يما اعمليلي مسخن و كثري عليه البصلات و تنسيش السماك ~
بس أنا اليوم بدي أعمل ركاك و عدس مشان أدفي عظامك إنت و اخوانك ~
يما مشان خاطري اعمليلي مسخن ~
خلص يما بتؤمر أمر، طبعا منتا آخر العنكود بطلعلك كل شي~
حبيبتي يما والله غير أرفعلك راسك عن كريب
و تكولي صحيح هالولد هامل و مشكلجي بس سدكوني مخلفتش غيرو ~
هههه أسكت ولا هسا بسمعوك اخوانك و بزعلو ~
يما كيف كان شكل أبوي ؟؟
يما منتا عارف كيف كان شكله،
هو أنا بدي أظل أكلك كيف شكله !!
هو صحيح استشهد في النكسة و كصفولنا الدار و راحن صوره معها
بس صورته يما محفورة في كلبي من جوى ~
ههههه كنتي تحبيه يما و مش كادرة تنسيه يلا اعترفي !! ~
ولا يا أزعر، اه كنت بعشكه كمان ..
كانن شواربه خمال بوكف عليهن صكر
و كانت عنده شامة عخده
و لا غمازته تكول حفرة في خده ..
لما كان يطل في بدلة هالجيش كل بنات البلد يوكفن عالشبابيك ~
هههه ول ول هاظ الحج كاين توم كروز بزمانه ~
اخرس ولا تتخوثش و يلا روح من وجهي مشان أعملك المسخن ~


‏بعد_شوي :
يما مخلصش الأكل .. متت جووع ~
يما هالولد شو كردك عجوول .. خلص هيو جاهز تع كل ~
يا باااي مزكا هالريحة ..
بتعرفي يما إني بشم ريحتك في المسخن !! ~
يا عزااا يعني ريحتي بصل يا عكرووت ~
هههه لا يا غالية مش هيك كصدي ..
تزعليش ريحتك مسك يا تاج راسي ~
يمااا منك إنت .. كول يما صحة و عافية ..
مطرح ما يبني يأسس يا حبيبي ~
#بعد_شوي :
هيني طالع يما .. بدك إشي !! ~
وين رايح يا حبيبي !! ~
رايح عمكان بجنن يما ~
طيب يما تعال أبوس هالخدود الحمر ~
هههه هسا صرتي غشيمة عن خدوودي !! ~
شف الحيوان .. بس حاسس إني رح أشتاكلك بس تطلع ..
خليني أشم ريحتك يما ~
هههه خذي شمي يا حجة منا كالولك عني أكسجين ..
بس بدي آخذ هالشغلة من الغرفة ~
بعد_شوي :
راح محمد الله يسهل عليه ..
خليني أكووم أنظف غرفته هسا كايمة كاعدة ..
إييه بسم الله الرحمن الرحيم ..
هذي الغرفة مرتبة .. كنه الولد مرتفعة حرارته ..
شو هاي الوركة !! خليني أكراها ~
المكتوب في الرسالة :
يما بحبك كد الدنيا ..
بتعرفي ليش خليتك تعمليلي مسخن اليوم
مشان يظل طعمه في ثمي و يكون آخر إشي بذوكه ..
شفتي لما حكيتلك بشم ريحتك بالمسخن،
ما كان كصدي إنه ريحتك بصل يا غالية،
بس إنتي أعطيتينا كل سنين عمرك ..ولا مره شكيتي
و كل مرة بتطبخي بتحطي من نفسك في الطبيخ ..
يما أنا لو أشم ريحتك بين كل أميات الدنيا رح أعرفها !! فش زيها يما ~
بتعرفي يما لما سألتك عن شكل أبوي ؟
مكانش كصدي أتزانخ عليكي،
كنت بدي أتأكد من ملامحه و أحفظها
لإني كمان شوي رح أشوفه و ألتكي فيه
و أحكيله ليش تركتني يابا ؟؟
بدي أبوس إجريه و أميز ريحته زي ما بميز ريحتك يما !!
يما حبيبتي
كلبك كلك إنه هاي آخر مرة رح تشوفيني
عشان هيك بستي خدودي الحمر و شميتي ريحتي ..
رح تشتاكيلي يما بعرف و رح تشتاكيلي كثير !!
بس رح تزغرتي و رح تفرحي، يما اللي بستشهدو
مش أحسن مني و إمياتهم مش أحسن منك !!
#‏فلسطين بدها شبابها يما، حتى لو كنت آخر العنكود ~
اليهود يما بفركووش بين وحيد أهله و بين زغيرهم و بين كبيرهم ! !
والله ما بفركوا ~
ما رح نستناهم ييجونا، احنا رح نروحلهم بإجرينا ..
هاض كدرنا يما، احنا انولدنا عشان نموت !!
إنتي مرة مؤمنة يما !
بالله عليكي تعمليلي عرس زي اللي كنتي تكوليلي عنه دايما ..
بدي زغاريطك تصل للكدس يما ..
ابنك ما مات يما عالفاضي !!
ابنك استشهد عشان فلسطين !!
هاي فلسطين يماا !! لازم نمووت عشان فلسطين
ارضي يا غالية عليه
طلعت تركض في الشارع و تنادي يآآآآآ محمد،
يماااا فلسطين مليانة شبااب يمآآآآ..
ليش إنت يما لييييش !! خليك يما مشبعتش منك ~
طيب كان أكلت كمان شوية مسخن و دبيت بطنك يا حبيبي !!
مين بدو يطعميك هسا !!
طيب ليش رتبت الغرفة ؟؟
كان خليتها معفشكة زي دايما مشان أشم ريحة أواعيك و أضل اتزكرك
يحرم علي طبيخ المسخن من بعدك يا محمد يماااا !!
أخذت ضحكتي و رحت يما ،
تعال تزانخ علي يا محمد تعال !!
نطت الجارة من الشباك،
هااااي يا ام محمد تع شوفي محمد وجهه منور عالتلفزيون ..
طعن ثلاث و استشهد ..
هنيتي يا خيتي هنيتي .. لولولوليييييييش !!
كعدت ام محمد في نص الطريك و بعديها مكامتش !!


اوجعتني جداااا
:ghoo:

المشاركة الأصلية كتبت بواسطة تْـۄلَيْـنّ (المشاركة 2553636) فعلا اشي بوجع القلب الله يرحم شهدائنا يا رب ويصبر امهات الشهداء اشكرك مؤيد ع موضوعك المميز تحياتي

المشاركة الأصلية كتبت بواسطة ميماا (المشاركة 2553669) يآ الله بكيتني والله اشي بوجع وبيحرق القلب الله يرحم كل الشهدآ ويصبر اهلهم ي رب شكرا ع الطرح ما ننحرم

المشاركة الأصلية كتبت بواسطة hosam (المشاركة 2553724) بتوجع القلب والله يخوو يسلموو ع نقلك ربي يرحم كل شهدائنا البطال تحياتي لك