|
تعلم مني يا غالي واياك تعيد نفس الغلطة https://i.skyrock.net/0625/69620625/...21634332_1.jpg "تقريباً النا سبع شهور بنحب بعض، بنحكي واتساب وفيسبوك، بنتصل ببعض، وبنضل نحكي للصبح!! دايماً بنبعت صور لبعض، بس ولا مرة التقينا بالحقيقة! مش قادر اصبر لازم اشوفها، واسرح بعيونها، ضروري امسك ايدها ويصير تفاعل كيميائي بيني وبينها!! فتحت معها الموضوع كثير، بس كانت ترفض، لكن آخر مرة ضغطت عليها، وحكيتلها عن كمية الاشتياق اللي محصورة داخل أضلاعي، وشرايين أعصابي، وحواجب صباحي، بصعوبة شديدة وافقت، وقالتلي هاي المرة مش راح اخاف من اخواني اللي بلعبو حديد، عشان عيونك بشوفك نص ساعة مش أكثر!! بلشت أجهز حالي للقاء التاريخي قبل بأسبوع، حاولت أعمل المستحيل عشان أطلع مرتب وأنيق وشعراتي زابطين ووجهي مفتح وعامل كوكو اخذت من صاحبي لبسة، وداينت من ابو حويله (بتذكروه صح) شوي مصاري عشان احلق شعري، واقدر اعزمها ع فنجان قهوة !! وصلت ع الحديقة اللي تفقنا نقعد فيها، استنيت شوي بس ما اجت، ولا من بعيد عم بتطلّع فيي وحده جاي بتقرب عليّ وبتبتسم، هي بتشبها بس أكيد أكيد مش هي، بسرعة خطر ببالي انها اختها وجاي تحكيلي، انها البنت مش قادرة تيجي، وأنو أبوها مسكها وهي طالعة تهرب مثل السنجاب!! بس قربت عليّ أكثر اكتشفت انها هي هي، بس مش هي !! الفرق بينها وبين الصور اللي كانت تبعتهم زي الفرق بين شاكيرا وعباس ابن عمي!! كان واضح كمية لكريم اللي على وجهها أكثر من ثلاث طبقات، مش ضايل بحواجبها غير شعرتين تاركيتهم رفع عتب، جسمها غير، منخارها مش هو نفسه اللي كنت اشوفه بالصور، غرتها غرتها واقفة لفوق زمبركات !! أيقنت ساعتها انو تمت خديعتي، وانضحك عليّ، وانو مش مخلية تطبيق بحليّ الصور الاّ منزليته، وعرفت ليش معها تلفون سعته 64 جيجا، وليش كانت دايماً تتردد نلتقي، بس مع هيك قولت مش لازم اجرحها، خلص بحكي معها كم كلمة ولما نروّح، بسلخها بلوكات على جميع التطبيقات، خاصة سناب شات، لأنه هو سبب لمصيبة اللي انا فيها، من كثر الفلاتر اللي فيه!! لكن الصدمة لكبيرة اللي لحد هسا مش قادر استوعبها لما نطقت، لما حكت، لما شفافها تحركو، يا اخوان صوتها صوتها مش هو!! لما كانت تتصل، كنت احس بحكي مع اليسا، مع فيروز، مع صابر الرباعي، مع شسمو، بس لما قالتيلي كيفك يا بؤبؤ عيني، صوتها كان زي جاروشة القمح اللي كانت تستخدمها ستي بالزمانات !! متخيلتش للحظة في تطبيقات بتحلي الصوت، بتنعم الصوت، بتشقلب عرض الصوت!! بسرعة حسيت بمغص اصطناعي، وخبرتها اني لازم اروح اجيب اختي من الجامعة بعد م الدكتور كحشها من المحاضره، لأنه من فصلين مش دافعة القسط، قالتلي ما بدك تشربني شي، قولتلها مبلى مبلى المرة الجاي راح اشربك اشياء من شغلة وحدة، وهربت زي اللي خايف من اشي يلحقني!! ومن يومها يا ولاد عمتي، ايقنت انو احنا عايشين بكذبة كبيرة، بعالم خيالي يطغى عليه فلاتر لسناب شات، والوان الانستغرام!! ومن الصدمة اللي صابتني الفت قصيدة كندرائية حول الموضوع!! دايماً كنت اشتم حظي واعمل خطه لحد م تعرفت ع البنت اللي مثل البطة كنت اسمع صوتها ومن الفرحة أقلب شطه ووقت اسرح بصورها كنت اتخيلها قطة لحد م التقيت فيها واكتشتف اني واقع بورطةّ!! م كنتش عارف انها عامله عليّ خطة!! حسيت ايدي ارتعشت وصار معي جلطة صرت افكر كيف بدي أسلخها بالبلطة ولكو كيف كيف نخرط عليّ هاي الخرطة طبيعي م فلاتر لسناب شات بتحول القرد لقشطة!! تعلم مني يا غالي واياك تعيد نفس الغلطة!! احسن م تصير تنط مثلي نطة ورا نطة!! انداري_يا_بطه" |
هههههههههههههه يالهوي بالبداية توقعت العكس صراحة خليه بستاهل لأنو بوثق بحب من ورا الشاشة ههههه |
هههههه فرطت ضحكك خليه الله لا يرده |
اقتباس:
لانه النهايه غير هيك هي الي بصير صدقيني لانه الحب من ورا شاشه هبل وجنون نورتِ خيتي مينو |
اقتباس:
وانا كمان رايي مطابق هي نهايه الهبل اشكرك للمرور |
الطابع الفكاهي والمزح موجود بالقصة ورغم كل شي ورغم عدم ثقتي بحدا ع النت لكن لما حب البنت شافها بالأول وبعدين حبها ولا حبها وحب شخصيتها وافكارها واسلوبها ؟ حتى لو ما قبل بالشكل بعدين ما كان لازم يجرحها بهيك اسلوب وبعتقدش انه هو ايفانز ولا سمرهولدر عوافي مؤيد |
اقتباس:
اكيد هي قصه خياليه مقتبسه من واقع فينا نحكي عنها صفحات ونعلق ما حكينا الرجال احلى ولا بشع منها عالاقل الرجال ما غير بشخصيته ولا حط مكياج وحومره وبودره وغير معالم شخصيته لكن هي حتى خارطه وجها الاساسيه مش مبينه ومتحوله من بنت لقرده هههههههههه |
مش ضايل بحواجبها غير شعرتين تاركيتهم رفع عتب، جسمها غير، منخارها مش هو نفسه اللي كنت اشوفه بالصور، غرتها غرتها واقفة لفوق زمبركات !! ههههههههههههههههههه يخرب عقلك يا مؤيد بصراحه احلى موضوع ع الصبح فطست ع التعابير وع الكلام بغض النظر انه الموضوع حقيقي واحنا بنشوف بعيونا ابشع انواع المكياج اللي بحطوه البنات والامر التاني هو فعلا الجوالالت الحديثه اللي صارت تحول القرده لورده بس بالاخر الحقيقه رح تظزهر وللكل لشو التصنع اذن؟! اجمالا الموضوع رووووووعه ما ننحرم مواضيعك الحلوه مؤيد ويسعد صباحك |
اقتباس:
ونويت انقله هون ضليت اضحك ساعتين عالتعابير صحيح هي قصه خياليه لكن اكيد فيها شي من الحقيقه هادا السناب شات بعمل من المكنسه عروس ههههههههه يسعد صباحك وردتنا الحلوه |
ههههههع الله لا يرده يعطيك العافيه |
ههههههههههههههههههههه اقسملك الي فترة كبيرة ما اضحكت .. خليتني اضحك خاوة .. لا وشو عاشق ولهان الاخ .. والف قصيدة هههههههههههههههههههه يعطيك العافيه مؤيد تسلم ضحكتني بجد .. ودي لك |
| الساعة الآن 11:59 AM |
Powered by vBulletin® Version 3.8.7
Copyright ©2000 - 2025, vBulletin Solutions, Inc.
Search Engine Optimization by vBSEO ©2011, Crawlability, Inc.
HêĽм √ 3.1 BY: ! ωαнαм ! © 2010
new notificatio by 9adq_ala7sas
User Alert System provided by
Advanced User Tagging (Lite) -
vBulletin Mods & Addons Copyright © 2025 DragonByte Technologies Ltd. Runs best on HiVelocity Hosting.