حياة وعايشينها ( ٢ )

٢ , حياة , وعايشينها

انا بنت مش عاجبني العجب، #ما_بدي_اخطب_اي_حدا بتقدملي ، بدي واحد مثل بقلاوة التركي ، او مثل الممثلين التركيين عضللنجي ورومانسي ، بدي صاحباتي يحسدوني علي .... واشوف حالي في
قبل كم سنة ؛ كانوا يتقدمولي اشكال الوان، وانا ارفض ...


بتذكر اول واحد تقدملي، اول ما شفته فرطت ضحك، كان كرشه قدامه، بس فتت اقدم العصير مقدرتش اثبت صرت اتمسخر علي قدامه، وابوي جحرني وامي بهدلتني ...


ثاني واحد تقدملي، كنت واقفة على الشباك شفت شبين ماشيين واحد حلو والثاني بشع كثيرررر، كيفت يومها قلت اكيد الحلو جاي يطلبني، بس وصلو كان واحد قصير وذنية كبار ومنظره بضحك كثير كمان مرة رفضت


مرة كنت بالجامعة قاعدة مع صاحباتي اجت مرى كبيرة لعندنا ولبسها كثير مبهدل، سألتني انتي خاطبة يخالتي، حكتلها لا!
قالتلي اعطيني رقم اهلك، قلتلها اشوف ابنك، بس طلعت صورته ، ضحكتي وصلت اخر الجامعة وصاحباتي كلهم صارو يضحكو ، ولاااي مثل صحن الكبدة شكله !


بتذكر بمرة ، كنت قاعدة بعرس، هسا انا بيضا وحلوة وعيوني ملونين ، يعني فش مرى ما بتطلبني لابنها!
شو بدهم احلى من هيك، اجت وحدة واطلعت علي، وحكتلي اعطيني رقم داركم؛ انا اعطيتها ...


روحت عالبيت، واتصلو يومها، اجو، كان ابنهم حلو، فوافقت اقعد معه،بس لاطة بعرفش يحكي، كلمتين عبعض؛ وبضل يحكي كيفك طول القعدة ، ما طقته !


وضليت هيك ارفض وارفض، وكل حدا بتقدملي اطلع في مية عيب وعيب، واعجب تعليقات علي، بالاخر حبيت شب؛ الشب كان حلو كثير مثل ما بدي واكتر؛ ورومانسي ومزوق وبجنن ، ضليت احبه سنة، وصارت مشاكل بينا وقلتله يخطبني، واجا خطبني، كنت طايرة من فرحتي، بس بعد سنة من زواجنا؛ اتغير كثير، لقيته بحكي مع مليون بنت وحتى واحنا خاطبين، وكمان حركاته مش مزبوطة وما بحترمني برجع متأخر، كنت حامل وقتها، اضطريت اضل معه، لما ولدت، ولدت ولد معاق !
كان الولد عنده تشوهات خلقية كثير، عاش شهر واتوفى تذكرت تفاهتي زمان؛ كيف كنت اعلق عللناس واتمسخر عاشكالهم، كيف ما كان يعجبني ولا حدا، وبعد فترة اطلقت ورجعت عبيت اهلي؛ وضليت استغفر واتقرب من ربنا ، لاتقدملي واحد منيح ، وتزوجته، ما كان حلو، بس عيشني احلى عيشة وعوضني عن كل شي !


نصيحة يا بنات تبنوش احلام وردية، الرجال بافعاله مش بشكله ولا بجيبته ، ولا تتمسخروا عاشكال الناس ، كلنا خلقة ربنا وما حدا خلق حاله


بقلم /



هديل قاسم

المصدر: منتديات بنات فلسطين - من قسم: قصص أدبية , روايات , حكايات , تاريخ الأدب والأدباء