العشا تأخرت فيها وقتها.. وصحيت ع الساعة ٢ ونص بالليل عشان أصليها.. حسيت بسكينة وانا بصلي مع اني مأخرة الصلاة ودعيت يا رب اصرف عنّي كل شر.. كل الشر يا الله، وطلع الموضوع بسيط.. "إصرف عنّي كل شر"..


آمين.




منقول..

ما في شي بصير الا ووراه خير
لازم نكون مآمنين بهآد الشي ويكون عنا قناعة فيه لحتى نعيش مرتاحين


حبيت الكلام
شككرا

الحمد لله على كل حال الاشي اللي بدنا اياه بصير بالعكس
بس ما زال ربنا ما اعطانا هالاشي الا في وراه ضر
او أنه رسالة ربانية بدو يوصلنا اياااه
معصيتك تزيل النعم




شكرا لطرحك

اي صح حكيك


نورتي ^^

شكراً لمرورك


نورت

يعطيك العافيه على الطرح الجميل
بإنتظآر جديدك بكل شوق ..
لروحك جنآئن الورد