| !~ آخـر مواضيع المنتدى ~! |
| |
| إضغط علي
او
 لمشاركة اصدقائك! |
| |||||||
قصة الحية ..
لما توصل الزوجة لمرحلة انو حتى بيت زوجها يبطل مكان راحتها وسعادتها ، لما توصل لمرحلة انها تتمنى تموت على انها تنام ليلة تانية ببيت زوجها ، هون بتفهمو شو
 |
| | LinkBack | أدوات الموضوع | انواع عرض الموضوع |
|
#1
07-12-2017
| ||||||||||
| ||||||||||
قصة الحية .. لما توصل الزوجة لمرحلة انو حتى بيت زوجها يبطل مكان راحتها وسعادتها ، لما توصل لمرحلة انها تتمنى تموت على انها تنام ليلة تانية ببيت زوجها ، هون بتفهمو شو يعني تختار تصير حيّة وهي مرتاحة !! اسمي مريم خريجة حقوق من عشر سنين وعمري خمسة وتلاتين سنة ، انسانة مثقفة واعية ناضجة وعندها افكارها الخاصة ، درست بالجامعة من بعد معاناة شديدة بسبب وفاة والدي ، كان لازم اضل احصّل قروض من الجامعة لاستمر بدراستي الصعبة ، امي امرأة مُقعدة او متل ما بسموها الناس ' مشلولة ' ، بفترة دراستي كنت عايشة انا وهي ببيتنا من بعد زواج كل اخواني واخواتي وكانت عيشتنا صعبة لإنا مضطرين نفتح بيت على حساب صدقة اخواني يلي قطعونا من سنين واهتمو باولادهم ونسوانهم ، كانو اخواني يضلو يقنعو امي انها تزوجني وتخلص مني مشان ياخدها واحد منهم لعندو يطعميها ويشربها ويسكرو بيت اهلي للأبد ، حتى على مستوى زيارات ما رح نرجع نشوف امي لانو اخي يلي رح ياخدها محمِّلنا بأخدها لعندو مليون جميلة ، كان الكل مستني لحظة زواجي مشان يرتاحو من همي وبصراحة كنت انا اكتر وحدة مستنية هاللحظة فيهم ، بوقت فراغي كان عندي دفتر صغير بكتب فيه نصائح لحالي بعد الزواج ، بكتب فيه كيف لازم زوجي يكون اهم اشي بحياتي ولازم اضحي مشانو ولازم اربي اولادي احسن ترباي ، كيف لازم اعامل حماتي واحترمها واحبها واهتم فيها ، عشت حياتي اقرا كتب ومقالات ع هاد الموضوع لحتى بتقدرو تقولو صرت بمقام الزوجة المثالية بافكاري ، كنت بس بستنى الزوج ، بعد تخرجي ما توظفت ، ضليت سنتين لحتى تقدملي الشب المحظوظ فيي يلي ما كان بعرف اي ملاك هو تزوج ، تقدملي عمار ، بخطبة بسيطة ضلت شهرين فقط هيك مرت اول فترة بعدين تزوجنا ، وبعد زواجي بيوم واحد فقط انتقلت امي لعند اخوي ورمو اخواني الاثاث او اخدوه وتسكر بيتنا للابد ، كنت عادي مش متدايقة عالاقل متطمنة انو امي بخير ، عشت انا وعمار ايام حلوة ، كنت بالنسبة الو حياتو كلها ، عشت ايام بتجنن معو وكنت بالفعل بطبّق كل نصيحة قرأتها بكتاب او مقال ، كان عمار مبسوط مني فوق التصور كيف بهتم فيه وبأهلو ، اهلو يلي بعمرهم ما شافو مني اعتراض رغم طلباتهم الكتيرة كوني ساكنة بنفس بنايتهم ، بعمرهم ما سمعو مني كلمة رغم حجم الكلام يلي كانو يسمعوني ياه ، ومع هيك بحياتي ما حكيت ولا اعترضت ، كنت اتسمع حكي من اخواته وامه والله اضل ساكتة ولا كإني سمعت ، كان كل هاد بالنسبة الي عادي ، كنت بضل احكي ' عادي احنا اهل وكل العائلات بتلاقي بينهم وبين بعض مناقرات وحكي ' ، لكن اكتر اشي كان يقهرني هي اخت عمار يلي اسمها دعاء ، دعاء كانت اصغر اخوات عمار متزوجة من محامي اسمو احمد هالانسان راقي جداً ومحترم عكس مرتو بالزبط ، دعاء كانت تقريباً من عمري ومتزوجة جديد وما عندها اولاد ، ولانها صغيرة كانت هاي هي الحجة يلي بحطها كل ما اسمع منها كلمة ، كنت بقول غيرانة لإني من عمرها او بتحب اخوها كتير ولهيك بتضل تسب وتحكي ، دعاء كانت مشكلتها الكبيرة انو مشاكلها معي ما كانت بتضل بيننا ، كانت تنشر بوستات عالفيسبوك تسب علي فيهم من تحت لتحت ، كانت تغلط وتحكي وكل ما يجو قرايبها يزورو بيت حماي وتكون هي موجودة تضل تحكي علي لحتى قرايبها يكرهوني بدون ما يتعاملو معي ، بتعرفو حتى عرسي ما حضرتو كانت بتكرهني بدون حتى ما تشوفني ، ويلي صدمني انو بعد يومين من زواجي فتحت الفيسبوك لقيتها كاينة منزلة بوست بيوم عرسي مكتوب فيه ' من صغري بعرف اخوي بحب الحيوانات ، بس انك تجيب #حيّة عالدار هاي ما توقتها منك يا اخوي ' ، حاولت اعمل حالي ما شفت البوست ، قلت عادي يمكن هي لسا ما تعاملت معي ولسا ما بتعرف كيف انا ناوية نكون انا وياها زي الاخوات ، مرت الايام وانا بتقدرو تقولو خدامة لبيت حماي ، كل يوم لازم انزل لعندهم للبيت أعزلها واضبضبها واطبخ واجلي وما كنت معترضة ، استمر زواجي عشر سنين عشتهم هيك ، حماتي كانت تلت وتعجن وتضل تحكي وتعيّب على شغلي وعلى طبخي وتغلط على اهلي وتسم بدني بدون سبب وبرضو والله ما كنت احكي كلمة ولا حتى عمار كنت اشكيلو كلمة ، كنت لما اتدايق اعيط بيني وبين حالي وامسح دموعي وارجع اضحك ، واخواته كانو يكرهوني من كتر ما بسَمعوهم حماتي ودعاء حكي عني بس قدامي يعملو حالهم مناح ومع ذلك ما كنت اقطعهم واضل احكي لعمار لازم تزور اخواتك وتتطمن عليهم ، اما دعاء كانت لما تيجي تزور اهلها و اكون موجودة تدخل عالغرفة وما تحكي معي كلمة ، بهدول العشر سنين جبت تلات اولاد اكبر واحد فيهم عمرو ثمان سنين ، وبيوم وصلنا خبر انو خالة عمار توفت ، حماتي انهارت على اختها واخوات عمار واخوانه اجتمعو ببيت حماي متدايقين على خالتهم وانا كنت بهداك الوقت اهدّيهم واصبرهم وهيك ، رحنا لبيت العزا تلت ايام ما قعدت فيهم ، ضليت اشتغل واشيل واحط والكل شهدلي بتعبي بالعزا ، اكتر شي دايقني هي بنت خالة عمار اسمها نادين ، البنت كان عمرها عشرين سنة وحيدة اهلها وابوها متوفي من سنين وهي امها الله يرحمها لحقتو وصفّت هالبنت وحيدة ، كانت بتبكي بحرقة وقطعتلي قلبي عليها ، روحنا من العزا وبعد اسبوع بلشت احس انو عمار شوي متغير عن قبل ، صرت الاحظ انو مكالمات دعاء اختو الو ما بتوقف ، ليل نهارو ماسك التيليفون بالغرفة وبحكي لساعات طويلة مع دعاء ، قلت معلش بديش اعطي الموضوع اهمية ، لكن مرت اسابيع طويلة وعمار ع نفس الحال واكتر ، صار ليل نهارو شارد وبفكر ، ليل نهارو سرحان وصافن ، بحكي معو ما برد ، بطبخ ما بيتغدى ، بلبسلو ما بتفرج علي ، حتى اولاده ما بحكي معهم ولا بلعب معهم متل قبل ، صرت اقعد معو واسئلو ازا صاير معو اشي ما برد ، زوجي كان عمرو اربعين سنة بهداك الوقت شو ممكن يشغل بالو اشي غير ديون او شغل او .... بنت !! قعدت افكر اكتر و ادقق على حركاتو اكتر ، كان بخترع اي مشكلة بالليل ليزعل ويروح لغرفة تانية ينام فيها وبعد ساعة لما كنت اروح لجهة هديك الغرفة كنت اسمعو بحكي مكالمة مع بنت ولما اجرب افتح الباب الاقيه مسكر بالمفتاح ، واجهتو اكتر من مرة اني شاكة فيه وكان يتنكر ويتهرب ويصرخ ويزعل ، كان لازم الاقي حل ورحت لعند حماتي وقعدت معها وسألتها ازا صاير مع عمار اشي ومخبيه علي وكانت المفاجئة لما حكتلي ' جهزي حالك وبيتك ، الجمعة الجاي رح نجيب نادين بنت اختي -الله يرحمها- ضرّة لعندك ' !!!!!! انصدمت ! انصعقت ! انهرت ! شو بتتوقعو تكون حالتي لما سمعت هيك خبر ؟ كانت اول مرة ببكي قدام حماتي ، بلشت احكي وابكي واترجاها ليش هيك بتعمل معي ؟؟ ليش هيك انا شو سويت ؟؟ ليش تجيب وحدة بيني وبين زوجي والله انا ما قصرت معو بإشي بس كان كل طلبي يضل بيتنا عامر وكلو حب وحنان بيننا ليش لتجيبلي ضرة تبعد زوجي عني ؟؟ قعدت اعيطلها وانزل عند رجليها مشان تتراجع عن كلامها وهي تدفشني وتحكيلي ' يا حيّة بدك بنت اختي تضيع بين الناس ؟ بدك عمامها يرموها لأول عريس ؟ ابني أولى فيها من الكل ! ول عليكي شو حيّة وما بدك الخير لغيرك ' ، قامت لغرفتها وتركتني مرمية عالارض ودموعي معبية خدودي ، طلعت لبيتي وصرت ارن على عمار وما كان يرد صرت ابعت مسجات واسألو ليش هيك عمل وهو يقرأ وما يحكي ، كان جبان !! كان أجبن من انو يواجهني لانو عارف اني بحياتي ما قصرت معو ولا مع اهلو وتحملت الويل منهم بدون ولا كلمة ، حضنت اولادي وبدموع صرنا نبكي كلنا عالايام يلي بتستنانا ، كنت مستعدة اترجى كل الدنيا ليضل بيتي الي وزوجي الي لدرجة انو وصلت معي اروح لبيت دعاء احكي معها ، اه دعاء يلي بحياتها ما زارتني وبحياتها ما حكت معي ولا قعدت معي بنفس الغرفة ، فتحتلي الباب ولما شافتني ببكي ضحكتها علت وعبّت الدنيا ، قعدتني جوا بيتها وطلّعت سيجارة وصارت تدخن وتحكيلي ' اعصابك اعصابك اوعك يطقلك عرق ' ، قلتلها ' دعاء يا حبيبتي بغض النظر انك بتكرهيني بس انا طالبة مساعدتك ، انت من عمري وبتفهميني انا بدي تساعديني انو عمار ما يتزوج نادين مشان الله ' وفجأة رجعت انفجرت ضحكة منها وقربت علي وقالت ' ولك يا حيّة انت ما بتعرفي مين ورا هالزواج ؟ انا !! اسمعيني منيح ، نادين كانت تحب عمار وتموت عليه زمان وانا كنت واعديتها عمار ما يكون الا الها ، بس صارت مشاكل مع خالتي قبل ما تموت واضطر عمار يتزوجك ، ولك كانت نادين بمقام اختي الصغيرة ودايماً سوا وانت كنت سبب انو نتزاعل ونبطل نحكي مع بعض وهيها اجتني الفرصة لأزوِّج نادين لاخوي ونرجع انا وياها صحبة متل قبل ليش أضيّعها ؟ وانت اذا مش عاجبك بتنقلعي برا دار اخوي فاهمة ؟' ، لميت حالي بصعوبة وقمت وانا بحكيلها ' حسبي الله فيكي رح تخربي بيتي ولك هاي بنت عمرها عشرين سنة قدامها مستقبل وعرسان وانتو بدكم تزوجوها من هلا ؟ لو خايفين عليها درسوها وعلموها مش تزوجوها لواحد اكبر منها بعشرين سنة !! الله لا يوفقكم ولا يهنيكم ' وقامت دعاء وبلشت تسب وانا طلعت ركض برا الدار ودموعي ما وقفو ، بيوم كتب كتاب عمار ضليت بالغرفة مسكّرة ع حالي منهارة من هاليوم الكئيب ، لبس عمار احلى بدلة وراحو كل بيت حماي معو ليخطبوها من عمامها وضلت البناية فاضية ما فيها الا صوت نواحي وعياطي على بيتي يلي عمرتو بعشر سنين ورح ينهار بلحظة ، جاب عمار نادين للبيت وشفت الايام يلي كنت متوقعيتها ، شفت كيف اهلو بعاملو نادين وحاطينها ع راسهم وكيف كبّرو راسها علي لحتى صارت تعتبرني خدامة بالبيت ، شفت كيف عمار بطّل يعرف الطريق لغرفتي او لغرفة اولادو وكيف مقضي يومه عندها ، شفت كيف كانت تطلع بقميص النوم قدامي وقدام اولادي لتحرجني وتخليني ادخل ع غرفتي وتضل البيت فاضية الها ، شفت كيف بيت حماي حوّلو بنت صغيرة لوحدة حقيرة همها تإذي ضرتها وتهينها وتحرق قلبها ، شفت كيف انا صرت مثل قطعة اثاث بالبيت ما الي قيمتي ولا حضوري انا يلي كنت سيدة البيت وعمار ليل نهارو يبوس راسي على البيت المثالي يلي كنت عامليته ، كانو عارفين كلهم انو ما بقدر اشكي لاهلي لانو وين اهلي اصلاً ؟؟؟ كانو عارفين انو ما بإيدي ارجع لبيت اهلي لانو ما في بيت !! عشت سنة مع ضرتي اصعب منها ما في ، عشت اعاني وساكتة ما الي حدا اشكيلو ولا الي صوت احكي فيه ! وبعد هالسنة مرض واحد من اولادي وارتفعت حرارته بالليل ورحت ركض لغرفة عمار ونادين اخبط عليها مشان يطلع عمار ياخد ابني عالمستشفى وما قبلو يفتحولي ، صرت اخبط واصرخ وابكي عالباب وصوت ضحكهم طالع وعمار بغلط وبسب من جوا وبطرد فيي مشان ابعد عن الغرفة ، حملت ابني ونزلت اركض ع بيت حماي وما حدا فتح الباب ، اضطريت انزل فيه عالشارع واجا شب من الجيران طلعني معو واخدناه عالمستفشى وللصبح وانا معو لحتى نزلت حرارتو ، بالصبح اجا عمار اخدنا ولما وصلت البيت بلشو كلهم يسبو علي كيف اني بدون ترباية وكيف بطلع مع شب ما بعرفو بالسيارة بالليل وبلشو يطعنو بشرفي كلهم وهاي كانت القشة التي قصمت ظهر البعير ، بوقتها طلع صوتي يلي كان مخبى طول الوقت ، صرخت باعلى صوتي بوجههم لدرجة انو ما حدا فتح تمو بكلمة ، سبيتهم من كبيرهم لصغيرهم ولعنت الدنيا والعيشة الزفت معهم ، سكتو كلهم بدون ولا حرف ، ضلهم صافنين مستغربين مين هاي يلي قدامهم ؟ معقول نفسها مريم يلي صرلها ١١ سنة ساكتة ؟؟؟؟؟ ' الله يلعنكم الله لا يوفقكم الله يخرب بيتكم ، ظلمتوني وهنتوني بدون سبب ، بحياتكم ما شفتو مني الا الخير وهيك استغليتو اني ساكتة وظلمتوني وحرقتو قلبي على بيتي يلي راح ، تفووو عليك يا عمار من بين الزلام يا رخيص ولك مبسوط على بنت قد اولادك ؟؟؟ ، تفووو عليكي يا ضرتي يلي ما الك حدا يربيكي ، الله يلعنك يا حماتي يا حقيرة بدل ما تكوني الي ام كنت اشد اعدائي وانت يا دعاء الك يومك يا خنزيرة يا كلبة !! وتفرجو علي كلكم !! تفرجو علي منيح واسمعو هالكلمة ! قسماً بالله لأنتقم ! قسماً بالله لأنتقم واخليكم تترجوني واحد واحد وما بكون انا مريم اذا ما كنت قد كلمتي ! 'حكيت هالكلام وطلعت اركض برا البناية ورنيت لواحد من اخواني واجا اخدني لبيتو وضليت عندو يومين وطبعاً بعد بهادل من كل عيلتي اخدت امي لبيتنا القديم ورجعنا قعدنا فيه لحالنا متل زمان بعد ما جابتلي كم وحدة من اخواتي فرشتين وكم طنجرة واشي نمشي حالنا فيه ، رجعت لليتنا القديم وتركت وراي اولادي لانو خلص كنت مستعدة اتخلى عن حياتي كلها كمان مقابل اني ارتاح من قرف عمار وعيلتو ، بعد يومين من رجعتي لبيت امي رن علي عمار وحكالي انت طالق ، عادي ما اهتميت ، قدمت لشغل لكل كتب محاماة موجود بالاردن ومواصلاته مأمنة ، بعد اسبوع تفاجئت برقم برن علي ولما رديت حكالي ' حضرتك مقدمة طلب توظيف للمكتب عندي ، معك احمد ، زوج سلفتك دعاء !' ، تفاجئت جداً ولما رجعت راجعت الطلب يلي قدمتو اكتشفت اني مقدمة طلب لعندو ، رديت ' صدقني ما كنت بعرف اني مقدمة طلب لمكتبك ' ، رد ' عادي مش مشكلة ، خلينا نتفق انو ما ندخّل الامور العائلية بشغلنا ، حبيت اتأكد انك انت نفسك مرت عمار وبدي ابلغك انو مقابلتك الاسبوع الجاي ' ، انبسطت لاني كنت متوقعة انقبل بسرعة كون تقديري بالجامعة امتياز ، لبست وطلعت بالوقت المحدد ولما رحت اقابل اكتشفت احمد قديش انسان رائع ، بعد المقابلة سألني من باب الفضول عن سبب طلاقي وخبرته بكل قصتي من اولها لآخرها واكتشف حجم كيد مرتو وخباثتها وقديش انا صبرت وتحملت لكني طلبت منو ما يجيب سيرة الها ولا يحكيلها اني قدمت طلب توظيف عندو ، وهو وافق اكيد ، بعد يومين رنلي يخبرني انو وافق على وظيفتي وبلشت شغل معو ، احمد كان محامي رائع وواثق وشخصيتو خرافية والاحلى من هيك انو بنجر ورا الكلام الحلو، بعد شهر من الشغل معو بتقدرو تحكو تعودت عليه وصار بإمكاني اطلب منو يكون واسطة خير اني اشوف اولادي عن طريقو ، رد علي ' ولا يهمك ' ، كان مِحترم اني ما بدي ارفع قضية على طليقي وبدي اشوفهم بطريقة سلمية واتفاق بيني وبين عمار ، بعد ايام رن علي احمد يخبرني انو عمار وافق اشوف اولادي لكن لمدة ساعة وحدة فقط كل جمعة ورح يجيبهم لعندي احمد ويرجعهم احمد ، حبيت الفكرة عالاقل بقدر اشوف اولادي ، بأول لقاء بيني وبينهم ما بتتخيلو العاطفة يلي كانت بيننا كيف صارو يبكو بحضني وانا ابكي عليهم واحمد كان واقف شاهد عالموقف وعالظلم يلي بنعيشو ، صار احمد كل اسبوع يجيبلي اولادي ويحاول يغيرلنا نفسيتنا سوا ، صار ياخدنا لمطاعم وحدائق ع حسابو بس ليعيشنا احلى لحظات قبل ما تخلص الساعة المحددة ، حتى انو صار بوقت الدوام يسألني عن صحتي وعن حياتي على قد ما تأثر بقصتي ، ومن هون .. اجتني فكرة اني اصير متل ما لقبوني بيت حماي .. اني اصير .. حيّة !! بلشت احس بحجم اهتمام احمد بمشكلتي ، صرت ادخل معو من طريق جديد ، صرت اطلب اشوفو حتى لو ما معو اولادي بس لأجل اني اشكيلو وابكي قدامو ، عملتلو ادد عالفيسبوك مستغلة انو بيت حماي ما بشوفو بروفايلي لاني عامليتلهم بلوك وصرت ادوّر على الاماكن المفضلة يلي بحب يروحلها واعزمو عليها ، اكتشفت انو من بوست معين حاكي عن طبختو المفضلة هي المفتول ، وتذكرت مرة حماتي حكتلي انو دعاء ما بتعرف تعمل طبخة المفتول ، بيوم حكيتلو ' امي عازميتك لعنا بدها تتشكرك على جهودك معنا ' ، لما وصل بيتنا شو انبسط لما شافنا طابخين مفتول ، كان ازكى مفتول داقو بحياتو ، بلشت امي تحكيلو ' متى ما بدك تاكلها احكي لمريم واحنا جاهزين ' ، احمد انبسط وبنفس الوقت كان شايف حالة البيت يلي عايشين فيه ، اخدني ع جنب وحكالي ' مريم مش قادرة تتخيلي قديش كبرتي من عيني ، معقول محامية قوية مثلك قبلانة تعيش بهيك بيت صغير وبتعزم عليه ضيوف بدون ما تخجل من المظاهر ؟ ' ، لما شفتو هيك حكيت ' آخر همي المظاهر المهم شو انا وشو اخلاقي وشخصيتي' ، وقتها حظي كان بلعب لإني ما كنت بعرف انو احمد انسان متواضع وآخر همو المظاهر ، من بعدها صار لما يجي يجيبلي اولادي كان يجيب معو هدية صغيرة صرت بحس انو بلش شوي يميل لناحيتي ويحترمني ويميزني عن غيري من الموظفات يلي بالمكتب ، وانا كنت قاعدة بحترف شغل الحية ، بيني وبين اولادي كنت احكيلهم ' هلا اطلبو من عمو احمد ياخدنا للملاهي ' ، ولما كان يجي احمد يصيرو ينطو ويحكو ' يا عمو بدنا ملاهي مشان الله ' ، وقتها كان يوافق ويرن لعمار يقنعو يضلو الاولاد معي كمان ساعة ونروح نترك الاولاد عالالعاب ونقعد نشرب قهوة ونحكي ، كنت بتعمد احكي مواضيع ثقافية من مستوى عالي لانو دعاء ما كانت دارسة جامعة وما بتفهم بهالحكي اشي ، كنت احاول احسسو بالفرق بيني وبين مرتو وكان ينبسط بالقعدة معي لدرجة كان بالمرات يلي بعدها يرن لعمار يقنعو يضلو الاولاد وقت اطول حتى بدون ما اطلب منو ، كان احمد بنجر لناحيتي اكتر بدون جهد كبير كنت بحس بوقتها انو هاي مشيئة ربنا مشان اكسر عين بيت حماي وانتقم عالأذى يلي سببولي ياه ، احمد كترت طلعاتو معي ، كترت حكياتو معي ، صرنا نلتقي بالشغل وبرا الشغل وبيوم الجمعة مع اولادي تقريباً حياتو كلها صارت معي ، كل يوم كان ببيتو يبعتلي مسج فيسبوك ونحكي لساعات ، معو حق بتعرفو ليش ؟ لاني كنت بدور على كل اشي بحبو احمد وبناقشو فيه ، كل اكلة بحبها كنا نعزمو عليها ، كل مكان بحبو كنت اخدو عليه ، لدرجة انو صار يحكيلي ' دعاء بتشك فيي اني بحكي مع بنت مش عارفة اني بحكي مع مرت اخوها ' ، كان متخيل انو علاقتي فيه كلها مبنية على اساس انو احنا قرايب ، كنت موصيتو ما يحكي لمرتو انو بحكي معي مشان ما تحكي لاخوها ويحرمني شوفة اولادي وهيك ضمنت اني اشتغل بدون ما دعاء تحس علي ، بلشت دعاء تشك اكتر هيك كان يحكيلي وبيوم واحنا بالشغل تفاجئت انو دعاء جاية للمكتب وانصدمت لما شافتني هناك ، قعدت معي وبلشت تسألني شو جابني لهون وانا قلتلها 'لساتك يا حلوة ما شفتي اشي من سم الحية ' ، دعاء انجنت وطلعت برا تركض ومعصبة بدون حتى ما تشوف احمد ، من بعدها احمد صار يحكيلي انها بتحاول تبعدو عني ، قلتلو ' اوك خلص خلينا نخفف حكي ' ، كنت عارفة انو بلحظتها رح يحس بقيمتي وانو تعود علي ، لقيتو بعد ايام صار يتحجج مشان يشوفني ، قلتلو ' صعب لانو امي بلشت تحس انو في بيننا اشي غلط ' ، بلش احمد يقنعني انو عادي ما فيها اشي وانا كنت مش قبلانة اشوفو ، تفاجئت فيه بعد ايام جاي لعند امي يقنعها تسمحلي ارجع احكي معو واشوفو متل قبل وامي منعتو من هالشي متل ما كنت موصييتها ، صار احمد يرن علي بالليل بحجة انو اشتاقلي مشان ما بنشوف بعض كتير ويحكي معي بالساعات ويخبرني انو اخترع مشكلة مع دعاء مشان ينتقل لغرفة فاضية يحكي معي فيها براحتو ، ضليت فوق راسو احسسو انو غلط نحكي ونطلع بدون رابط شرعي لحتى بيوم طلعت منو كلمة ' انا بحبك يا مريم ، ولانك مطلقة هاي فرصتنا نتزوج وتعيشي معي ' ، قلتلو موافقة بس خبّر مرتك بالاول انها تفضيلي غرفة ، مرو يومين من بعدهم روحت من الشغل لقيت دعاء وحماتي بالبيت قاعدين مع امي ، اول ما دخلت ركضو لعندي يحضنوني وقال شو ' اشتقنالك يا احلى كنة ، جايين نرجعك لبيتك والله اشتقنالك ' ، تفرجت فيهم وضحكت ضحكة الحية وقلتلهم 'ما برجع الا ازا زوجي رجعني '، ردو فوراً ' امرك يا ست الكل من بكرة بتلاقيه عندك ' ، اليوم التاني اجا عمار وقعد معي يوم كامل يترجاني ويقنعني ارجع لعندو ، كانو كل العيلة خايفين بنتهم دعاء تدوق يلي دوقوني ياه ، كانو مرعوبين بيتها ينخرب بس كان عادي ينخرب بيتي ، حكيت لعمار ' بكرة بردلك خبر خليني افكر ' ، كنت قدام خيار اني ارجع لبيتي متل قبل او اني انتقم ، بتتوقعو شو اخترت ؟ اليوم التاني رنيت لاحمد خبرتو انو الجمعة كتب كتابنا !! اجا الجمعة بعد خمس ايام كانو كل بيت حماي يرنولي فيهم يترجوني اتراجع عن هالقرار وانو دعاء حرام رح تنهار وتزعل وانا ما تراجعت ، بيوم الجمعة كتبت كتابي وخلال اسبوع اثثلي احمد غرفة ببيتو ورحت سكنت هناك بس دعاء كانت تاركة البيت ، عمار من القهر يلي فيه رمى اولادي لبيت اهلو وهدلاك ما تحملوهم شهر من بعدو لقيتهم جايبينهم لعندي ، دعاء ضلت سنة كاملة مطلقة ومن بعدها رجعوها اخوانها لبيتها يعني لعندي وانا عملت فيها يلي عملتو فيي ضرتي واكتر ، فرجيتها شو يعني اكون حية وعملت فيها يلي انعمل فيي واكتر ، بعد بسنتين من تعذيب دعاء طلبت من احمد انتقل لبيت جديد ، صار احمد يقعد عندي بالاسبايع وكنت ارن لدعاء اسألها ' بتحبي اوديلك ياه ليلة ولا لسا بكير ؟' واضحك ضحكة عالية نفس يلي ضحكتلي ياها بيوم ما ترجيتها تساعدني ورفضت ! بكتب قصتي اليوم لكل اهل زوج مفكرين كنّتهم حية جاية تخرب عليهم ، الكنة انسانة الها اهلها متل ما الكم بنات بتحبوهم وبتخافو عليهم ، عاملوها متل بناتكم بتلاقوهما ما احسنها ، لكل بنت حمى بتعتبر مرت اخوها عدوتها وليل نهارها تسمعها حكي والله مرت اخوكي ممكن تكون احن عليكي من اختك لو احترمتيها وقدرتيها ، بعرف في ناس رح تسبني بالكومنتات بس انا هاد كان اختياري ، انا اخترت الخسارة على الحب ولو كنت انت مكاني شو كنت رح تختار ؟ ملاحظة : القصة مستوحاة من احداث حقيقية  المصدر: منتديات بنات فلسطين - من قسم: زوايا عامة rwm hgpdm >> hgp]e   |
|
07-12-2017
| #2 | |
  
 |
صعب ع حواء ان تكون مخلصة وتلقى الاهانة والخيانة ممن أمنت نفسها معه حواء تكره الخيانة بالاخص عندما تكون مخلصة من قلب وفي لزوجها وبين أهله وكل واحد بيجيه دوره ما في شي بضيع هيك كل واحد إله يوم قصة مؤثرة بصراحة سلمت يداك | |
| |
|
07-12-2017
| #3 | |
| تسلمي كلك ذوق نورتي .. آشكرك علي المرور .. | |
| |
|
07-12-2017
| #4 | |
|
صعبة الخيانة بالنسبة لحواء وادام القصى جميلة ومؤثرةةوفيها العبر مشكور على جهودك | |
| |
|
07-12-2017
| #5 | ||
| اقتباس:
اشكرك على المرور .. | ||
| |
|
07-12-2017
| #6 | |
| صعب اني اقرأ قصه طويله بجزء واحد لكن لشده التسلسل حبيت اكمل القصه كلها مش عارف شو ارد يعني اقول صح الي عملته مريم ولا غلط يعني من حقها تنتقم لكن كان فيها تسامح وترجع لولادها وزوجها هي اختارت تدوقم من كاس المر الي داقته وهادا برجع الها ولشخصيتها وللايام السوده الي شافتها عكل حال حتى لو كانت حقيقيه القصه اقول من حفر حفره لاخيه وقع فيها وهما وقعو بشر اعمالهم وظلمهم لمريم اشكرك اخي رجل منهم للقصه المعبره الحلوه | |
| |
|
07-12-2017
| #7 | |
 
|
صحيح صعبةة آلخيانةة لحوآْء ويمكن اتكون صعبة برضوو لآدم قصةةة معبرةة ومحزنةة وبهالدنيا كما تدين تدآن وبهالدنيا ككل إنسآ، بيجي الو دوره يعطيكك الف عافيةةة دمت لالنا | |
| |
|
07-13-2017
| #8 | |
 كآئن فطري مُستفز
| @رجل منهك; ربنآ بقول السنُ بالسن .. والعينُ بالعين والبآدي أظلم ..تمام ؟ يعني أنا لو شخص طردني من بيته يحق لي أن أطرده من بيتي . والناس مش هيطلع لها تحكي علي نص حرف لأنه هاد حقي ! وربنآ لأنه عارف إحساس الظلم ما حرم القصآص أبداً .. وقال السنبالسن والعين بالعين والباديْ أظلم .. لكن .. نيجي لشغلة إسمهآ الإنسآنية هلأ بعيداً عن الدين .. إنسآيتك إنت وين ؟ وين كونك إنسآن ؟ لما تعمل نفس إللي نعمل فيك معناته إنت نفس المستوى وما حدا أحسن من حدا صار ! أنا بقدر أطرده من بيني لو هو طردني بس بقدرش أطرده من بيتي لوإجاني خايف ، جريح ، جعان ،..إلخ ، وصدقني ما في نشوة و متعة قد ما إنك تنتقم من عدوك بالتجآهل ! التجآهل بيدبح إي إنسآن قدامك ..زي لما إنت ما تطلق عليه رصاصة بستخليه هو ينتحر بسببك . ودائماً لازم تكون عارف إنه الوقت يلي بدنا نضيعو وإحنا بننتقم بتكون الحياة بتمشي بنضيع حياة لازم نعيشها .. وهيكآ أنا لما أطلع إنسان أذاني من حياتي .. وفرت ع حالي القيل والقال ، تجاهلته لدرجة رح يصير كل ما ينذكرإسمي قدامه ينتفض.. بتجاهلي إله رح أنتقم منه فعلاً .. ولو كنت أنا إنسآن طيب جداً ممكن أسامح وارجع .. كل حدا وشخصيته .. والله لا يوقع حدا بطلم هيكآ .. يعطيك ألف عآفية محمد . | |
| |
|
07-13-2017
| #9 | ||
| اقتباس:
ابدعتي في تعبيرك عن المشكلة .. اشكرك على مرورك .. انرتي .. | ||
| |
|
07-13-2017
| #10 | ||
| كآئن فطري مُستفز
| اقتباس:
وو م حبيت أبحر كتير بالحكي لحتى ما أوصل مرحلة الهذيآن .. يسعدكك ، | ||
| |
|
| الكلمات الدلالية (Tags) |
| .., الحدث, قصة |
العرض العادي
| |
المواضيع المتشابهه | ||||
| الموضوع | كاتب الموضوع | المنتدى | مشاركات | آخر مشاركة |
| هذا هو الححب ~ | ميمآآ | قصص أدبية , روايات , حكايات , تاريخ الأدب والأدباء | 6 | 07-05-2017 09:19 PM |
| ملك روحي .. في قلب الحدث .~ | البريئة ! | حصريـات بـنات فلٍسطين | 32 | 07-03-2015 04:44 PM |
| نبض .. في قلب الحدث | وسام الملك | حصريـات بـنات فلٍسطين | 11 | 03-19-2015 07:05 AM |
| انت وموضوعك في قلب الحدث... | وسام الملك | حصريـات بـنات فلٍسطين | 20 | 03-14-2015 07:16 PM |
| الحدث الدامي ... | جار القمر | ابداعات أعضاء بنات فلسطين الشعرية والنثرية | 4 | 02-27-2014 03:56 PM |
الساعة الآن 09:06 AM
