منْ على متنْ آلقآرب.

#1 03-05-2017

الجزء الأول وآلثآني.
ماما شو بدك تطبخي اليوم .. اكيد كالعادة بطاطا ما ؟!
الام: مفركة بطاطا يامو .. عاونيني حبيبتي .
راما: اوف يا امي ما بدها تخلص هالبطاطا ! 🙁
ريم : لك يامو احمدي ربك في عالم الخبز مو لاقيته .
راما : الحمد لله ما حكينا شي .. طيب قديش النا ما اكلنا لحمة ؟!
ريم : معلش امي بكره ابوكي بيرجع وبتنصلح الاحوال وبنعمل شو ما بدنا .. كلها شوية وقت !!
راما : لك صحيح يامو مطول هالوضع ؟
ريم : اي وضع ؟
راما : وضعنا .. حياتنا .. الخراب والدمار .. هالحرب مطولة .. الدم اللي عم نشوفه كل يوم مطول .. انه نفيق الصبح على صوت الدمار والقصف مطول انه نفيق وجارنا عم يبكي لانه فقد ابنه مطول وجارتنا عمتبكي لانها فقدت كل ولادها وما عاد ضللها سند مطوووول .. دخيلك يامو جاوبيني ؟!
ريم : لا حبيبتي مو مطول كلها كم يوم وبتخلص وبكرة بدل الشمس بتضوي شموس <3
راما: عم بتواسيني والا عم بتواسي حالك ؟!
ريم: لا هيك ولا هيك عم ادعي ربنا يعجل بالفرج .. وعم طمنك لك امي. وان شالله قرييب هالفرج
راما: يعني رح ارجع العب مع رفقاتي؟كتيير اشتقتلهم؟؟ رح روح ع المدرسة؟ رح اشتري كتب ودفاتر جداد والوان ودفتر رسم ؟؟ احكيلي امي ؟؟ بدي شوف انستي .. كتير اشتقلتلها !!
ريم: ايه يامو كل شي رح يرجع طبيعي .. وبكره بتصيري تبكي وتشكي الصبح وتحكي يامو خليني اليوم ما روح ع الدرسة !!
ورح تروحي تلعبي بالحديقة اللي قدام بيتنا .
ورح تغلبيني معك وانا عم طعميكي بالزور .. لك امي شو بنا .. اصبري شوي !
راما : هههههه لك امي اي حديقة ؟ ليش عاد في قدام بيتنا حديقة ؟
ليش اصلا عاد النا بيت ؟
ريم: لك امي عم احكي بكره مو اليوم !!
شي كم يوم بس وبرجع الوضع متل ما كان واكيد بيتنا والحديقة اللي جنبا رح ترجع متل الاول واحسن .
راما : صدقيني عم بتواسيني يامو .. وانا عرفانة انه هالوضع كل ماله لورا ..
لك امي اشتقت لرفيقاتي شهد وسارة وسعاد .. لك اشتقت لولاد حارتنا بسام وايهم .. وهداك السئيل اللي دايما كان يضربني ونحنا عم نلعب بالحارة .. شو كان اسمه زكريني.. ايه ايه تزكرت اسمه وسيم .. لك حتى هاد يامو اشتقتله .
ريم : بكره بنرجع لبيتنا وبترجعوا تتخانقوا كتير وعاد خود انه نهدي الوضع بيناتكن .. كالعادة ^^
راما: طيب امي اشتقت لاخي اللي مات كتييير كتير اشتقتله .. احكيلي يامو هاد كيف بده يرجع ؟
لك وعمي اللي انقتل .. هاد كيف بده يرجع ؟؟
وعمي التاني يلي بالسجن يلي لهلا ما عرفنا عنو شي
وبنت عمي وستي وجدي لك يامو وخالتي فهمية .. احكيلي امي كيف بدهن يرجعوا ؟!
ريم والدمعة بعيونها: لك ايه صحيح امي شو حكيتيلي نطبخ اليوم ؟!
راما بصوت مخنوق : مفركة بطاطا يامو .. مفركة بطاطا !!
هاد الحكي وعاد النقاش كانت راما عمتتزكرو
لما كانت عمتحكي مع امها.. والدمعة بعيونها مو عرفانة شو تحكي ولا شو تعمل
لانو امها لما كانو مهاجرين لعند ابوها قلب فيهم القارب وغرقو واتفرقو عن بعض.. بطلت تعرف راما ازا امها ماتت ولا لساتها عايشة
ضلت راما فترة وهي تدور بس بدوون جدوة.. فكرت انها ماتت واسودت الدنيا بوجهها وضلت تبكي طووول الليل… لحتى ما وصلت لعند ابوها.. كانت مفكرة اول ما توصل لعند ابوها انها رح تقعد بحضنو وتبكي وتحكيلو يلي صار فيهم بالبلد وانها خسرت امها بالقارب.. بس كانت المفاجأة الكبيرة يلي قسيت ع راما وسكرت الدنيا بوجهها انو طلع ابوها متزوج
خافت كتيير.. بس لما فكرت بالموضوع ولانها بنت صغيرة وقلبها طيب حكت انو ممكن تكون مرت ابوها منيحة وفكرت تحتمي فيها وتعتبرها متل امها خاصة انها هاجرت من بلدها و وتركت ذكرياتها الحلوة والمرة معها.وامها توفت جديد وما كانت لسا طالعة من الصدمة يلي هية فيها . اتهجرت وهي مكسورة
راما بنت عمرها 16 سنة ماتت احلامها وطفولتها بالاحداث يلي صارت ادامها.. وبوفات امها يلي كانت كل شي بالنسبة لالها.. ويلي كانت الوحيدة يلي تصبرها وتواسيها عهالشي
بس ما كانت بتعرف شو ناطرها
مرت اب بمعنى الكلمة.. مع انها كانت راما طفلة صغيرة وقلبها طيب بس سوسن وهي مرت ابوها كانت كتيير قاسية معها وكانت تعاملها متل الخدامة
كانت سوسن عمتحاول تقنع خالد ويلي هو زوجها انو ما يكملها تعليمها لبنتو وانها تكون خدامة لالها لانها حامل وخايفة عالبيبي
بس خالد كان بحب بنتو وما وافق وسجلها بالمدرسة وكانت من الاوائل بتحب مدرستها ورفقاتها.. بس سوسن كانت تستلمها اول ما تدخل عالبيت تخلي كل شغل البيت فووق راسها
وكانت راما تشتغل من تم ساكت لانو كان قلبها طيب وكانت خايفة من مرت ابوها ما تعلم ابوها عليها
وبالفعل صار يلي كانت خايفة منو

المصدر: منتديات بنات فلسطين - من قسم: قصص أدبية , روايات , حكايات , تاريخ الأدب والأدباء

lkX ugn ljkX NgrNvf> lku

منْ على متنْ آلقآرب.

الجزء الأول وآلثآني. ماما شو بدك تطبخي اليوم .. اكيد كالعادة بطاطا ما ؟! الام: مفركة بطاطا يامو .. عاونيني حبيبتي . راما: اوف يا امي ما بدها تخلص هالبطاطا