|
طلي بالأبيض..💔 " طلي بالأبيض " أغلب إجماع الناس إنه أصعب لحظة في الزواج هي لحظة طلوع البنت من البيت و هي لابسة الأبيض متمنية هي و كل أهلها يكون بختها بلون الفستان.. و غالبا هاي اللحظة بتصاحبها دموع منهمرة بغزارة من الأخت و الخالة.. و دموع ثانية مكتومة بحرص بين الجفنين من الأم حتى ما تفسد فرحة بنتها. عشان هيك في ناس بتجنبوا هاي اللحظة بأي طريقة.. مثلا بطلعوا من الصالون على الصالة "دايركت" بحجة مافي وقت.. أو بصريح العبارة "بدناش نعمل مناحة لما تطلع العروس".. و مع ذلك لابد من هاي الفقرة إنها تتعوض بعدين.. إن شاءالله بآخر دقيقة من الحفلة و هي العروس بتركب بالسيارة المزينة.. المهم العروس تعيط غصبن عنها.. و خلال كل هاي اللحظات بنشفق على العروس المسكينة اللي خايفة على المسكارة تسيح.. أهم شي المسكارة. طبعا لحظات المآسي كثيرة في الزواج.. يمكن لإننا ناس بنحب الدراما.. و الفرح بنعتبره إشي متبوع بالضرورة بشي سيئ.. و لذلك بنكرر كثير عبارة "الله يكفينا شر هالضحك".. يعني لما تبدأ البنت بتجهيز شنطة أواعيها دراما؛ إنكتب فيها أغاني و أهازيج من سنة آنست "و طلعت من البيت و ما ودعت خياتي" و غيرها.. و لما تنقل أغراضها على بيت الزوجية الجديد كمان دراما.. بالذات لما تاخذ مخدتها معها.. مخدة بتنام عليها من لما كانت بالسادس إبتدائي؛ كيف بدها تنام على غيرها هسه؟!!!! حقها. و لما يفوت الأب يلبس بنته سنسال ذهب و هي على الصمدة فوق.. صحيح الأب بقعد يكتكت إيديه بس يخلص تلبيس زي اللي كاين يفك ماتور سيارة.. بس لا بد ما تحضنه بنته بعد ما يبوسها على جبينها.. و يبلشوا خواتها البنات نواح، و هات لحق على توزيع محارم بالصالة بدل الكيك و البيبسي اللي بدون غازات. لحظات و مواقف.. شو بده يحكي تا يحكي الواحد.. بس في لحظة ما حدا بنتبهلها ولا حتى بواسي صاحبها.. لحظة ما الأب يحط إيده بإيد الخاطب و يقول له "زوجتك إبنتي".. بتعرفوا شو شعور الأب و هو بقدم هالجوهرة الثمينة اللي صارله سنين بصقلها بالأخلاق و بلمعها بالتربية و بغلفها برموش العين؟ شو صعبة على كل أب يحكي كلمة وحدة زي "زوجتك إبنتي".. كلمة هي ميثاق غليظ بتحل اللي كان حرام قبل خمس ثواني.. و بتنقل عهدة "نيني العين" لرجل إن شاءالله يكون إبن حلال. دائما عند كتب الكتاب كنت أخلي عيني على الأب اللي ما حدا حاسس فيه.. الأب اللي لما ينتهي الشيخ من تكرار أسطوانته المعهودة بغمض عينه بشدة مع صوت الزغاريد و صحون الكنافة اللي بتتوزع.. و لسان حاله بقول: يا رب.. يا رب. طوبى لكل من أفنى عمره تعبا و هما.. من لحظة أذانه في أذن إبنته؛ إلى قوله زوجتك إبنتي.. و طلي بالأبيض طلي يا زهرة نيسان. وما_تنسي_أهلك_يا_زغيرة �� |
اخخ من هيك لحظة فكرتيني يوم ما طلعت أختي طلعت معها روحي وقعدت ابكي وبكيت الكل معي واختي المسكينة بكيت كتير وخربتلها مكياجها والحمد لله انها حلوة ومش محتاجة مكياج كان فضيحة وقتها ^ ^ |
خليتني ابكي معاهم فعلا لحظات بتوجع القلب وكتير صعبة طرح رائع يعطيكك العافية بانتظار جديدكك ي الغالية دمت بحفظ الرحمن |
اقتباس:
ولا بد انه تنعاش هاللحظه ربنا يسعدها لأختك ونورت المكان :8: |
اقتباس:
نورتي يعيوني :8: |
لحظة بتوجع القلب مش سهلة ابدا اشكرك |
الكل ممكن يبكي عادي لكن ما حدا جوات الاب لانه بكائه بكون دم مش دمع حته منه بتروح لواحد تاني الله اعلم يطلع ابن حلال ويكرمها او ابن حرام يهينها لكن بتضل هاي سنه الحياه سلم واستلم موضوع رغم فكاهته الا انه يحمل الكثير من المعاني مشكوره يافا |
شىء ببكي وبوجع القلب الاب بربى وبكبر وبعلم بالاخير البنت تروح ع بيت زوجها طرح جميل سلمت يداك |
شيء صعب شيء محزن لللغاية :( جربتو :( يوم آختى :( زكرتيني بهيكك يوم مؤلم شكرآ عوآفى :( |
و لآ مرةة شفت ابوي ببكي متل يوم عرسي و عرس اختي الصغيرةة كل دمعة نزلت من عيونوو كآنت متل السكينة بقلبي انآ جربت هالشي ’ شعور صعب جداً موضوعكك مؤثر يافاآ |
| الساعة الآن 05:11 PM |
Powered by vBulletin® Version 3.8.7
Copyright ©2000 - 2025, vBulletin Solutions, Inc.
Search Engine Optimization by vBSEO ©2011, Crawlability, Inc.
HêĽм √ 3.1 BY: ! ωαнαм ! © 2010
new notificatio by 9adq_ala7sas
User Alert System provided by
Advanced User Tagging (Lite) -
vBulletin Mods & Addons Copyright © 2025 DragonByte Technologies Ltd. Runs best on HiVelocity Hosting.