منتديات بنات فلسطين

منتديات بنات فلسطين (http://www.bntpal.com/vb/)
-   زوايا عامة (http://www.bntpal.com/vb/f3/)
-   -   انا من بلد بيعرف كل بيت فيه بالحارة شو طابخين (http://www.bntpal.com/vb/t35805/)

قصي 02-22-2015 12:37 PM

انا من بلد بيعرف كل بيت فيه بالحارة شو طابخين
 

انا من بلد بيعرف كل بيت فيه بالحارة شو طابخين كل الجيران ؟؟
هاد البيت طابخ ملوخّية.....وهاد البيت طابخ مقلوبه
وريحة الخيار يعني سلطة.. والسمك شارح حالو لحالو
وذبح البطيخة فضيحة ؟؟........
أنا من بلد القمر فيه بالصيف يعني سهره.....
وكل عرس يعني دبكه.. ..
وكتب الكتاب يعني كنافة....
من بلد كانت أمي تقول يا ابني
“ غسل وجهك لأنك ما بتعرف مين بيبوسو، و كّنس بيتك لأنك ما بتعرف مين بيدوسو”
وأبي يقول:
“جارك أخاك.. إذا ما شاف وجهك بيشوف قفاك”
من بلد لما بيندق فيه الباب بنتحزّر بين بعضنا مين وبنقول: يا ترى مين إجانا؟
هي رنة الجار.. سريعة وقصيرة، هي رنة عمتي...... ناعمة وخفيفة
وهي خبطة ابن الجيران ....،
وهي خشخشة المفاتيح لا ابوي عم ينادي ويتنحنح.. ليتغّطوا النسوان
من بلد......الذهب كان الأساور الرفيعة والمبرومة والحيّة........
انا من بلد المنسف بينطبخ بالافراح والاتراح و كل أيام الجمعة، وشوربة العدس كل أيام رمضان ......
بلد كل شي بيصير فيه بيستاهل يكون خبريّة.....
بلد حتى حبال الغسيل فيه بتحكي قصص، ولقّاطات الغسيل بتنقل رسائل الغرام، ونشر الغسيل إله أصوله مشان ما يقوله عن الست عفشه
بلد كانت الست تقول: “لو كانت أسوارتي وقيّة ما لي عن جارتي غنيّة”
بيت الجيران أول باب بيندق لما بيخلص الخبز على غفلة، ولّما ما بيلتقى ليمونة.....
بيت الجيران أول بيت بنزوره بالعيد لناخد أول عيدية
والبيت يلي بيتحمل ولدنتنا وقت ندق على بابه وبنهرب ....
ومنرش عتبته بالمي لما بندير البربيش لنرش الحارة بالصيف
والبيت يللي بنوقف قدامه لنوصّله سكبة من طبخة اليوم ...كل مغرب برمضان ...
ببلدي ما فيه قطّة جوعانة.. وكلاب الشوارع شبعانة ,
وبكل حوش في داليه وفراش للضيف
ونمليه فيها المكدوس وتنكة جبنة والزيتون وزيت وزعتر ...
ببلدي... كانت ايام الشتا.... ياعيني على أيامها..
كانت الصوبه... ولهبها... عم يقمر الخبزات ويشوي الكستنا....
وكاسة الشاي يلي عم تتنقل من إيد ﻷيد بجلسة فيها طنة ورنة.. ..
ببلدنا الغيرة بتشعل فينا مو بس اذا حدا اطلع أو لطش اختنا .. كل بنات الحارة إخواتنا ....

حنان 02-22-2015 12:41 PM

شكرا عى الموضوع

ملكة الحرف 02-22-2015 12:44 PM

موضوع غريب وحلو
يسلمو

سمبوسة 02-22-2015 12:49 PM

ياااه عنجد زكرتني ببلادنا .. وما في أحلى من بلادنا
مشتاقة زورك يا بلادي .. وشوف اهلك وناسك


زكرتني بالبساطة والحب والأخوة


سنرجــــع يوماً إلى حينا :')




حبيب العمر 02-22-2015 12:49 PM

كلها من واقع حياتنا وماضينا وحاضرنا
وعاداتنا ومجتمعنا هيك بدو
كل ما ذكرت صحيح
ترتقي للامثال الشعبيه
تسلم أناملك
على الحكم والامثال
تقبل مروري وتحياتي

غرام 02-22-2015 12:53 PM

غسل وجهك ياابني مابتعرف مين بيبوسو ... ونضظف بيتك مابتعرف مين بيدوسو..

اشي بيجننن حبيتو كثير ..
روعة قصي اختيار بيجنن ..


الجوري لروحك

اميره المشاعر 02-22-2015 12:54 PM

غسل وجهك لأنك ما بتعرف مين بيبوسو، و كّنس بيتك لأنك ما بتعرف مين بيدوسو”

كلمات رائعه من واقع حياتنا


احسنت اخي

mohaman 02-22-2015 01:00 PM

ربي يسلم هل الأنامل ذكرتنا بالحي و بالشارع و بالحارة أأأأخ طلعونا من بيوتنا و هيهات لنرجع عليها

شتآتْღ 02-22-2015 01:06 PM

ما أحلا البلاد وريحةة البلاد .
كلمات عميقةة جدآ ، وصفت ما يميز الوَطن عن غيرها من البلاد
.
يسلمو ي أنيق ع السطور الراقيةة
.
عوافي ~

الصياد 02-22-2015 04:52 PM

كل هالاشياء كانتَُ زمان
بطل ضايل منها شيء وبطل حدا
يتعرف ع حدا , ماضل غير شوي اشياء
من الي ذكرتها وبس .,

الموضوع جميل بحق .,


الساعة الآن 12:06 AM

Powered by vBulletin® Version 3.8.7
Copyright ©2000 - 2024, vBulletin Solutions, Inc.
Search Engine Optimization by vBSEO ©2011, Crawlability, Inc.
HêĽм √ 3.1 BY: ! ωαнαм ! © 2010
new notificatio by 9adq_ala7sas
User Alert System provided by Advanced User Tagging (Lite) - vBulletin Mods & Addons Copyright © 2024 DragonByte Technologies Ltd. Runs best on HiVelocity Hosting.