منتديات بنات فلسطين - قلوب بسيطة الجزء الاول ،، لغششاق قصص الحب

قلوب بسيطة

الجزء الاول :

لما بنكون عنا أحلام وطموحات كتيرة
ما بتسع الدنيا ..
بدنا نحققها بدون ما نوقف ..
المهم بدنا نحقق كل أحلامنا رغم كل شي
بس
لما تكون أحلامنا مبنية ع واقع صعب نحققو
وإذا تحقق بكون معجزة إلاهية
وخصوصي لما تكون بنت عشتها صعبة ..
فقيرة ومهمومة .. بيت صغير
بالمخالفات ساكنين
سقف بنزل مي وقت الشتي .. وقت الصيف نار جهنم ..
وأخوة كتار .. ومصروف كتير ..
وشغل اﻷب ع قدو بياع خضرة وحالتو بالويل .
اﻷم كل همها يكونو ولادها شبعانين لقمة الحلال ..
بنتها الكبيرة وصلت لمرحلة جامعية ..
بدها تدخل فرع يلي بتحبو ..
حابة تدرس هندسة ديكور .. من طول عمرها بتحلم ببيت صغير وشباك وبرداية ملونين وبيت مزين ومرتب بالخيال .. عايشة ببيت ما بيحلم فيه أمير بس كلو بالخيال ..
~ يا أمي شو فيها سجلت رغباتي ومشي الحال ومعدلي عالي يعني بنقبل دغري ..
_ ولك موهيك القصة القصة أنو كيف بدنا نلحقلك مصاريف .. أخريتها البنت لبيتها وزوجها قعدي بلا دراسة واستني نصيبك
~ لك يا ماما مابدي اتزوج هلاء لك حلمي أني ادرس وصير جامعة ..
_ المدرسة بعيدة عن بيتنا كيف بدك تروحي وترجعي
~ أمي اسمها جامعة مو مدرسة وبعدين في شي اسمو سكن جامعي ماتاكلي هم
بدخلت اﻷب ع البيت .. أخواتها الصغار ركضو لعندو عم يبوسوه ..
أبوها عمرو 48 سنة ملامح الكبر مبينة ع وجهو تجاعيد الهم وقسوة الحياة محفورة ع وجهو ..
أما القلب همو ولادو يعيشو مبسوطين ولا ينذلو لمخلوق يخلق ..
+ البنت ما فيها شي إذا كملت دراستها ..
_بس يا رجال ما بصير وضعنا بالويل ؟؟؟
~ يسعد ربك أبي
_ لا تكبر براس البنت باﻷخير راح تتزوج ؟؟
+ بس بتزوج ومعها شهادة بتفيدها ﻷخر عمرها وحياتها وبعمرها ما بتنذل لحدا وحتى لو كان هل الحدا زوجها
_ طيب يلي بتشوفو أنت
قربت البنت لعند أبوها وضمتو وباست إيدو وحطتها ع راسها من فوق وقالت : بحياتي كلها ما راح خلي إلا راسك مرفوع بإذن الله..
+ الله يرضى عليكي يلا قومي جهزي الغدا مع أمك ﻷني تعبان وميت جوع ..
~ على عييييني وراسي كمان
البنت مبسوطة وشو طاير عقلها الفرحة ما واسعتها راح تكمل دراستها متلهت متل صديقاتها ..
بس الشي يلي ما حاسبتلو حساب حياة المدينة وصعوبة المعيشة فيها
وبعد بفترة فتحت الجامعات البنت نزلت لتثبت تسجيلها بالكلية يلي قبلت فيها هي هندسة ديكور نزلت ومابتعرف شي بس قوية وقد حالها وصارت تسئل وتتعرف ع بنات لحتى يساعدوها ..
وسجلت ع غرفة بالسكن الجامعي مع تنتين بنات مابتعرفهم ورح تسكن معهم لحتى تخلص دراستها ..
بس يوم عن يوم مصروف الجامعة عم يكبر من أدوات رسم وكتب ومصاريف وقصص مالها نهاية ..
تفيق الصبح بكير ترتب تختها ..
وتعمل كاسة شاي وتلف جنبها سندويشة زيت وزعتر وكم حبة زيتون وتلبس لبسها يلي من أول جامعة ماغيرتو بسبب إنها فقيرة
《 بس الفقر بعمرو ما كان عيب ..
مجتمعنا هو يلي خلاه يكون عيب 》 ..
كانت من أشطر طلاب دفعتها من حماس وثقة بالنفس .. قوية ونظرتها بتخوف قد حالها بكل شي
ليوم ما صارت مخنوقة من مصاريف الجامعة وهاد الشي كان يوقف عزيمتعها بالدراسة وتضلها تفكر كيف بدها توفر مصاريف لجامعة ..
بعمرها ما شكت لصديقة .. بعمرها ما حكت عن وضعها
يلي بيسئلها بتقلو : مستورة و الحمدالله
بس وصلت معها اﻷمور لدرجة أنها بدها أدوات وعندها نقص كتير لحتى تكمل مشروع البحث ..
صارت تفكر وتفكر : إذا رجعة من جامعة برجع مشي وبروح مشي .. أكل من جامعة مابشتري من وين طلعتي هل القصة ..
شافتها صديقتها بالسكن قاعدة وشاردة .. صديقتها البنت يلي بتحب السه وطلعات والفوتات وآخر همها دراستها
× شوووو بشو شاردة وليه ؟؟
~ ولا شي
× ما تكوني حابة
~ ههههه انا لا بس مشغول بالي بمشروع تخرج
× اممممم طيب سدقتك ..
صديقتها التانية بتكون قاعدة ومقهورة من حبيبها بتقلها :
بلا حب بلا بطيخ يلعن الحب وعيشتو
× ههههههه شرفي انتي الهبلة لازم تحبي شب لجيبتو وتخليه يركض هو وراكي
- اي أسكتي هاد اسمو حب مو سلبطة عالشب
× ليش في حب بهل الأيام هلاء كنتي عم تسبيه بعدين شو مفهمك بالحب ولا شو رأيك شروق ؟؟
~ انا مابهمني شي غير مشروع تخرج وبسس
- أتركي شروق بحالها
× ليش شو حكيت اي والله والله تحبلها شي شب من أصدقائي اﻷغنيا لتقبر الفقر
- ههههه قصدك أصدقائك المايعين يلي بتقضوها كل يوم سهر بمكان وخليني ساكتة
~ خلص انتو الجوزبكفي مشاكل .. وتصبحو ع خير ..
غطت راسها بالبطانية ونامت وهي عم تفكر بوضعها .. ونسيت كلام صديقاتها