قصص الشتاء مع رانيا 2

#1 01-12-2015

قصص الشتاء مع رانيا 2

مرررررحبا حبايب اجريت بقصة جديده :-)طويله شوي بس تعجبكم

ان شاء الله

الغُـرَّةْ والجَـرّةْ
قصة قصيرة باللّهجة الفلسطينية

بنت فلسطينية كانت قاعدة مع سِتّا بسيعة صفا، قالتا:
دخلك يا تيتا ! إنتي تجوّزتي جدي عن حب؟
إنتبْهَت الخِتيارة من كبْؤِتْها وصحْصَحَتْ آخر صحْصَحة !!! والمسبحة إم حبة كبيرة بايدا، والنقاب الأبيض كاشف ثلج راسا، وبَلّشتْ لحكاية ........
آآآآآآآخ يا ستي يا حبيبة كلبي، زكرتيني بالغااااااالي!!! إسمعيني وما تكاطعيني احسن انسى شو بكول، ماشي؟
اللهم صلي عليك يا نبي:
هاظ يا ستي أيام زمان لما كنت بعزّي صبية، .... بتصدكي؟ كنت أحلى منك !
وفرطت البنت من الضحك،,,,
لك وجع يفلخ نيعك بتضحكي عليي؟ يمّا منك شو وِكْحَة وكَوِيِّةْ! والجدة طبعا فرحانة وفرفح قلبا عهالسيرة:
بَسِّكْ عادْ يا بنتْ....غُسْبالِكْ ...
شو كنت بكول؟ آه : كنت حلوة وخدودي كبار مرصوصين مثل الفخّار، وشعري كان طوييييييييييييل، مَكُنّا نتباها بطولو، مش زيكو بنات هالايام ما بنعرف الصبي من البنت! كال شو؟ الصبي بربطو، والبنت بتكُصّو!!
آه يا ستي، كنا أيامها ما نطلع من البيت، عيب ! البنت بتضلها بالدار بتساعد امها بشغل البيت. كنا نعجن ونخبز عالحطب والتنور والصاج. كنا نفيك كبل الفجر، نكوم نصلي، ونشمِّر عن كمامنا ونحضِّر العجين كبل اي إشي...
والبنت مستعجلة: يا تيتا كيف عرفتي جدي؟؟؟
جاييتِك بالحكي، بلا طول سيرة:........... ياستي كنا نعجن ونخبز ونحط هالغسيل باللَّجَنْ، مش مثلكو اليوم، بنات كلال حيلة! بتزِتّوا هالغسيلات بالمكنة اللي بتبرم عالفاظي !!! كانت امي تروح عالحكلة مع أبوي تساعده بلفلاحة، وكنا نظل بالدّار، وما نطلع إلا عالنَّبْعَة لنعبّي جرار المي الفخار. تِبْكا الوحدة منا مثل العروس، حاطّة جرتها عَراصا.... وان شالله كنا نطلع مكشوفات؟؟ العوذو بالله !!! والله كانوا بذبحونا!.... لأ يا ستي، كنا مسَتَّتَراتْ، نحط مناديل ونربطها لورا. بس بيني وينك: (كنت لما اطلع اعبي المي من النبعة، كنت أطَّلَّع وراي، وحواليي، ولما ما ألاكي حدا شايفني.....، كنت أنزِّل غُرَّة، ابيِّنلي كم شعرة من نفسي) بس ان شالله اهلي يعرفو؟ ...... والله كانو بدبحوني عالعتبة. كنا صبايا وجاهلات !!!

وبيوم يا ستي يا حبيبتي، ونا حاملي الجرة عراصي ومروحة الدار،.... لكيت زلمة طووول بعرظ، بِهِد الحيط،.... وسبحان اللي خلكلو هالهيبة!!! شواربو كباار وعيونو يا ستي تكولي مكحَّلين؟!.... آه والله يا ستي، زي ما بكُلِّكْ......... ياااصباااح الشووووووووووم عليي!!!! ..... هاظ الزلمة كرَّبْ مني يحكيني!! ....وكوم اركظ كد ما فيي...... يااااااااامشحَّرين إذا حد مارِكْ وشافني بحكيه!!! ليكول عني عايبة!!!! .... ترى يا ستي هالشغلات كانت عنا كبيرة وبتطير فيها رْكااابْ!!!
بكيت اركظ بالحكلة وهو يكُلِّي وقفي يا بنت، بِدَّي اسألك وين دار ابو عارف؟
هاظ أبو عارف، كان جارنا. بس مين رد عليه؟؟؟!!!! الله وكيلك بكيت اركظ وكَلْبي يدُكْ، لحد ما وِكْعَتْ مني الجرة. ............. ياااااامشحَّرة يااااااااااروكِيّة....... شو بدك تساوي بحالك؟............ ياويلي من امي، وأبوي هظاك التاني بكون كاعد بالدار واسْتعْوكْني!!! ... شو بدي اكُلْهِن؟ كسرت الجرة!! بدّن يكولولي كيف وليش!...ومافينيش أكذب عليهن يا ستي، يااااااااصبااح الشووووووووم علينا، ليه كنا نكدر نحط عيونّا بعين أبونا؟؟ كنا نعملها تحتنا، بس بجَكْرَة منو.

بكيت أركظ زي الكِرْدِة من خوفي لحد ما وصَّلْت الدار، ومن خوفي من أبوي كام خط عكلبي ووكعت وما صحيت إلا على كفوف إمي الكوِيِّة. لكااان؟ كانت فينا مَوِيِّةْ، مش زيكو بنات هالايام! بِتّْطُكُّوا من كُثْر الضعِفْ !!! كانت الوحدة منا تتباهى كمان بنصاحِتْها، كل ما تكون ناصحة يا ستي وِوْراكا كبااار، كل ما تكون خرج جيزة وبتكون ولاّدة.
إلاّ شو؟ قالت الختيارة وبنت ابنا فرطانة من الضحك، الزَّلمة بدو يوخِذْ وحدي معظمة؟ آه شو بدّو فيها؟ لأ يا ستي، كانو يدَوْروا على اللحم. أنا بكُلِّكْ: إسّا اذا كنتي ميتة جوع؟ وحطّوا كُدّامِكْ صحن فيه عظم، والثاني فيه لحمة هبرة او خروف، أيّا بتوكلي؟؟؟ أكيد اللحم. أهاااااا!
مش تِبْكى الوحدة فيكو مكبولة وزي الكمر، بتظل تجوِّع بحالا لتصير زي لِمْكَشِّة الكديمة لا فيها لون ولا خير!!!
وين كنا يا ستي؟ آه... إتذكرت. بالصلاة على النبي،......... هاظ انا لما وصلت الدار وكَسَرْت الجرَّة وتركتا وراي من خوفي وصحيت على كفوف امي الكوية وهيي ترش عليي الماي والمازهر، كان صار أبوي واكف عباب الدار، أبصر مع مين بحكي!! وأنا يا ستي......... شَخّيتْ تحتي من خوفي. يااااااااامشحَّرة ياااااااااروكِيّة، إن كان حدا شافك وفسدْ لَبوكي!!! شو اسوّي بحالي يا ربي؟ ........ يا رب دخلك تستر عليي. ظلّيت ادعي يا ستي ومش مسترجيي اطلع من الغرفة، لحتى يا ستي شو؟؟؟؟؟؟؟؟
البنت بكل لهفة وتركيز وحماس: شو يا تيتا؟
اتريه الشّب لِحْليوا اللي لحكني وهربت منو ووكّعْت الجرة، ...... أتريه طلع شهم يا ستي، حِمِل الجرة ولحكني وهو اللي دك الباب وحكى أبوي. أنا كُلْتْ أكْلَتْ هوا يا روكِيّة، بس الله بحبني يا ستي وما بدو يفظحني. الزلمة كال لبوي: يا عمي هاي الجرّة وقعت من ايد بنت دخلت الدار عندكو. كالّوا ابوي: مين؟ ...... ولي روكية!!!...................... تعالي جاااي.................... يا مشحَّرين يا روكية، والله ما بكى من العمر بكيِّة!!!!!!!!!!!!!
بس الله كبير يا ستي. كانوا رجالنا شهام وكلِّنْ نخوة وحَمِيِّةْ. كانوا يدوروا علبنات الآدميّات. كام كالّوا لأبوي: صلي عالنبي ياعمي، .......... لأحكيلك، وحكالو الكصّة وانا كلبي كان راح يوكف من الخوف. أتاريه يا ستي حَبْني، ودخلت كلبو من اول ما شافني، وحبي أكثر لما هربت وكسرت الجرّة!!!...... فكالَّك هاي البنت بنت أصل وبتنظب ببيوت. وكالّو لأبوي: ما بشرب كهوتك إلا لتلبيلي طلبي، ونا داخل عبيت احرار...... كالّوا أطلب إذا بَكْدَرْ!!! هاظ ابوي اللي كال. كام كلّوا الشب: ياعمي، أنا جيت أسأل عن دار أبو عارف. والله حطّلي الجرّة بطريكي،........ وأنا طالب إيد بنتك الحُرَّة، اللي كسرت هالجرّة.
ههههه
آآآآآآآآآآآآآآخ يا ستي رجّعتيني اكثر من ستين سنة لورا. شفتي يا ستي؟ هيك كنا وهيك صار النصيب. عشنا بالكِلِّة وكنا راظيين وبالنا مرتاح. كنا نحب بعظنا البعظ، وتلاكينا نركظ عبعظ ونتساعد. مش مثل اليوم!!!! اللي ماعاد الجار يعرف مين ساكن كبالو!!!!
طيب يا تيتا احكيلي يوم العرس شو صار معك؟
إسْتْحي يا بِنْتْ، وُكُعْدي عاكْلة. خلص يا بنت، هسّا بتُنُكظيلي وظوئي......وكَرَّبْ العشا يئذن... طبعا والجدة قلبا مفرفح ومنعنش ورَدْ اللون لخدودا الدبلانة.........
آخ منكو يا بنات هاليوم شو بارحااااااااات!!!!!!!!
إتجوّزنا.......عملنا عرس كان فيه كل أهل الكرية، كبير وصغير، ورجال ونسوان، كُلُّو كان يكوم بالواجب.
زفّوني علحصان وكان لحصان مزيَّنْ ويْطَلِّعْ صوت، ونا لابسة البدلة وفرحانة ومستحية وخايفة بنفس الوكت. أبوي كالّي شوفي يا روكية: هاظ البيت ربّاكي، ولبيت جوزك ودّاكي. ما إلك رجعة عليه. من بيت جوزك لكبرك يابا، ولا بكون غظبان عليكي............. ، وامي كالَتْلي: وبيني بينها عاد: إسمعي يا روكية، ترى هاظ الزلمة صار حلالك ولازم تطيعيه، إوعي ثم إوعي ثم إوعي... تكوليلو لأ عشي، فاهمة يمّا؟ وشو ما يعملّك اكبلي، وشو ما يساوّي بتكولي حاضر وعالسكت، فاهمة يمّا؟ كلتلها حاظر يمّا زي ما بدكو.
وزفونا لدارنا انا وعريسي، طبعا بدار اهلو، وبكيت مستحية كيف بدي أشيل الطرحة عن راسي كُدّامو؟ ووين بدي انام انا واياه لحالنا؟؟؟؟؟ انا شو بدَرِّيني بِرْجالْ وعمايِلِنْ؟ ........... عزّا الله يشَحْروا ويشَحْرِك يا روكية!!!!!!!!!!!!! ................هاظ الزلمة اللي فكّرتو شهم لأنو اتجوزني وستر علي بعد ما نزّلت الغرّة وكسَرْت الجَرَّةْ !!!!!!!!!!!! طلعت نيتو مش منيحة عليي!!!!!!!!!!! وبلَّشْ يعمَلّي شغلات مش منيحة، كال شو بدو ياني (..........) يااااااااااااااااااااااامشحّرَة يااااااااروووكيّة!!!!!!!! شو بدّك تكولي لأبوكي؟؟؟ إتزعرن عريسي عليي؟؟؟؟؟؟؟؟؟؟؟؟ بس اتذكّرت بسرعة كلام ابوي وامي ، وخليتو يعمل اللي بدو ياه وهه!!!!!! عالسّكت. هو جوزي وحر يعمل اللي بدو ياه، وبيني وبينك يابنت كلّي كلام خلاني ادوخ، كان محتااااال ضحك عليي......
ههههههههههههه ههههههههههههههههه ههههههههههههههههههه
آآآآآآآآآآآآآآآآآآآآآآآآآآآآآآخ يا ستتتتتتتتتتتتتتتتييييييييييييييييي!!!!!!!!!!!!!!! !
وهيك صار، وخلّفنا ابوكي وعمتك لطفية، وعمك ابو مصطفى وعمتك نجية، وعمتك......، وعمك............، لحد ما طَلّعونا اليهود ولاد الحرام من ديارنا ورزقنا وببلادنا، هيك تعرفت عل سيدك ابو سماعيل. مش زيكو بنات هالإيام بارحااات وكواايا وبتعرفو كل إشي !!!!!!!!
كومي يا بنت ، وجع يكسِّر نياعك، كومي اكفزي وعمليلي كباية شاي ، نشّفتي ريكي قد ما سألتي، وينك يا بنت؟........................كثري فيها المرامِيّة .

المصدر: منتديات بنات فلسطين - من قسم: قصص أدبية , روايات , حكايات , تاريخ الأدب والأدباء

rww hgajhx lu vhkdh 2

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
أسماء مستعارة رانيا لظن	امير القلوب	حـانة الآدباء والفـلاسفة والمفكريـن	11	01-17-2016 09:34 AM
قصص الشتاء مع رانيا	رانيا	فـسحـة الـروح " يوَ๑ـَيآتْ الأξـضآء "	9	01-11-2015 02:53 PM
رانيا الحب	عادل الحباب	همس القوافي , النثر و الخواطر	5	09-22-2014 05:30 PM
عشق الشتاء	اشرف صالح	الــشعـر والـشعـراء	10	02-26-2014 07:15 AM

قصص الشتاء مع رانيا 2

مرررررحبا حبايب اجريت بقصة جديده :-)طويله شوي بس تعجبكم ان شاء الله الغُـرَّةْ والجَـرّةْ قصة قصيرة باللّهجة الفلسطينية بنت فلسطينية كانت قاعدة مع سِتّا بسيعة صفا،