منتديات بنات فلسطين - موضوع تعبير .. (قصة عجبتني)

قبل بدأ في طرح القصة ، سأفسر بعض الكلماتالسورية الغريبة عليكم :

القنبز : الشمرة أو الشومر
بقى بيهون : يعني بصير تخيب أملنا
عالرايحة و الجاية : يعني بالذهاب و الإياب
ولاه : كلمة تستخدم لتصغير

فرد شكل : نفس الشيء
لعية قلب : وجع قلب
عن جد : يعني و الله بجد
رأس البسيط : مدينة قريبة من حمص
أكابر : صاحبين مكانة

القصة كالتالي :

طلب أستاذ الصف السادس الإبتدائي من تلاميذه كتابة موضوع تعبير حيث كان النص على الشكل التالي :

" لي عم مهاجر أكتب إليه رسالة أحثه فيها على العودة والتحرر من آلام الغربة ، وأعلمه فيها بالتطور الذي طرأ على الوطن بعد رحيله ، وزوال الأسباب التي دفعته إلى الهجرة . "

نظر الطلاب إلى الأستاذ وهموا بكتابة الموضوع ، لكن صوت التلميذ ديبو المتسائل أوقفهم عن عملية الكتابة .

ديبو : أستاذ شو يعني " أحثه " ؟!

الأستاذ : أحثه يعني بتقله أنو كل شي تمام والوضع عال العال يا بهيم مشان يتحمس ويرجع .

ديبو : يعني أعمل له البحر طحينة ، وأرش له قنبز مشان يرجع ، مو هيك أستاذ ؟

الأستاذ : خراس و اكتب من تم ساكت .. من وين متعلم هالحكي ولاه ؟

ديبو : من المسلسلات أستاذ .

الأستاذ : لا بقى تتفرج عالتلفزيون يا دب .

ديبو : ما بقدر أستاذ ، بحب المسلسلات .

الأستاذ : تفرج لكن عالمسلسلات التاريخية .

ديبو : حاضر أستاذ .

سعاد : أستاذ شو يعني تحرر ؟!

الأستاذ : تحرر يعني أن نحارب العادات والتقاليد البالية .

سعاد : شو يعني عادات وتقاليد بالية أستاذ ؟

الأستاذ : يعني متل ضرب الزوجات والأولاد .

فراس : أستاذ شو يعني آلام الغربة ؟!

الأستاذ : يعني أنو عمك بيكون قاعد بالمهجر ، وهو عم يتألم كل يوم لأنه حن الى الوطن

سلوى : أستاذ شو يعني تطور ؟!

الأستاذ : يعني متل سويسرا فرد شكل .

ليلى : أستاذ شو يعني زوال الأسباب التيدعته إلى الهجرة ؟!

الأستاذ : يعني ما عاد في هم وغم و لعية قلب عالرايحة
والجاية .

وكتب التلاميذ موضوعهم كما يلي :

عمي العزيز ..

بعد التحية والسلام ، نحثك على العودة إلى الوطن ، فالوطن جميل ، و في كل شارع و كل رصيف ستجد كميات من القنبز المرشوش من هنا وهناك ، ولكي تصدق ، فقد ذهبنا في رحلة إلى رأس البسيط وشاهدنا القنبز على طول الطريق ، وكان من الخطأ أن نذهب في الرحلة ، لأن عمو تبع النشرة الجوية قال إن الطريق غير سالك بسبب تراكم القنبز ، ولكننا لم نسمع النشرة لأننا كنا نتفرج على مسلسل باب الحارة .

المهم يا عم مالك بالطويلة ، وصلنا إلى رأس البسيط بعد عذاب شديد بسبب القنبز ، فشاهدنا البحر وركضنا لنسبح فيه ، ولكننا لم نستطع لأنه كان كله طحينة ، إي عن جد تعا وشوف بعينك صار البحر طحينة .

وعندما عدنا إلى المنزل لم يضرب بابا الماما لأنه بصراحة تجوز عليها وصار يضرب مرته الجديدة ، لذلك لا تهتم بالعادات والتقاليد البالية فلقد قضينا عليها .

فإذا خرجت إلى الشارع فستجد السيارات وهي تطاحش على بعضها وعلى المشاة ، وستشاهد الشوارع الزفت اللي مو مزفتة بسبب الحفريات تبع التطور ، والأرصفة اللي كل سنة لون ، وكل شهر شكل ، بسبب تغيرات التطور ، يعني متل سويسرا فرد شكل .. بس كل يوم شكل .

كفاك آلاماً في الغربة ، نعرف إنك تتألم عندما تقبض راتبك الكبير ، وتتألم عندما تشاهد الشوارع النظيفة في الغربة ، و صاحبين التاكسي الأكابر اللي ما بيهجموا عليك مشان تركض مرعوب .

نعرف أنك تتألم عندما يقول لك البقال "غود مورنينغ سير" ، وعندما تدفع شركتك المصاري للطبيب عوضاً عنك ، وعندما تساعدك البلدية على فتح شي مشروع ، وعندما يعطيك البنك قرضاً مشان تنفذ أفكارك .

نعرف أنك تعاني وتتألم في الغربة ، فتعال يا عمي ، لأنك إذا لم تأتي سنأخذ صفر في التعبير ، بقى بيهون عليك نرسب يا عمو ؟؟؟؟؟