معاناتي مع الحمام ايام الطفوله

مع , معاناتي , الحمام , الطفوله , ايام

لما كنا ازغار كنا نكره الحمام ليش ؟؟؟
لانه أمهاتنا الله يرحمهم
والعايشات الله يطول بعمرهم
كانو يعذبونا تعذيب لما يحممونا ..
الله العليم لما تقولي قوم عالحمام
أنصرع من الخوف .. تقول قط محشور بغرفه
تبدأ رحلة العذاب من تشليح الاواعي ..
تشلحني البلوزه تقول بتنتّف بريش جاجه ..
وآذاني كل أذن بجهه .
طول ما بتتحمم بدك تظل قاعد مفحج ..
طيب يما والله رجليّ وجّعوني ..
عالسريع بتناولني كف وبتقولي سكّر ثمّك ..
بالنسبه للميّة لازم تكون تحت درجة الغليان بنتفة .
يا يُما لحمي ذاب ( انسلخت ) !!
بيجي الكف الثاني ..
لما تفرك راسي اقسم بالله
تقول بتفرك بمصباح علاء الدين عشان تطلّع المارد
وراسي بلولح يمين ويسار
تقول دالية أيام الشتا مع هبوب الريح
والمشكله لما ينزل صابون عوجهك
وبدها تقيمه بتغير ملامح وجهك ..
غير حرقة العينين
المشكله إنها الصابونة ( المفتاحين أو الجمل النعامه )
أقسى من الحجر .. والفرك فيها الموت اهون منه
نيجي لعند ما تمسك منخارك وتقولك " ننننفففففف يمآ
بتصير تنف من آذانك .. لأنه كل مجاري التنفس مسكرة
فقرة التلييف : ليفه اصليه تقول خريس سلكه
بتمسك الليفة وبتفركها بالصابونة
وهي تشد عليك تقول لحام بسن بسكاكينه للدبح
طبعا ربنا حامينا ..
والا فركها للجسم بجيب شلل رباعي ..
طيب .. هدّي اشويّ يا حجه
أنا حاسس كأنك بتبشري بجبنة ..
طبعا الحمام بالدور .. والكبير قبل الزغير ..
ولما أسمع اخوي الكبير ببكي وهي بتحممه ..
أنا بالغرفة الثانية بصير أبكي من الخوف
ونفسي اهرب من الدار
بعد الحمام بتطلّع عحالك في المراية
والبخار قاعد بطلع من جسمك
كانك طنجرة ضغط مفتوحة .
الاصابع بكونو مجعلكات ومطعوجات
ولون جسمك أبيض واحمر من كثر الفرك .
تعال لتلبيس الأواعي ..
راسك قد قبة البلوزة خمس مرات
وبدها تدخل راسك خاوه ..
بتلبس أول بلوزه وثاني بلوزة ..
ويا ويلك إذا فلتت الكم لما تقولك امسك كمّك
مشان تلبسك لبلوزة الثانية .
نيجي لتمشيط الشعر ..
وحفاظا على تنظيف الراس من القمل والشوائب ..
بتغرز المشط براسك وببلش الحراث
وطبعا في احتمال إنه أسنان المشط يوصلو مخك
_________________
الله يرحم هذيك الايام
الي بضحك بكون مجرب
نسيت اقول انه ما في دش
الحمام من الطنجره أو التنكه مباشره
هههههههههههه

المصدر: منتديات بنات فلسطين - من قسم: النكت والطرائف