طول عمري وأهلي مربيني على مبدأ ( الزلمة ما بينعاب ).. من لما كان عمري 11 سنة وزعلت لما جارتنا مسكتني أنا وبنتها , أبوي ضحك ودق على ضهري وحكالي إياها " خلص يابا تتضايقش , إنت هلأ زلمة والزلمة ما بينعاب " ..


--------


لما صار عمري 15 سنة صرت أروح أوقف على باب مدارس البنات مشان أشوف أحلى بنت , وأشوف حبيبتي , وصاحبتها اللي صاحبي بدو يصاحبها , وبس يمرق حدا من قرايبي يأشرلي بإيدو ويسلم علي ويروح , طبعا صرت أحكي مع بنات , وصرت أشوف حالي الزلمة المتيم , وأسمع أغاني حزينة , وأحكي بنصاص الليالي مع البنت اللي بدي إياها وما كان حدا من أهلي يدخل علي , حتى لما تدخل إمي تناديني عالعشا ما كانت تسألني مع مين بتحكي ..


بفترة التوجيهي وبعد ما حكيت مع ما لا يقل عن عشرين بنت , رسيت البر على وحدة وكنت أحبها وتحبني وإمي بتعرف عنها وبتحكي معها ..


نجحت توجيهي , وبطلت أحكي مع حبيبتي , دخلت الجامعة , وصار عندي زميلات وصديقات و10 بنات معجب فيهم , و 10 بنات ابعتلهم عالفيس بوك وغيره .. لحد آخر فصل بالجامعة , حبيت جد , حبيت بنت وطار عقلي فيها وعلى طول أول إشي خطر فبالي إني بدي أتجوزها..


وفعلا صار .. تجوزنا , بس كانت كتير تعمل مشاكل لأني بضل أتطلع بالبنات , أنا صح كنت أتطلع بس ما كان في جواتي أي إشي لأي وحدة غيرها .. شو أعمل أنا هيك بيئتي ! هيك متربي , هيك متعود !


بيوم كنا نتمشى وشافتني وأنا بتطلع بوحدة , خلتنا نرجع عالبيت وصارت تصرخ واتخانقنا , أثناء طوشتنا رن تيلفوني.. أخدته من جيبتي واتطلعت كان رقم.. لما هي شافت إنه رقم حكتلي :
- رد !
قلتلها :
- أكيد شغل ..
- بس انا بدي إياك ترد وتفتح سبيكر كمان ..


رديت وأنا مش خايف لأني من لما تزوجتها ما حكيت مع حدا:


- ألو ..
- مرحبا , كيفك ؟
- مين معي!؟
- شكلك نسيتني .. !؟


طار عقلي وصرت أصرخ وأحكي :
- إنتِ مين , أنا من وين بعرفك !؟؟؟؟
زكرتني بحالها إنها وحدة كانت بحياتي الجامعية لفترة وقعدت تعيط وتحكيلي مش قادرة أنساك , وليش تزوجت وأنت واعدني نتجوز ..


قبل ما تكمل سكرت الخط بوجهها , تطلعت بوجه مرتي , بدون ما تحكي أي حرف راحت ضبت أغراضها وحكتلي وصلني لو سمحت لأنه الوقت متأخر..


شو بدي أحكي , شو بدي أبرر , ضليت ساكت ..


ركبنا السيارة وبس صارت بدها تنزل حكتلي :


- بكرا بتكون ورقة الطلاق عندي ..


ضليت شهر وأنا أحاول أرجعها بس ما قبلت ولا بأي طريقة وفعلا اتطلقنا.. !


طبعا هديك الفترة تغيرت كتير , بطلت أنا , صرت أدخن كتير , أضل برا البيت كتير .. بس زي ما بحكوها الأيام بتنسي , أو بالأحرى الأيام بتعوِد..


مرق سنتين , أهلي قرروا فيهم إني أفتح صفحة جديدة وأتزوج , وصارت إمي تدور إلي على عروس لحد ما شافت بنت مناسبة ( على كلامها ) ورحنا عندهم وصار الحكي إنه إحنا نسأل عنهم وهما يسألوا عنا ..


لما رجعت إمي تاخد موعد , حكتلها إم البنت ما إلكم نصيب بينا ..إمي انصدمت وسألتها:
- ليش !؟ شو بدر منا !؟
حكتلها :
- إبنك سمعته مش كويسة , جيرانكم بحكوا إنه سايب مرته لأنه خاينها , ولأنه نسونجي وإحنا بدنا نستر بناتنا , الله يسهل عليكم ..


--------


أنا مش قاهرني إشي بس بدي حدا يفهمني مين اللي قال إنه الزلمة ما بينعاب !؟ ليش ربتونا على هاد المبدأ وأنا مرتي بعدت عني , ونسيبي السابق بشوفني بقرف يسلم علي , وصاحبي بطل يحكي معي , والناس بتحكي عن سمعتي زفت .. بس بدي أعرف مين المحترم اللي حكا " الزلمة ما بينعاب " ..


والحياة كلها سلف ودين

صحيح الزلمه ما بنعاب
بس مو لهالدرجه من الاستهتار
كيف ما بنعاب
وهو بتحاسب متل البنت لما يغلط
وربنا ما بفرق بين بنت وشب باي عمل
لكن بضل مجتمع فارغ من جواته
ومعبي راس الشب
انت رجال
والرجال ما شي بعيبه
بس بصراحه
الشب عجبني
هههههههه
يسعد قلبو ما اروعه
حبيتووو
خاصه انه فهمان وعرف غلطه
شكرا رفيقه
قصه ولا اروع