منتديات بنات فلسطين

منتديات بنات فلسطين (http://www.bntpal.com/vb/)
-   همس القوافي , النثر و الخواطر (http://www.bntpal.com/vb/f12/)
-   -   يا بنت (http://www.bntpal.com/vb/t15904/)

سفير القلعة 03-02-2014 06:46 PM
يا بنت
 


يا بنت

أنا يلي هديتيني وردة بـ باب توما
وبكيت عليها بعد 3 أيام
لما نشفت ..!!

يا بنت ..

أنا يلي سرق العلكة من تمك
لما كنتي عم تعملي بالون
وخبيتا عندي بـ الرف

الرف الي كلو ذكريات
الي كلو تفاصيل
الي كلو .. إنتي

بتلاقي الغرفة قايمة قاعدة ..
بطانيتي عالأرض ..
المخدة بنص التخت ..
وفوقا فردة جرابات

تيابي مزتوتين
كل يوم باكل بهدلة من أمي عالتياب

وبتلاقي الرف وحدو .. مرتب

فيه ورقة مشقوقة من روزنامة
مكتوب ع قفاها .. "بحبك"
فيه رسمة لـ عيونك بـ قلم الرصاص
فيه دبوس شكيتي فيه تنورتك
لما طار الزر منا ..

فيه كعب .. انكسر وخبيتو عندي
فيه صورة إلي والك .. مو ضابطة
كنتي فيها مغمضة عيونك
قلتليلي كبا .. احرقا
بس ما هان عليي
إلا خبيها عندي .. بقلبي .. عالـ رف

في 10 علب عطر فاضيين .. عبيتيلي ياهن
في ظفر تركيب .. هر منك بـ مرة من المرات
في غطا قلم .. فكيتيه لما كتبتي ع ايدي "دب"

يا إمي ع هالرف

ويا إمي .. تيابي أنا جبتن
لهيك مزتوتين .. بجيب غيرن

بس الرف .. الله بعتلي ياها مرة
منين بدي جيب غيرها ؟!

وبيكتروا الغراض .. وبتكتر التفاصيل

فيكي تقولي سخيف
فيكي تقولي مولدن

بس هاد هو الشب .. لما يعشق

هاد هو أنا .. يا بنت !!

ملاحظة : باب توما حي من احياء دمشق الشرقية

القديمة ويقطنه بغالبيته من سكان دمشق من الطائفة المسيحية الكريمة


مما قرأته اليوم
نقلته لكم من مصدره

تحياتي

crystal 03-02-2014 07:05 PM
لك عنجد رووووووووووووعه
والاحلى انها بللغةة العآميه

حبيت الوصف الي صآر فيها خآطره ع حوآر ع شوق
ع صدق بالمحبه ,, مبدع رآق لي مآ اخترت

سفير القلعة 03-02-2014 07:32 PM
شكرا كريستال

لمرورك وتعقيبك

تحياتي

نقاء الروح 03-02-2014 07:34 PM
حبيت تفآصيل القصصة
وحبيت كل كلمة سردت هنآآ



دمت عزيزى

/
\
:81:

سفير القلعة 03-02-2014 07:55 PM
شكرا وسام

وانا حبيت مرورك هههههههه


تحياتي الك


الساعة الآن 08:39 AM

Powered by vBulletin® Version 3.8.7
Copyright ©2000 - 2024, vBulletin Solutions, Inc.
Search Engine Optimization by vBSEO ©2011, Crawlability, Inc.
HêĽм √ 3.1 BY: ! ωαнαм ! © 2010
new notificatio by 9adq_ala7sas
User Alert System provided by Advanced User Tagging (Lite) - vBulletin Mods & Addons Copyright © 2024 DragonByte Technologies Ltd. Runs best on HiVelocity Hosting.