|
قصة بنت كان معها سرطان.. صار معي سرطان بعد عرسي ب 3 شهور، كنت احكي لأمي انه راسي بوجعني ودايخة تحكيلي يمكن حسد، وبعد العرس حكتلي يمكن من الحمل، بس اخر مرة قلبت عالأرض ، صحيت لقيت حالي بالمستشفى ! كان وجه امي ما بتفسر؛ وزوجي واقف عجنب ومش عارف شو يحكي .... حكتلهم شو في ؟ حكولي هلئ ارتاحي ما فيكي الا كل خير... ما بعرف كنت تعبانة كثير ومش مركزة بس ما صدقتهم ..... بعد يومين ، اجا زوجي ومسك ايدي، قلي حبيبتي بدي احكيلك شغلة ، تفاقيد ربنا رحمة ! وانا عارف انك قوية ورح تتحملي، عندك ورم صغير، بتتعالجي وبترجعي مثل اول وأحسن ... انا وقتها انصدمت وصرت أعيط قلتله رح اموت صح خلص ما في امل احكيلي كم ضايلي .... قلي ولك بلا حكي مسلسلات مش رح تموتي ، بس لازم تبلشي جلسات كيماوي .... هالكلمة وقعت على راسي مثل الصاروخ! وعطول خطر ببالي منظري كيف رح يصير، ووجع العلاج، وأكيد زوجي رح يتركني حكتله رح تتركني صح ! ضحك وقلي مالك انهبلتي مش رح اتركك ، ورح اصير اجي استناكي بعد كل جلسة.... بس انا رفضت العلاج؛ قلتله بدي اموت هيك ولا اتعذب واموت وانا خسرانة كل شي وروحت عالبيت! اجت امي لعندي واهلي وكلهم يقنعوني اتعالج ورفضت... ثاني يوم لقيته جاي وحالق عالصفر كل شي! اطلعت في وحكتله ليشششش بحب شعرك! قلي خلص هيك بطلتي تحبيني يعني؟ قلتله : لا بحبك ... قلي اذا جهزي حالك للعلاج وفعليا اقتنعت منه ..... اول جرعة كيماوي، دخلت لحالي عالغرفة، حرقتني حرق، حسيت بنار بتمشي بجسمي، وللحظة شفت الموت، وبعد ما خلصت نمت كثيررررررر ! صحيت لقيت ماسك ايدي وجنبي ، وبحكيلي كيف صرتي .... عيطت وحكتله متوجعة ... قلي رح تمشي .... وصارت حالتي بعد كل جلسة اخسر شعري؛ والشغلات الحلوة الي فيي.... بشرتي كانت باهتة كتير وعيوني ذبلانين، كنت اطلع عزوجي بحسرة واحكي شو ذنبه يعيش هالحياة معي .... بعد فترة من العلاج قللتله طلقني،،،، حسيت اني ظالمته معي ، بتذكر وقتها عصب علي وصار يحكيلي حرام عليكي انا مقصر معك بشي ! قلتله لا والله بس انا ظالمتك ! قلي هيك ربنا كاتبلنا ولو انا صار معي هالشي متأكد ما تخليتي عني ضلك قوية ! ثاني يوم كان عندي جلسة، كان في وحدة متزوجة معها سرطان كمان اشوفها قبل الجلسة دائما، كانت تحكيلي كيف زوجها طلقها بعد ما عرف انها مريضة ، وكيف دار حماها بعاملوها! سألتها طيب انتي ما تزوجتي عن حب! قالتلي حب 4 سنين ... وبعد هالحب تركك عشان مرضتي! قالتها والحسرة بعيونها، للاسف كان يحب شكلي ..... وقتها شفقت عليها جد، تذكرت كيف زوجي تقدملي بطريقة تقليدية؛ ورفضته، وبعدها رجع تقدملي ورجعت رفضته ، ولحد ما تعرفت علي وارتحتله وافقت علي ! سألت الممرضة عنها، قالتلي اعطتك عمرها! انا وقتها صابني انهيار ما عرفت اتحكم بحالي، صرت اعيط واحكي اكيد رح اموت مثلها اجا زوجي لعندي وشافني هيك انجن قلي شو في ! حكتله القصة زعلللل كثير وحضني، قلي والله رح تعيشي هسا كنت عند الدكتور وحكالي انك متحسنة كثير ! فتت عالجلسة وطول الوقت وصورة الست للي ماتت براسي؛ يا الله اكيد ماتت من حسرتها، اكيد ماتت وحيدة ولا حدا كان معها ! طلعت بعدها ... وضليت فترة مكتئبة كثير، بس زوجي ما قصر ليغيرلي جو، يحسن نفسيتي، يساعدني بكل شي كنت حابة كل ذرة بحياتي مشانه بس! عشانه كان قوتي وقت ضعفي ... فعليا انا انشفيت من هالمرض، وحياتنا رجعت طبيعية وصار عندي بنوتة اليوم سميتها على اسم الست الي شفتها بالمستشفى! بس دائما احكيلها اوعك يا ماما تتزوجي واحد حب شكلك وبس، تزوجي واحد حب روحك الحلوة، عقلك الكبير، تفكيرك ! تزوجي عشان لو وقعتي يوقفك وما يتركك ! طبعا بنتي بتصفن ومش فاهمة شي ... بس بتحكي اتزوج واحد مثل بابا ! حكتلها اه ... تزوجي عشان الزواج استقرار ، تزوجي الشخص الي بدك تقضي كل عمرك معه لو شو ما صار لاي حدا فيكم! تزوجي الي حب قلبك وروحك مش الي حب شكلك ، واعرفي انه الزواج في ايام حلوة كثير وفي ايام مرة ! بس مع لي بحب روحك كل الزعل رح تنسي ..... اجا زوجي وقلي شو بتنمي انتي وبنتك قلتله بنننم فيك، عشانك مش منيح بالمرة 😂 قلي بكفي انتي منيحة 🙈 |
قصه روعه فعلا في رجال مخلصين مع انه السرطان مرض وسخ وحقير وانا جربته مع ابوي لكن الشافي هو الله واحكيلك شي كلنا بدنا نموت سواء بسرطان او غيره موته وحده وبس نيال الي بموت وهو راضي عنه ربنا اشكرك يافا اندمجت كتير بالقصه |
صراحة مو قادره اعلق بكيت وانا بقرأ بالقصة ذكرتني باختي الله يرحمها ومعاناتها مع هالمرض |
قصة حزينة كثير من الصغار والكبار الذين يعانزن من هذا المرض هاي القصة ذكرتني ف بنت خالي يلي ماتت بهاد المرض ^~^ ربي بشافي كل المريضين فيه ويبعده عنا وعن الجميع والدعم النفسي للمراءة من زوجها شي تاني وبتقاوم اي مرض كان فيها يعطيك العافية |
انا برأي انها قصة جميله لزوج مثالي برغم انه في مرارة زوجه اتوفت من نفس المرض لاحظوا العامل النفسي هنا والفرق بين الزوجين الا ان صاحبة القصة شوفيت جدقصه قمة الروعه ميرسي |
ليش خليتيني اعيط وحياة الله ما قدرت امسك دموعي اتأثرت كتير بالقصة |
بكيتيني والله الله يبعد عنا هالمرض ويشفي كل مريض ي رب شككرا لالك |
اسفه فتحت عليكو المواجع.. الله يبعده عنا وعن كل احبابنا. مؤيد ولونلي والملاك البريء وابتسآمة عآشقه وسارة وميما. نورتوآ ♡ |
قصة حب صادق بين زوجين انه الحب الصادق الوفي انتظر بشوق القادم من يراعك الماسي يارائعه |
يالله شو تاثرت فيها القصة اناعشت شبيه من هذه القصة ولكن مع امى اقرب الناس لى اللهم اشفى كل مريض فتحتى عليه جروح عميقة مشكورة حبيبتى |
| الساعة الآن 07:39 PM |
Powered by vBulletin® Version 3.8.7
Copyright ©2000 - 2025, vBulletin Solutions, Inc.
Search Engine Optimization by vBSEO ©2011, Crawlability, Inc.
HêĽм √ 3.1 BY: ! ωαнαм ! © 2010
new notificatio by 9adq_ala7sas
User Alert System provided by
Advanced User Tagging (Lite) -
vBulletin Mods & Addons Copyright © 2025 DragonByte Technologies Ltd. Runs best on HiVelocity Hosting.