لساتني بتذكر هديك الصدفه يلي جمعتني فيك كيف قلبي دق إلك من اول ما شفتك ، لهلأ ما بنسى رجفة قلبي بهديك اللحظة ، وكيف كان كل همي إني حاكيك و انو اقربلك ، مع إنك وقت حاكتني ما قدرت أطلع بوجهك وكانت عيوني بالأرض ، مع انو بوقتها ما كان نفسي شيل عيني عنك ، وقتها ما كنت بدي اليوم يخلص ولا أنك تروح كنت بدي ضل معك اكتر واكتر ، وقت جينا بدنا نروح وقفت معك وقتها أنت حكيت شي خلاني أسعد وحده ، بتتذكر شو حكيت !! حكتلي : " هاي اجمل صدفة بحياتي " وقتها انا قلتلك : " في أخد فيسك لنحكي أكتر " وأنت كتبته إلي ع ورقة ، وانا من أول ما فتت البيت ضفتك وكنت ناطرتك ع نار ، لحد ما أنت فتت وقبلت الأضافه وحكينا وشو عم بوجعني حكيك إلي بوقتها ، بتتذكر شو حكيت !! ، حكتلي : " أنتي البنت يلي بتمناها جمال وأدب وأخلاق وخجل ، وإني البنت يلي بدك تقضي معها باقي عمرك ، وقتها حكتلي انا حبي كتير صعب وبغار عليكي من كل شي وبدي تكوني بس إلي انا " وقتها انا قبلت بكل شي لأني عنجد بحبك ويمكن بحبك اكتر ما بحب حالي ، و ما بكذب لو قلتلك إنك أنت إلي كل شي ، بس عدت الأيام وأنت تغيرت وصرت عم تجرحني بدون وعي ، ولأني بحبك كنت أبكي منك كل ليلة و ما خبرك ، كنت أتوجع وأتوجع وما خبرك ، كنت غرق المخده دموع و الغرافة صراخ واهات وما خبرك لأني بحبك ، ومرت الأيام وأجى اليوم يلي طلعت فيه من حياتي ، رحت وأخدت ضحكتي و قلبي و شقاوتي و روحي ، رحت وتركتني شبه روح عم تتوجع وتتمنى الموت لترتاح ، بأيام غيابك أنا كتير تغيرت صرت هادية أكتر ، بطل صوتي يعلى بالبيت صرت أنطوائية ع طول قاعدة بغرفتي ، أعتزلت كل شي كنت بحبه و بعدت عن كل شي ، وقتها كل حدا شافني كان يسألني ليش هيك وجهك باهت وين راح صوت ضحكتك وين شقاوتك و وين و وين ... وانا كنت ضل ساكته لأنو ما بدي أحكي عنك شي مو منيح أبدا لأني بحبك ، عدت سنة وما نسيتك ما نسيت وجهك وصوت ضحكتك بالعكس حبيتك أكتر وأكتر ، وقبل ما أنام بكل ليلة كنت أطلع على القمر وشوف وجهك ، بهالسنة أنا تعودت على غيابك أنو أكتبلك و ما تقرأ ، حاكيك وما تجاوبني ، أشتقتلك وما لاقيك ، اتعودت حاكي ظلك عنك ، بسس أنت رجعت إلي و لهلأ مش مستوعبه كيف رجعت هديك البنت الشقية بس سمعت صوتك ، وقتها حسيت روحي رجعت إلي ، الكل لاحظ علي وحكوا في شي أتغير عيونك رجعت تضحك من جديد ، بس هالفرحة و هالضحكة أكتر من أسبوع واحد ما ضلت لأنك رجعت وتركتني من جديد ، ما بعرف شو بدي قلك بس ريح ضميرك ما راح ادعي عليك عارف ليش لأنو الشعور جواتي مات ، صرت بنت بدون احساس ، شبه عايشة . لا تصدق دموعي يلي عم تنزل ولا قلبي يلي عم ينزف انا بخير وعم بضحك لا تصدق انو هاي ضحكة وجع لأنو الوجع خلاني اخرس وما اقدر احكي ، والأغرب انو حابه وجعي قد ما بحبك بس سؤال واحد بدي أسألك اياه انا شو عملت لتقتلني مرتين !