|
مذكرآت بنت منكوسة مسآ الخيرآت والليرآت .. في بنت بتنزل يوميآت كتابتها البنت أردنية .. بموت ضحك بس أقرأ يلي بتكتبه 87g حبيييت أنزلوا هنآ وأشارككم الضحك ♥ كل يوم شي رح نزل .. هنآآ .. ضلكم تآبعوا هونآ وبتمنى الموضوع يتثبت ♥ :58::58::58: - كتير بسمع قصص عن ناس حياتهم زي المرجيحة ! يوم تحت ، و فجأة فوق ! زي مثلاً الزلمة الي كان موظف بشركة و كانو مخلينو يشوف قرود الليل قد ما بحرثو عليه و بعاملوه معاملة بتنشف القلب و قامعينو ، راح قدم استقالتو و طلع من عندهم ، و اشتغل ع حالو و بيوم من الأيام لعبت معو الحياة و كبست عليه ليرات و صارت مصاريه تنغل نغل ، و رجع اشترى الشركة الي كان مدعوس عليه فيها و انتصر ! القصة كانت بتفش الغل خصوصي اني نفس حالتو ! كانت بنت منزلة هالقصة بوست و أنا قرأتها و دمعت من الفرحة و تخيلت هيك يصير معي ! الشركة الي بشتغل فيها عملولي ضغط و سكري و طلعلي لحية من وراهم و صرت أشوف عفاريت الليل ونا بحلم فيهم ! فوق ما انو تلت ترباع حياتي عبارة عن دوام عندهم و بشوفهم أكتر من أهلي ، بس كانو مخليني أتمنى أرجع صف سادس ! كنت يوم الجمعة أمضيها برقص ع أغاني ردح عراقي و ألوح بشعري ! كانو حتى لو يشوفوني قالبة ع ضهري زي الصرصور من الوجع ما يسدقو إني انطعجت رقبتي من الشغل ، و الراتب بعطوني ياه بس أعصابي تقحمش و اطلع عن طوري و اصير كنغر بلاخم بحيطان الشركة و أفلت عليهم و أنسعر ! غير الموظفين الي بوجهي مساكين و من وراي بطقعوني أسافين ! كان نفسي تلف الدنيا و تزبط معي ! بس ما كنت مستجرية لإنو ازا قدمت استقالتي بقعد بالبيت سنتنين غير السنتين الي قعدتهم اول ما تخرجت ، ! بس ليوم رنو علي شركة تانية كنت حاكي معهم قبل بشهرين ، و حكولي تعالي عالمقابلة و عالأغلب رح نوظفك ، أنا اول محكو معي خبيت الموضوع بلاش أبراج الظلام الي عالمكاتب الي جمبي يحسدوني مع إني خصري من تحت كان بهز لا ارادي ، حملت حالي و عملت إني ممغوصة و أخدت مغادرة ، و فكحت عالمقابلة و مرقت بسلام ، و حكولي بنحكي معك مشان تبلشي دوام عنا ، ليلتها منمتش من الفرحة ! 😍 و ضليت عابطة المخدة و أخطط شو الطريقة الي بدي أقدم فيها استقالتي بكرا ، بدي طريقة بتفش الغل ! تاني يوم أطقمت و كشخت ، و وصلت عالدوام متأخرة و قعدت ع مكتبي لملمت غراضي و الباقي صافنين فيني و أنا بفقع بالعلكة و عايشة جو الي جوزها طلق ضرتها ، بعدين كتبت استقالتي ، و أعطيتها للمدير و نزلت ، لما وصلت باب الشركة ، مسكت إبريق قزاز قديم لإمي جبتو معي ، و كسرتو جوا الشركة ، و سبيت عليهم و طلعت كل الي بقلبي و صرت أردحلهم و صدى صوتي عبى الشركة ! و طلعت ركض قبل ما حدا منهم يخبطني شلوت ، ونا مروحة و حاسة روحي منتعشة و مشفي غليلي ، زي الي كان معو امساك حاد و طلع من الحمام ، رنو علي الشركة الجديدة و اعتذرو مني . 😊 #وظظ_ظظ_فك ؟ |
- اليوم كنت بأسوء حالاتي ، لابسة بلوزة فسفورية كاحتة !! من الهايبكس الي عليها ممكن تعملك تسمم جلدي ازا لبستها ! بس انا خلص جلدي ماخد عالوضع ، و لابسة عليها بنطلون مبرقع عندي من صف تامن إمي قاصة رجليه و عاملتهم مساكات للغاز ، و نازل منو شراشيب ، غير هيك شعري بشرشر زيت حتى البكلة بتزحلق عنو ! ما سدقت ونا أخلص ملاخمة بشغل البيت مع إمي ، و عالسريع حجزت الكنباي العريضة و كوعت عليها ، 💨 و أخدت نفس ريحتو ديتول من نضافة البيت ، و مديت إيدي ع صحن العنب مشان أخد قطف أنتعش فيه ، و أحضر مع خواتي الفيلم الي حاطينو ، إلا جرس الدار برن ! إمي تطلعت من العين و صارت تأشرلنا ، " دار عمكم دار عمكم " ، و بقدرة قادر خواتي هربو و أنا أخدت تلفوني و سماعاتي و ركضت وراهم و فتنا عالغرفة و سكرنا الباب ، قول كبسة ع ملهى ليلي ! إمي اجت عالغرفة و فتحت الباب و جحرتنا من حواجبها ! و رجعت تضحك مع مرت عمي و تحكيلها هيهم جايات بصوت عالي عشان تحرجنا و نطلع من الخم ، قعدو خواتي يلبسو عالسريع مشان يطلعو يسلمو ، أنا لا كنت طايقة كريم يلمس وجهي ، ولا شال أحطو ع شعري لإنو راح يدبق و يلزق و يسيح ! أشرت لأختي و حكيتلها وصي إمي تحكيلهم إني مش بالبيت ، ولله لو تشقلب الدار شقلبة مني طالعة ! المهم همة طلعو و سلمو و أنا قاعدة بزنزانتي و سامعة صوت تنقيط مية المغسلة الي بالحمام و بتآكل من الزهق و الحصار ، رحت و حطيت داني عالباب ، سمعت صوت ابن عمي الكبير ! الي صرلو سبع سنين ما دخل دارنا ! و الي ما بنشوفو غير بالأعراس و المناسبات زي صاحب الظل الطويل ! و بعرفش ملامحو الجميلة غير من السنابشات ! صرت أخبط راسي بزوايا الغرفة ، و أتحسر و أعيط ، لإني بقدرش أطلع أسلم عليه ! قمت مسحت دموعي و انسدحت عالتخت و فتحت السناب تاعو ، و قعدت أتطلع ع آخر صور منزلهم و أكل أضافري من الحسرة ، بعرفش كيف و بأي طريقة فتحت الكاميرا الأمامية و صورت حالي ! صرت ألطم و أكبس عالتلفون عشوائي مشان أطلع من السنابشات بس بالغلط طلعت باعتلو صورتي !! الصورة كان تلت ترباعها لغلوغي الي برقبتي ، لإني متسطحة و طاعجة رقبتي من المخدة و التلفون كتير قريب من وجهي ، و فوق هيك وجهي شاحب و غرتي زمبركية مصطفة حول صباحي كالشمس المشعشعة ! و ضو الغرفة عاكس ع أنفي و كل الرؤوس السوداء طلعو بالصورة و أنفي و خزوقو أصلاً محور الصورة ! و عيوني مزغللين و تحتهم أسود و الإضاءة كندرائية ! السلفي الي وصلتو هي سلفي عنكبوت فضائي مش إنسان ! زومبي زئبقي خطير مخيف ! فجأة كل العيلة برا فرطت ضحك ! و عمي صار ينادي ( اطلعي وليه هبلة متخبية منا ؟ اطلع يا زهدي ولك يخربيتك عهالمنظر ) ! و يضحك من قلبو ! أنا قمت طفيت الضواو و دحشت حالي تحت تختي و صرت أتحلل بالزاوية كل ما أسمع صوت ضحكهم ، ضلو يضحكو حتى و همة طالعين من عنا ! و لما ركبو السيارة صوت ضحكهم عبا الحارة ، و أبصر كمان ازا رجعو فتحوها بالبيت و كملو ضحك و ورجوها لباقي العيلة و ابن عمي خلص طار فش مجال يتطلع بخلقتي . #أعطيني_فرصة_أشرحلك |
هههههههههههههههههههههههههههههههههههههههههههههه ههههههههههههههههههههههههه ضروري يتثبت هالموضوع قال قول داخله ع ملهى ليلي هههههههههههههههههههه .. قاصة البنطلون وعاملتو مساكات للغاز هههههههههههههههههه احلى تقييييييييييييييم والنجوووم تووووب بس استمري فيه ع طووول |
ههههههههههههههه يآويلي عليهاآ حيآتهاآ ماسآوية و حظهآ سيء حبيت .~ |
تم التثبيت |
نورتوآ رحآل والبريئة ودوم ضحكتكم ♥ ويسلموا عالتثبيت وبالمنآسبه هادا ولا شي من نكستهآ .. عشآن أضحككم الليلة بزيآدة رح نزل كمآن تنتين ههههه |
زهقت الروتين الي عامل احتلال لحياتي ، ⏳♻ زهقت شغلة اني البنت الي وظيفتها بالحياة ترمي حالها ع أقرب تخت أو أقرب كنباي أو أبطح حالي عالأرض حتى و أضل عهالتلفون اتطلع ع أخبار و سنابات الناس و أتأمل حياتهم و أحضر مسلسلات و أفلام و أقرأ روايات و أضيع حياتي ونا بتطلع ع حياة غيري ! 👀 و أعيط و تتعب نفسيتي ع المشاهد المحزنة ، و اكيف عالمشاهد الرومنسية ! مع إنو مليش دخل فيها ولا عايشتها ! 👤 زهقت كمان إنو أكبر أكشن ممكن يصير بحياتي هو إني ألحق أحط التلفون عالشاحن قبل ما يطفي ! أو امي تناديلي أبوي عشاني مش جالية الجليات ! 😰🔌 زهقت و قبعت معي و قررت أقوم ! و أدور ع حبكة بحياتي أنشغل فيها ، شقلبت حالي مع حرامي عن التخت و وقعت ع الأرض ، بعدين قمت طفيت المروحة و وقفت قدام المراي و جمعت كل شعري و ثبتو بالبكلة العضاضة ، و طلعت من الغرفة ، 💪 و أنا طالعة صفنت ! أنا وين رايحة ؟ طب شو الحبكة و الدراما الي بدي اعملها بحياتي ؟ 😑 ما عندي مرت أب أقعد أداقرها ، ولا زوج أحكيلو طلقني ! أو ازقطو بخوني و انصدم انو عندو ولد من وحدة غيري ! ولا حبيب ابعتلو اتركني ، او حتى أحكيلو تعال أخطبني ولا بجوزوني لابن عمي الي بتعاطى ! فش رجل اعمال غني معجب فيني و بلاحقني مشان ينتشلني من قاع الهامور الي انا فيه ! ولا عصابة بتهددني و بدها تخطفني و يزرعو بأمعائي شيفرة انقاذ العالم من الحرب العالمية الخامسة ! فش عندي شركة ع وشك الافلاس ولازم أنقذها ! 🔋 فش عندي صاحبة بالمستشفى ولازم أتبرعلها بكليتي ! طب حتى فش عندي اخت توأم موجودة ببلد تاني و لابسين نفس القلادة و بتدور علي ! فش اشي زي المسلسلات ! فش حفل شواء ألتقي فيو بفارس أحلامي و يلحقني بسيخ اللحمة مشان يزبطني ! 👸 فش حفل زفاف و أنا داخلة اتعرقل عالدرجات و اجي بحضن الفتى النبيل و يحبني من اول وقعة ! و اتركلو الروكي تاعي و أهرب ! بس في إمي واقفة بتعمل قهوة بإيد و تلفونها بالإيد التانية ! و أختي بالغرفة بتصور حالها سنابات بطوق الورد و بتركب رموش ع صورها ، و أخوي ماسك الريموت و بقلب القنوات و بوكل بزر و برمي عالأرض ! ♻ المجوز الي شغال جوا راسي ، طفا ! الركود و الملل و التكرار الي همة فيه اجبرني أبزق ع حماسي و أطفيه ! سمو بدني ! قررت أعمل طوشة مع أخوي عالريموت و أتفشش فيه ، و نطيت عليه بحركة لولبية انتحارية ، بسببها رجعت عتختي ست شهور لإنو عملي عدة كسور 💊💉 ولا مني ولا من قومتي . 🌚 #أخرجوني_من_هازه_الكوكعة |
قبل ليلة عرسي بليلة ، 👰🌒 تخبيت ورا حبال الغسيل عالبرندة و رنيت عليه و حكيتلو بصوت واطي ، " سامحني لإني رح أكون لغيرك ، ما رح أسامح أهلي الي قطعوا بنصيبنا ! " وغرغرو عيوني و سكرت الخط ، و طلت جرابات أبوي عن الحبل و مسحت فيهم دموعي و زبطت شعري و فتت أكمل رقص بالسهرة الي عاملينلي ياها أهلي بالدار ، 💃💔 تاني يوم و أنا بالصالون و بعملولي شعري للعرس ، وصلني مسج ، " يا بتهربي معي الليلة يا بفوت عالعرس بحزام ناسف و بنسف كل عيلتك و عريسك الأقرع المهرهر ! " 😳 أنا كنت بقرأ المسج و مبحلقة ! و الكوافيره مزعتلي شعرة من راسي و هي بتسشورلي غرتي ، نرفزت و دفشتها بإيدي و قمت أركض عالتواليت ، ضليت رافعة وجهي و اتطلع عالسقف عشان دموعي ما تنزل عالمكياج الي ب 300 دينار ، و قعدت أفكر ؟ ي ربي أنا كنت أحبو مختلفناش ؟ بس خلص ئي يحل عني ؟ يتركني أشوف حياتي ! 😰😣 مرق الوقت و بلش العرس و خلصنا رقص سلو و قعدنا و أنا ع أعصابي ، لحد ما شتغلت أغنية سوق البنات و نزل عريسي مع خواتو و تركني مصمودة عاللوج ، ما بعرف كيف فجأة تحول لعنزة ثائرة 🐐🔥 ! بطلت أميزو من بين خواتو ، خصرو إنفك عنو و نزل يرقص لحالو ! شلح جاكيت البدلة و رماه ، و رفع إصبعو و صار يحطو ع جبينو و هو بزرب عرق ، و قميصو بشرشر و مطبع ، و من تحت لف بقفاه ع كل المعازيم ! و خواتو حواليه بناطحو ، و برقصو معو رقص اجرامي قول معركة ! أنا بس شفت المنظر ارتعبت ؟ 😰 عالسريع جحرت أختي من بعيد و أشرتلها تعي ، 😰👋 اجت و أخدت منها شنتتي و بعتت لحبيبي يلا وينك ؟ تعال أخطفني أو انسفنا الي بدك ياه المهم تعال 💣 ، و ضليت متوترة و أتطلع حولي و استنا اشي ينقذني من هالمصيبة ، لحد ما وصلني مسج ( يلا إنزلي ) ! 🎉 وقفت ، و تطلعت حولي ! ما حدا معبرني ! الناس بوكلو كيك و عريسي و خواتو برقصو ! مسكت البدلة و شلحت من اجري كل فردة بجهة ، و نزلت أركض عن اللوج ، تعرقلت ع درجاتو و وقعت بحضن العريس ! 💺 مسكني هو و خواتو و صارو يرقصو فيني ، ونا بتفلت منهم بدي أهرب بس همة مش فاهمين ! آخر اشي نزلت حالي عالأرض بين رجليهم ، و صرت ازحف أحاول اوصل الباب ، و كل شوي وحدة تلقطني و تمسكني من إيديني و تشوبر فيهم ، خضوني خض ! أخر اشي دورخت و صرت أتطلع عالباب أشوفو بابين ! 🚪🚪 استجمعت قوتي و زحفت برا البيست ، و قمت اركض عالباب ونا مدعس ع بدلتي و خلقتي مشحبرة من الكنادر ! 👞👟👠👡 لما فتحت الباب و طلعت برا بركض ، لقيت خواني و خوان العريس و ولاد عمامي و كل زلام العيلة بوجهي ! وقفت قدامهم مصدومة و همة بتطلعو علي و مصدومين ! مرق نص دقيقة و احنا صافنين ببعض 😰 ، بعدين حكيت فش حل غير أكمل هروب ! مسكت حالي و هربت و صارو كلهم يركضو وراي ، ونا بركض حولين الصالة و بدور ع حبيبي راكب ع دراجة أركب وراه ! بس فش مش موجود أخو المطبلة ! 😱 آخر اشي وقفت تكسي و طلعت فيه ، و حكيتلو بعد عن هالمكان قد ما بتقدر ، 🚕 ضليت مكملة تا وصلت الغور ! و نزلت هناك و تأكدت انو محداش لحقني ، و تتبعلي أثر ، و من يومها و أنا مشردة بالأغوار ، و بدلتي مشحبرة و ممزعة ، و تسريحتي ناكشة ، و الكل هناك بخاف مني ، 🌲🌳🌴🍌 بس مش مسترجية أرجع ع عمان بالمرة لإنو بقتلوني . 🔪 #عطري_مهفهف_و_حظي_مشلف |
هههههههههههههه ههههههه ياويلى شو اضحكت سارلى فضول اكتر لاقرأ مزكراتها واضحكك ههه يسلموو ايديكى ي عسسل♡ |
هههههههه بقرألها باستمرار ومتابعتها ع الفيس منكوسة منكوسة فش مجال يسلموو ع الادراج ♡ |
ملكة انآ .. هههههههههههههههههههه أنا كل يوم بالفيس بفتح وبموت ضحككك ماما بتنكبني بتفكرني شاربة شي هههههههههههههههه فظيعة مخهآ رهيب نورتي ♥ ورح ضل جيبلكم ♥ |
ميمآ .. نورتي بس تفسديش ههههههه تفصحيش عن حسابها لحد بدي انا أضل جيبلكم هنآ ت ت منورة يا عسسسل ♥ |
ههههههههههههههههههه يخرب بيتهاآ شلتني ضحكك حلوين ههههههه |
ولك شوي شوي علينا مش عشان الك واسطه هون تفعصينا بدنا نعرف نقرا وحده وحده لسا اول وحده ما مخمخت عليها بس وربي كنت عارف نهايتها لانها صارت معي عده مرات ههههههههه كل يوم بقرأ وحده عشا انا فهمي على قدي ومش بسرعه بستوعب لهلأ اووويز 66sd |
اقتباس:
دووومات الضحكة لسااا ما شوفتي شي منهااااا ههههههههه منورة |
اقتباس:
ههههههههههههههههههه انت يلي شليتنييي ضحككك لا بفعص ولا شي وبستخدمش واسطات خمخخ انا داري انا متعودة افهم كتاب كامل مسائل بيوم شعملك وسىيعة بالقراءة انا بنزل وانت اقرأ براحتك و عمهلك وعلق بعد الهنا بسنة :p منور يا حج |
- هديك اليوم كنت بالمول ، 😗كنت رايحة مع إمي مشان تشتريلي فستان لعرس خالي ، ما كان في اشي جاي ع قدي ، ولا سحاب رضي يسكر ! راحت إمي طالت فستان غالي ، بس ما نتبهت ع سعرو لإنو كل همها نمرتو ! 🐥 صاحب المحل خف عقلو و قعد يحكيلها إنو ما بيجي ع قدي ، إمي جحرتو و حكتلو " شو قصدك بنتي ناصحة ! " ، الزلمة إلتمس و اتطلع علي لقاني أنا كمان بجحر ! خاف امي تفلتني أقعد عليه ، سكت و هو من جوا ع أعصابو ! فتت أنا و إمي ع غرفة القياس و قعدت تحشيني حشي جوا الفستان زي الي بلبس مخدة غطا صغير عليها ، و قعدت تحلف إنو ازا ما أجاش ما تشتريلي اشي ! و مضتها تسلخني كفوف و تهزئني لإني باكل الأخضر و اليابس ، أنا ساكتة زي المسكينة لإنو فش كلام احكيه يبرر الزوائد الي عندي ، 💔الزلمة برا واقف ع باب غرفة القياس و بدعي و رايح جاي متوتر ، قول مرتو جوا بتولد ، فجأة سمع صوت اشي نمزع بعديها صوت كف حامي ، و انفتح الباب و دفشتني إمي برا و أنا خدودي حمر و مكشرة ! 😰الزلمة انجن عالفستان و حكا لإمي تدفع حقو ! و إمي نجنت لما عرفت انو غالي و بلشت تحلف انو القماش زبالة و من هالحكي ، 💸أنا حسيت للحظة بنكد شديد و طلعت برا المحل ، وقفت ع الدرابزين الي بطل ع الطابق التحتاني ، و قعدت أسب ع كل وحدة نحيفة بتمرق ! و أنا بلعب بحدايد الدرابزين ، رجلي علقت بيناتهم ، سحبتها مشان أطلعها ، فلتت من اجري كندرتي و وقعت ع صلعة شب واقف تحت ، لما رفع راسو لقاني لسا واقفة بتطلع ، فكرني رميتها بالعمد و بجاكر !قعد يتحلف من تحت و حملها و راح يركض ع درج الكهربا مشان يطلعلي ، 👡👌أنا هون قلبي زحلق ع معدتي من الرعبة ، صرت ألاطش و أحاول اطلع اجري من بين الحديدات عالفاضي ، آخر اشي قلبت ع ضهري و صرت أفعفط و أتقلب و ألوح لإمي بس ما شافتني ، لما شفت الشب وصل و قاعد بركض علي ، من الرعبة سحبت رجلي بكل قوتي و للحظة حسيتها نمزعت ، صرت أركض و أعرج ، قول بطريق شارد من جماعة ناشونال جيوغرافيك ، ⚡نزلت ع درج الكهربا ركض ، فتعرقلت و وقعت ع وجهي ، وصلت عالطابق التحت و أنا مبطوحة ع وجهي و كل اجر بجهة و كل الدرجات علمو ع وجهي، اجيت أقوم ما قدرت ، صرت أدحدل حالي عالأرض ، الناس فكروني مجنونة ، و الأمن ركضو علي و صارو يحاولو يثبتوني ، و انا مقطوع نفسي مش عارف اشرحلهم اشي ، بس بعمل حركات عشوائية و بدي أفلت حالي منهم ، آخر اشي ربطوني و حجزوني بغرفة الأمن ! ⚠و امي فقدتني و بعد ميت تدوارة لقتني هناك ، و بعد ميت يمين اني بنتها و اني طبيعية مو مختلة و برميش كنادر عالناس سمحولها توخدني ، و بس روحنا عالبيت إمي علقتني من لغاليغي عالموقفين الزفت الي حطيتها فيهم ، و خلتني معلقة لحد ما يروح ابوي من الشغل يطعميني قتلة ، و أسبوع كامل خلت غداي شوربة شعيرية ، كان يوم صعب بالنسبة إلي . 👎 وتدحدلي يا دالية |
ههههههههههه روعه لا هاي استوعبتها بسرعه خاصه انه بحبش السمينات وضحكت لشبعت عليها المسكينه متخيلها برميل وعم تدحدل عالدرج ههههههه يسلمو دياتك خالتي غيمه ههههههههه حلوه خالتي غيمه كتري منهم |
اقتباس:
هههههههههههههههههههههههه عشآنها سمينة .. والله ما في بعد الرشاااقة فعلا ♥ خخخ وأنآ تخيلتها متل بكبوزه هههههههه حلوة خالتي هآدييي :31: سلم ع أختي طيب :120: نورت |
- جاستن بيبر حذف حسابو عالانستغرام يلي فيه 88 مليون متابع قال لإنو في ناس غلطت بالتعليقات ع حبيبتو ! 💥 أنا زوجي هديك اليوم نزل صورة عالفيسبوك ، مكتوب عليها ( حسبي الله و نعم الوكيل ) ، كان راتبو لسا مش نازل و صاحب الدار ماكل راسنا بالإجار و لازم ندفع قسط المدرسة للولد ، 😪 أنا كنت بالمطبخ بلشانة بفرم ملوخية مشان أفرزها ، و مش دارية عن الدنيا ! 🍃🌿 الصورة أول ما نزلت لقطتها أختو الصغيرة راس الحية ! حطت لايك و عالسريع عملت tag لرئيس العصابة أختها الكبيرة ، و كتبتلها ( شوفي شوفي أخونا المسكين ، ادعيلو ربنا يريحووو من الهم...... 😊😊) و أختها عالسريع ردت ( الله يعينك فيما ابتلاك يخوووي ي حبيبي ي غالي .....😉) طبعاً معروف من كيلو النقط الي حطوها بالتعليقات انو قصدهم عني ، همة كانو قاعدات جمب بعض زي نسانيس الليل ، و حاطات صحن بزر و مولعات الأرجيلة عالبرندة ، و راس العصابة بتحكي لراس الحية شو ترد بالتعليقات و بتضحكوو بصوت واطي و خبيث ، 👿 دخلت عليهم الحربوق الأكبر (حماتي) 👹 ، و هي ماسكة المسبحة حكتلهم (عليش بتظحوكن) ، حكولها تعي تعي شوفي ابنك شو كاتب عن مرتو ، راحت عالسريع حطت المسبحة براسها و لبستها برقبتها ، و سحبت كرسي و قعدت بيناتهم و حكتلها (وريني وريني المقصوفة إم كوع شو عاملة فيه) ، و طالت كمشة من صحن البزر ، 🐷 أنا قاعدة بمطبخي بكل أمان ، داني صابتها زنة عجيبة ! حتى من قوة النميمة صارت تتشقلب داني لحالها و ترفرف! ، خلصت الملوخيات و قمت غسلت و أخدت تلفوني و فتت أقعد بالصالون عند زوجي ، زوجي بقلب عالتلفزيون و مش معبرني، أنا لسا فتحت تلفوني بقول بسم الله نبدأ ، طلعت الصورة بوجهي ، فتت دغري عالتعليقات ! لقيت بلوط و علقم مش مخليات حكي علي !! 👽👾 أخدت شهيق و زفير و مسكت أعصابي و لفيت وجهي شوي شوي ع زوجي ونا متشنجة و شادة ع سناني و حكيتلو بكل هدوء (امسسسح آخخر صصصوررة ازا بدك تنام بالدار) ، 😑 زوجي أخد نفس و طال سيجارة و حكالي (اهدي ي بنت الناس ما حدا جاب سيرتك ، خلص اسكتي اعتقيني) و هو بتطلع عالتلفزيون كمان يعني مش مستنضف يتطلع بخلقتي ! 😳 أنا هون الاستفزاز طلع من أصبع رجلي الصغير ، بلش دخان ملتهب يطلع من مناخيري ، بعرفش كيف لساني فلت و بطلت اقدر أسيطر عليه أو حتى أضبو جوا تمي ! صوتي عبا العمارة و أنا أردح و ما خليت ! زوجي اختصاراً للشر حمل حالو و راح يكمل السهرة عند خواتو ! و فوقها فقعني بلوك ! 😳😳 أنا من القهر عقلي فرط ، صرت متوحشة ، فتت ع الغرفة و سكرت الباب و نزلت بأواعيه تقطيع بسناني ونا شعري منكوش و عيوني حمر و بضحك و ضغطي طالع بالعالي ، 💔 وين زوجي و وينك ي جاستن ، ماالت علي 👋 #بلوط_وعلقم_شريران |
- من الشغلات الي كنت متحمسة أتجوز مشان أجربها ، 🙈 إني أحضر فيلم رعب مع زوجي ! مع إني ولا بحياتي استجريت أحضر هيك أفلام ! ولا بحبها ! 👻 بس حكيت مع زوجي غير ! أكيد رح أعبط كتفو زي الصيصان ، و كل ما يجي مشهد مرعب رح يسكر على عيوني ، أو يحضني و يحكيلي " لا تخافي أنا معاكي " ❤ ، و بس نيجي ننام بضل جمبي لنوصل التخت و بغطيني و بضل صاحي لحد ما يتأكد اني غفيت ! يعني رح يضل قريب مني طول الوقت ! و رح تكون أجواء رومنسية حنونة شاعرية ، 🌚 مع هيك توقعاتي دايماً مش زابطة ، ناداني زوجي نحضر الفيلم و رحت أنا جهزت البشار و النقاريش و طفيت الضواو و لزقت فيه ، أول ما اجا مشهد بخوف زوجي على الصوت و مسك راسي و لفو عالشاشة ، أنا صرت أتفعفل و أرافص بديش أتفرج حتى رقبتي انطعجت من دفاشتو ، و بأصابعو فتحلي عيوني و خلاني أشوف غصب عني ! هاد كلو من باب المزح قال 🔪 ، أنا قعدت أعيط و ضليت أترجاه يقلب القناة بس مرضاش ، و حلفتو بكل اشي عالفاضي ! و المشكلة ما كنت مسترجية أقوم و أروح عالغرفة لحالي و أحرد ، لفيت حالي بحرامات و عملت حالي ميتة جمبو لحد ما خلص الفلم ، 🙇 اول ما حسيت عليه قام ، قمت وراه عالسريع ، هو ركض و فات عالغرفة و سكر الباب و تركني برا ، أنا صرت أتوسل و أتمسح بالباب ، و هو قاعد الخبيث بضحك جوا ، رحت أنا تكورت بالزاوية و صرت أعيط و أدعي و أحاول أسكر عيوني لإني كنت أتخيل أرواح خواتو بترقص بالدار ! 😰 آخر اشي شفق علي و فتحلي ، ترجيتو يوقفلي ع باب الحمام بس شوي ، هو عمل حالو حزنان علي و قلي تعالي ي روحي ، فتت شوي شوي و رديت الباب ، قعدت أحكي معو من جوا مشان أضل متطمنة ، و هو كان بحكي طبيعي ، فجأة سكت ! قعدت أنادي أنادي مردش ، خف عقلي و أجيت اطلع ، فجأة تسكر الباب و انطفا الضو من برا ، أنا صارو مصاريني من جوا يطقطقو، و صرت أصرخ و أخبط حالي بالحيطان ، و هو برا قاعد بطلعلي أصوات مرعبة ! 👽 أنا من الصريخ ، شفت الحمام كلو عفاريت بتدبك ! حتى شفت حجة مخرفنة من عيلة زوجي بتدبك معهم ! و بتحكيلي بإيديها تعالي ! 👹👺👰 من الرعبة تشنجت و وقعت عالأرض و صرت اتشقلب عالسيراميك ، زوجي ما فتح الا لما اختفا صوتي ! و لقاني مغيبة و تمي زايح عالشمال تحت داني ! و رجلي مربوطين ببعض ، بتزكر قعدو بعديها يلفو فيني ع شيوخ المنطقة ، و شلت من بيتي كل المرايا و بمشيش الا و أنا بتطلع وراي و بحكي مع أشياء مش موجودة ، و بتيجيني حالات بدورو علي بلاقوني عالسدة متلثمة ! حتى طلعت إشاعة إني ملبوسة ، 🌚 زوجي مضاها يصبح كل يوم يطلع بفرشة التخت عالسطح ، و ينزلها المغربيات ، 💦 لحد ما صابو الديسك من ورا هالقصة ، بستاهل . 💥 #هيو_هيو_وراكي |
- اليوم طلعت نتائج القبول بالجامعات ! 💣 أنا أصلاً ع أعصابي من لما عبيت الطلب ، لإنو راحت ما تتطلق فيها إمي و أنا أتشتت و اصير بلا عيلة ! 🔫 كان أبوي يومها مروح من عند دار سيدي و أتوقع كاين فاتح الموضوع مع عمامي ! و عمامي طبعاً ما قصرو مع انو أفيع واحد فيهم مكمل لسادس بس ، فهموه انو الجامعة مكان بتجتمع فيه كل المحرمات و العالم سايبة هناك ، و اني ازا درست أي اشي غير معلمة رح انحرف ، و أخرج عن فطرتي السليمة ، مع انو شو ما كان تخصصي بقدر أنحرف ! بس مش فاهمة شو العلاقة ، 😕👙 المهم أبوي روح حواجبو داخلين ببعض ، رمى مفاتيح السيارة و بكيت الدخان عالطاولة ، كنت أنا لسا بضوي اللابتوب مشان أسجل ، اجا سلخني كف ع نافوخي طبع كبسات الكيبورد ع صباحي ، و حكالي حطي معلم صف او أنصرفي ضلي إجلي تا يجي واحد يريحنا من منظرك ، أنا خف عقلي ، مالو فجأة ؟ كيف بدي احكيله اني بدي رياضة أصلاً ؟ 😰 امي بس سمعتو اجت ركاض عالغرفة و هي ماسكة معلقة بنقط منها مرقة ، و بالإيد التانية علبة الملح ، و بلشت ( اييش ؟ لعبو براسك ؟ ع اساس لما كانت توجيهي حدا منهم طل عليها او سأل عنها ؟ ولا نقوطهم كان عليه العين ؟ ) أبوي اخد نفس و حكالها ( اختصري و روحي كملي البامية ، لا ألوحك بدن انتي و بنتك و اخليكم تسجلو بالمستشفى ) ، إمي اجت قرصتني من كتفي و حكتلي ( ترديش ، حطي تمريض بنت ماجدة مش أحسن منك ) ، أنا صفنت برضو ؟ كيف بدي احكيلها التانية اني بدي رياضة ؟ 💃 أبوي قام و صرخ فيها ، ( بدك البنت تدور لنصاص الليالي بالمستشفيات ؟ و يحكو عنا الناس ع آخر هالعمر ؟ ) إمي فرعنت و علت صوتها ، و بلشت تحكي عن الخطط الماسونية الي بيعملوها أهل أبوي ، و أبوي تنح مخو و الحيط واحد ، و صار يطلع تحليلات متخلفة و قديمة ، و وصلت بينهم للسما 🔥 و أنا بيناتهم كبسة إنتر معلمة ع جبيني ، و مطرطش ع وجهي مرقة بامية من المعلقة الي حاملتها امي ، و خافف عقلي و فاتحة تمي و بتطلع ع مستقبلي و هو قاعد بضيع بين جدالاتهم العقيمة ، 💔 حكيت ما أنا مقتولة عالجهتين ، لإني مش عارفة مين أرضي فيهم ، خليني أسجل رياضة عالساكت ، و أموت ونا حاصلة ع شرف المحاولة أقل ما فيها ! 💪 اليوم طلعت النتيجة ، إمي كانت مجهزة أواعيها ، عشان ازا مش تمريض تحرد ، و أبوي قاعد بالشباح و مجهز القشاط جمبو و الشر بقدح قدح بعينيه ، عشان ازا تمريض يقتلني ! 💥 أنا شفتهم هيك ، من الخوف صار بطني يمغص ونا قاعدة بفتح عالموقع و وجهي زورق ، أول ما شفت كلمة رياضة بدل ما أفرح صرت أتشاهد و نزل ضغطي ، تطلعت عليهم ونا دايخة من الخوف و بعد صمت لمدة نص دقيقة ، قويت قلبي و حاولت أنقذ حالي و حكيت (طلعلي معلمة رياضة صحية ) .. 👤 بس ما نفعت الترقيعة معهم ، إمي حردت و طلعت و أبوي سكر وراها بالمفتاح ، و حكالي هسا بوريكي الرياضة ، و عملي كسور و هو بس بحكي جملة ( رياضة ي بنت الكلب ) ، 👊 و هلأ ما رح يقبلوني بالرياضة مشان صحتي صارت مش بزيادة ، الله لا يوفقهم الخفافيش الي كانو السبب . 👻👽💀 #طموحي_جروحي |
الصراحة مش عارف ع اي وحدة اضحك ههههههههههههههههههه ههههههههههههه كلهم بيجننو يعطيكي العافية متابع اكيد |
اقتباس:
|
- أنا بالعادة بكون عضو فعال بعيد الأضحى ، خصوصي بما يخص الأضحية ، ( يعني الخروف ) ، لإني بضل معو من اول لحظة للنهاية ! �� أول ما يجيبوه عنا عالدار ، بضل ألعب معو و اشوط عليه و ألحق وراه و أطلع أصوات لا تمت للأنوثة بصلة ، بالإضافة لإني بسهر معو للفجر ! و بستغل الساعات الأخيرة قبل شروق الشمس ، بإني بقعد معو و بفتحلو قلبي و بحكيلو أسراري و همومي ، لإني بكون ضامنة انو رح يندبح الصبح و تندبح معو اسراري و ما رح يعايرني فيها لقدام ، �� و منو بكسب فيه اجر لما بورجيه قديش الحياة صعبة ، و إنو محظوظ إنو نخلق خروف مو إنسان !/❤ حتى بلحظاتو الأخيرة بكون معو ، و أنا مشمرة بنطلوني و حافية و مجهزة القشاطة مشان أسيطر عالدم قبل ما ينتشر بساحة البيت ، حتى و هو بندبح ، بمسك خواني الصغار و بقعد أفتح عيونهم غصب عنهم و أرعبهم بالمشهد القاسي ، و بعديها بمسك راسو و بلحقهم فيه و الدم بصير ينقط من كواعي ! �� غير عن تقطيعو و توزيعو .. كل هاد بشارك فيه ! �� بس اليوم ما قدرت اشارك ! اضطريت اني استغني عن علاقتي بالخروف ، مشان اكسب علاقة مع ابن عمي الي اجا يساعد أبوي بالدبح هاي المرة ! �� اضطريت اني فجأة أعمل حالي بئرف ( بقرف ) ، و حساسة و ما بتحمل و قلبي ضعيف ، و اني من هيئة حقوق الحيوانات و بوكلش اللحوم ولا بتدخل تمي ! مع اني حتى اللسانات باكل بالحقيقة ! �� بس خلص بدي أثبت أنوثتي ، و فعلاً ، لما اجو يدبحوه وقفت من ورا الباب و قعدت أعمل حالي كل شوي اني بدي أهرب ، مع انو ولا حدا معبرني أصلاً، �� لما دبحوه عملت حالي بعيط و ركضت ع غرفتي ، الضهر كان المنسف جاهز و الراس عليه ، انا عملت سلطة و قعدت ع جنب لإني قرفانة ع اساس ، مع انو روحي من جوا مريلة ع ريحة المنسف ! نفسي أنزل فيه اسبح سباحة ، اللحمة يما اللحمة ! قلبي تقطع عليها ! �� مع هيك صمدت ع صحن السلطة و مسكت حالي ، خلص ما ضل اشي بعد العيد خطبتي رح تكون ! صمودي و شموخي و كل الي تحملتو ، أبوي خربو بآخر لحظة ، لما اجا ابن عمي يفتح الراس أبوي حكالو " اترك اترك من ايدك ! المخ كل عيد أختصاص ام قنوة هي بتعرف تطلعو، ! بكفي ما دبحت معنا هاي المرة ! تعي البين ينطحك من متى بتوكلي سلطة انتي ي إم الكوارع ؟ تعالي تستحيش من ابن عمك ، ولك هاي بتنقرش نقرشة ع كرشاتو ، هي الي بتنضفهم ! " - شكراً أبوي الغالي . �� #خارووفي_خاروفي |
- اليوم رحت عند دار سيدي ،🏡 و صدف إنو في جاهة عند جيرانهم ، ستي حكتلي قومي تعي معي تسلي بحفلة النسوان ، لما فتنا عندهم استغربت الوضع ، ناس كتيرة و نفسيات ، ضليت ملزقة بكوع ستي و هي بتسلم عكل وحدة بتطلع بوجهها و بتوقف معها سنة تسلم عليها و بتنسى اني معها ، كان في نسوان ممكيجة و مبهرجة رايحة جاي بين الصالة و المطبخ و بخبطو فيني بأردافهم و كتافهم و ولادهم الي حاملينهم و صحون كنافتهم ، كإني ضبابية مهمشة مش مبينة ! مع هيك ضليت مقربطة بكوع ستي ، الكل كان بس يلمحني يعطيني جحرة غريبة كإني صرصور داخل ع بيت نمل ، 🐜 المهم فاتت وحدة الزاوية بين جبينها و مناخيرها زاوية حادة قد ما هي رافعيتهم و شايفة حالها ، و شعرها مصبوغ أشقر ذهبي لامع ! حسيت حالي شايفها من قبل ! ضليت أحلل بخلقتها و هي بتسلم عالناس لحد ما عرفت انها كانت بنت صفي و بنت جيرانا كمان ، لما قربت علي جهزت حالي أسلم عليها ، تطلعت علي من فوق لتحت بقرف و فشقت عني ! ما استنضفت حتى تسلم علي ! 🐷 و كان في ولد صغير بتمرجح بين رجليها و هي بتسلم عالنسوان ، و بإصبعها في خاتم ! و بطنها نافخ ! يعني الي فهمتو انها متجوزة و مخلفة و حامل كمان ! رجعت أنا لورا و قعدت ع الكرسي تاعي ونا مصدومة بالتصوير البطيء ! كيف ؟ كيف مبدأ توزيع الحظ بالحياة ؟ هاي الي كانت مقملة ؟ و كانت تقعد آخر درج لحالها و الكل يخاف يقرب منها ! و مرة عملتها ع حالها بالصف و كل المدرسة لحقوها لباب الدار و همة بزفو فيها و مريولها بنقط و الجاكيت الي لافيتو ع خصرها مشان يغطي البقعة برضو بنقط و شنتتها بتنقط !😳 و مرة تانية امها منعتها تفوت عالدار لإنها مطينة كل أواعيها ! و انحشرت و عملتها ع الدرج و الريحة عبت العمارة يومها ! 😳 هاي الي كان لقبها بالحارة ( زيوانة) ؟ و الولاد يلحقوها و يراشدو عليها حجارة ازا قربت تلعب معهم ! هاي الي المعلمات ما كانو يعرفو يفتحو دفاترها لإنو الصفحات ملزقة ببعضها من نتائج الحفر و التلزيق ؟ 💚 هااي ام جرابات مخزقة تمرق و ما تسلم علي أنا ! أنا الي كنت طول عمري الأولى عالصف ! هاي تتجوز و تخلف قبلي ! و تصبغ قبلي ! و أنا كل اجتهادي بالحياة و تمشيطي لشعري بشكل يومي ! ما الو اي انعكاس ع حظي ؟ 💦 #انتصار_الجرابيع |
- ضل بالي مشغول قبل عرسي بفترة ! �� كنت حابة يمشي تمام بدون أي غلط يعلقو عليه الناس ! ضليت أفكر كيف بدها تكون تصرفاتي بالزبط ! �� يوم ما نزلت مع مرت خالي تنقيلي جهاز ، نقرتي بكوعها و هي ماسكة روب حمام معلق و قاعدة بتتفحص ملمسو بأصابعها ، و حكتلي ، " اصحححك تكشري بعرسك ولا ترخي بوزك ! بفضحوكي بالعيلة ! بقعدو يحكو غاصبينها عليه ! أو العريس كحته و مسمعها كلمتين عالنقوط ! حماتها طاسيتها بهدلة ! العريس مش غاسل رجليه ! زعلانة ع حبيبها ! أو بقولو زي ما قالو عني يوم ما أخدت خالك ، مكشرة لإنو الذهب روسي ، هو بيني و بينك روسي ! بس أنا تيسة ضليت زامة حواجبي و فضحت حالي .. " �� خفت يصير معي هيك ! فقررت أضل طول العرس ع نفس رفعة الخدود ، بس بليل لما روحت و كانو إمي و خالتي قاعدات بتفرجو عالجهاز ، خالتي أخدت شفة قهوة و رجعت الفنجان عالطاولة و قالتلي " اصحححك تضلي تضحكي و تبيني فرحتك بالعرس ! بحسدوكي يم ! أو بقولو ما سدقت ! كانت ميتة تا يجيها عريس ، مستجوزة من و هي صف خامس ! ترا هيك حكو عن بنتي ! لا لا اثقلي ، كشريلك شوي ردة عين و ثقل ! " �� و إمي ردت عليها " بالك يختي ؟ ونا بقول هيك ! ترا عماتها بس بدهم سيرة يمسكوها علينا ! " أنا هون علقت بمتاهة ! إيش أهون ؟ يقولو جابرينها ولا مستجوزة ؟ �� ما عرفتش اقرر تا إجا عرسي ونا لسا مش عارفة ! حاولت من أول العرس و طول الزفة ، أضل ماسكة تمي بشكل مستقيم ! لا مبسوطة ولا زعلانة ! تا اجا وقت التلبيسة و عريسي لبسني الدهبات ، و تطلع بعيوني و ضحكلي ، أنا ممسكتش حالي ! أصلاً مدمعة من الفرحة آه مبسوطة آه ! �� عالسريع تمي فرد و سناني كل طاحونة راحت بجهة ! اجت عيني بعين إمي ، وسعت فتحات مناخيرها و جحرتني ! فهمت اني عملت اشي غلط و ضبيت سناني بسرعة و تطلعت بالأرض ، و ضليت وحنا بنرقص زايحة تمي ع جنب عشان مستعملهوش ، �� مرت خالي و هي بتزقف و بتلولح بإيديها حولينا أنا و العريس ، ضلت كل ما تيجي عيني بعينها ترفع حواجبها و تفردلي ابتسامتها زي تويتي ، قصدها تحكيلي " اضحكي " ، �� ضليت ضايعة بينها و بين امي و بين خالتي ، كل ما تيجي عيني بعين حدا منهم أغير وضعية تمي ، زمة فتحة ضمة سكون بوز يمين شمال إلوي إرفع جانباً عالياً أسفل خط ! ���� مرة اخلي خدي يوصل داني ، و مرة تمي يسحسل ع دقني من التكشير ! ���� ضليت لآخر الحفلة بس مركزة ع هالموضوع و خايفة شو ردة فعل الناس لدرجة انو عرسي خلص و انا مش منتبهة ! و عريسي و كل العيلة انفصمو من الرقصة الي كنت اعملها ببوزي و طلعت على زوجي سمعة إنو ماخد وحدة مفصومة و عندها مرض كلابي بتمها و بتسيطرش عليه . |
قصةةةة حلوووة....... |
| الساعة الآن 02:50 PM |
Powered by vBulletin® Version 3.8.7
Copyright ©2000 - 2025, vBulletin Solutions, Inc.
Search Engine Optimization by vBSEO ©2011, Crawlability, Inc.
HêĽм √ 3.1 BY: ! ωαнαм ! © 2010
new notificatio by 9adq_ala7sas
User Alert System provided by
Advanced User Tagging (Lite) -
vBulletin Mods & Addons Copyright © 2025 DragonByte Technologies Ltd. Runs best on HiVelocity Hosting.