عزيزي_الشآب_ركز_معي

قبل ما تحكي عن البنات نفسيات ونكديات
جرب تعيش مثلهن
جرب تقعد في البيت شهر كامل بدون ما تطلع ترفه عن حالك
بدون ما تشوف صحابك
جرب تعيش شهر تصحى من الصبح تطلع ع الجامعة
ثم ترجع تغسل و تنشر و تجلي و ترتب و تنظف و تخبز
و فوق هيك فش كلمة شكراُ يعطيك العافية فش هدية صغيرة تسعدها ..
بينما انت لو رحت ع الجامعة بترجع تعبان و بتمن على أهلك إنك بتدرس
و بتعمل مشكلة لو ما لقيت الأكل جاهز
.
جرب تعيش دور البنت المُرَاقبة من أهلها على كل تحرك
وبحسسوها إنها مش ثقة " وين رحتي ,
هاتي أشوف تلفونك ,
هاتي فيسك ومين بتكلمي و تحقيقات معها بس عشانها بنت
بدل ما يزرعو فيها الثقة و يمنحوها كل الحب والاحترام
مقابل تعبها و عطائها الكبير "


تخيل تعيش دور البنت وأهلك يتحكمو فيك
و يعاملوك كإنك بلا قلب وبلا عقل
و يحكولك ما تصاحبي فلانة و ما تمشي مع فلانة
رغم إنو فلانة منيحة و فهمانة بس أهلك معقدين


جرب تعيش محكوم من إخوتك و ينشفو ريقك
وكل يوم يسمعوك كلام مؤذي للنفس دون أي مراعاة لمشاعرك
جرب تنحرم تدرس التخصص إللي بتحبه في الجامعة
و كتير أحلام شايف نفسك قادر تحققها و تخدم المجتمع
و تسعد نفسك لكن عشان انت بنت محروم و ممنوع


جرب تعيش دور البنت و تشوف كمية المضايقات
والنظرات والمعاكسات لها و بخلوها تقرف حالها
جرب تعيش دور البنت إللي أبوها ما بقعد معها وأخوها مش متقرب منها
وعايشة في البيت وحيدة بدون اهتمام وحب و بتحس حالها عايشة بقفص
.
جرب تعيش دور البنت إللي بتلاقي شاب بضل يحاول يضحك عليها
بكلام الحب و هي عارفة إنو كذاب
و متضايقة عشان مستخف بعقلها و بفكرها هبلة
جرب تعيش دور البنت وكلام الناس عليها ( ليش لابسة هيك )
رغم إنو لبسها عادي ومستور
لكن إلهم خاطر يحطو عليها خيمة
بدل ما يعالجو عقولهم المعفنة
ويصرفو نظراتهم الشيطانية عنها و يتركوها بحالها
.
جرب تعيش دور البنت لما تتخرج وهي لسا مش متزوجة
والناس كل يوم يقرفوها حياتها ( ليش لليوم ما تزوجتي )
و بضلهم يحسسوها إنها بايرة رغم إنها عظيمة و رائعة و بتسوى ألف شاب
جرب تعيش دور البنت المتزوجة و عندك 3 أطفال بوجهك ليل نهار
و عليك تلبسهم و تنظف إلهم و تطعميهم و تلاعبهم و تربيهم و تدرسهم
بديش أحكيلك جرب تحمل 9 شهور و تلد لإنو هالأمر مش بإيدك
جرب تعيش دور البنت لمدة شهر و شوف كيف راح تصير أنكد من النكد نفسه
جرب عشان تعرف حجم التعب الجسدي والنفسي إللي بعيشوه
و بعدها راح تقدس أمك وأختك وزوجتك و تبذل كل جهدك حتى تسعدهم
.
شكراً لقلوبهم الكبيرة إللي متحمله عقولنا الصغيرة
شكراً إلهم عشان متحملات هالحياة بكل هالظروف
شكراً إلهم عشان رغم كل شئ بيضحكو
و بيزرعو الورد والفرح والحب والحنان في كل بيت
يخلف عليهم إنهم صابرات علينا
يخلف عليهم لإنو احنا بدونهم ما بنقدر نعيش
كل الحب والراحة لقلوبهم الرطبة بالأمنيات الجميلة .

المصدر: منتديات بنات فلسطين - من قسم: زوايا عامة