منتديات بنات فلسطين - إنها_لخزوة

- حكو معي من المدرسة !

قالولي ابنك عامل مشكلة تعالي بسرعة !

أنا سمعت من هون و يطير عقلي و اشرق بالقهوة الي كنت احتسيها ،

و تطلع من مناخيري بوجه إم سالم ، حكيتلهم ثواني و بكون عندكم ،

و قمت زي المجنونة ألم فناجين القهوة و احكي لإم سالم
( بالله عليكي تسامحيني ، بكملك فتح الفنجان بس ارجع ،
هسا بكونو الولاد ملتمين عليه شلاويت ، ولك ابني مسكين ،
و لإنو وحيدي برج عليه رج ، ولله لأحرق المدرسة ازا حدا لامسو !
بالله عليكي لا تزعلي .. )]��

المهم قمت اركض و من العجقة لبست عبايتي بالشقلوب ،

و لفيت الشال ع راسي زي الي بربط بسكيلتو بجنزير ،
و نزلت بشبشب الدار ، و شغلت سيارتي و ضليت طايرة !��

دخلت عالمدرسة الشرار بقدح بين عيوني قدح ،

ناوية شر ! مجهزة وضعية البسة الي جاي تدافع عن ولادها ،

دخلت عالادارة ونا عبايتي وراي طايرة زي زورو ،

بس الي خرب المشهد البطولي اني كنت ألاهث !

المهم لملمت حالي و حكيتلهم وين ابني !

جيبولي ابني ! شو عاملين بإبني !��

مدير المدرسة حكالي تفضلي اقعدي لو سمحتي ،

خدي نفس ! و جيبولها كاسة مي !

أنا قعدت و مسكت طرف شالتي الي فالت و رميتو ع كتفي ،

و حكيتلو بلا مي بلا بطيخ ! وينو الولد ،

حكالي هيو برا بالساحة مش صاير فيه اشي !
حكيتلو و شو بعمل بالساحة ! نادوه بدي اشوفه !
المدير ضحك ضحكة خبيثة و حكالي ابنك يا مدام معاقب ،

لإنو مش راضي يعترف انو هو الي دفش خالد عن راس الدرج
و شعتلو تشعتل و همة نازلين عالفرصة !��

و خالد هسا بالمستشفى مكسورة ايدو و سنانو الأمامية ضايعة !
أنا فعيت فيه ! ( ابني !! رشودة يعمل هيك !!

لا انتا غلطان ! انا مربية ابني منيح ! و لو عمل هيك كان اعترف !
جيبوه و خلينا نسألو ! بدكم تبلو ابني ! فعلاً انكو مدرسة فاشلة !
ولله لأعمل ولله لأسوي .. )

طبعاً صوتي كان موصل لحماماات المدرسة الي بالجهة التانية ! ��
آخر اشي جابوه لراشد ،
مدمع و مسخسخ كاين من العياط و خدودو حمر زي البندورة لإنو ماكل كفين ،

و أول ما شافني رجع يعيط و ركض بحضني !

انا شفتهم عاملين بإبني هيك ما خليت !

صرت اسب عالمدرسة و عالاستازة و عالمدير !
لإنهم ظلمو ابني البريء ،

و حملت الولد و شنتتو و حكيتلهم مش مرجعة ابني غير لما تعرفو الحقيقة و ترنو عليه تتأسفولو ، ��
المهم رجعت عالبيت و خلص النهار

و اجت ام سالم تسهر عندي و قعدت أخرفها عن المدرسة و شو عملو بإبني
و كيف ظلموه و قديش ابني مسكين و بإذيش و مربى ،
و قعدت ألقي خطابات مدح بإبني ]❤

فات رشودة عالصالون حامل بكيت شبسو و بسوق ع بسكليتو الصغير ع مهلو ،
صف البسكليت ع جنب و اجا قرب عندي ،

و مسك طرف بلوزتي بأصابعو البرتقاليات و حكالي ( ماما احكيلك ثر )

حكيتلو احكي ي روح ماما ، و أنا احسس ع راسو قدام ام سالم ،
حكا : ( ماما انا دفثت خالد الثبح بالفرثة ،

لإنو ما ردى يعتيني الثلن الي ثرئناه من ثمير ،
لا تحكي للاثتاذ عني يا ماما .. ) ��??